មេប៉ូលិស ថៃ ត្រៀមប្រមូលគ្រូទាយ គ្រោះរញ្ជួយដី ឬទឹកជំនន់ មកដេកក្នុងពន្ធនាគារ

ឧត្តមសេនីយទោ Charoonkiat Pankaew ឬឈ្មោះហៅក្រៅថា Big Tao ស្នងការនៃការិយាល័យស៊ើបអង្កេតមជ្ឈិម បាន​បញ្ជា​ឲ្យប្រមូល​ព័ត៌មានលម្អិតដើម្បីស៊ើបអង្កេត ពាក់ព័ន្ធនឹងគ្រូទាយក្លែងក្លាយពីគ្រោះរញ្ចួយដី ឬទឹកជំនន់ក្នុងប្រទេសថៃ ត្រៀមដេកក្នុងពន្ធនាគារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម thethaiger ឧត្តមសេនីយទោ Charoonkiat បាននិយាយនៅក្នុងបទសម្ភាសន៍ ក្រោយចូលរួមក្នុងកិច្ចប្រជុំមួយថា កិច្ចប្រជុំថ្ងៃនេះគឺដើម្បីតាមដានចំនួនពាក្យបណ្តឹងដែលទទួលបាន ការបែងចែកការងារទៅឲ្យភ្នាក់ងារណាទទួលខុសត្រូវ និងចំនួនករណីដែលការិយាល័យស៊ើបអង្កេតកណ្តាលបានដោះស្រាយ។ ផ្អែក​លើ​របាយការណ៍​ដំបូង លោក​ជឿជាក់​ថា​ មាន​បញ្ហា​គួរ​ឲ្យ​ចាប់​អារម្មណ៍ និង​សំខាន់​មួយ​ចំនួន​ដែល​ត្រូវ​ដោះស្រាយ​ឲ្យ​បាន​ឆាប់។ តែលោក​មិន​អាច​បញ្ចេញ​ព័ត៌មាន​លម្អិត​បាន​ទេ​ ព្រោះ​ខ្លាច​ប៉ះពាល់​សំណុំរឿងមួយនេះ។

ទាក់ទិននឹងទង្វើរបស់គ្រូទាយឆបោក លោកបានបញ្ជាឲ្យនាយកដ្ឋានប្រឆាំងបទល្មើសសេដ្ឋកិច្ច ពន្លឿនការប្រមូលព័ត៌មានរបស់គ្រូទាយទូទាំងប្រទេសជាបន្ទាន់ ដើម្បីសម្រួលដល់ការស៊ើបអង្កេត និងត្រួតពិនិត្យ។ គាត់​ជឿ​ថា​ អាកប្បកិរិយា​របស់​គ្រូ​ទាយ​ជាច្រើន​គឺ​ជា​ការ​ក្លែង​បន្លំ ដែលមិន​អាច​មើល​រំលង​បាន​ឡើយ។

ទោះ​យ៉ាង​ណា បញ្ហា​នៅ​ត្រង់​ថា ​មិន​ទាន់​មាន​ជន​រង​គ្រោះ​ណា​បាន​ដាក់​ពាក្យ​បណ្ដឹង​ធ្ងន់ធ្ងរ​នោះ​ទេ។ ប៉ុន្តែក្នុងនាមលោកជាមេប៉ូលិសផ្នែកស៊ើបអង្កេត សូម​លើក​ទឹក​ចិត្ត​ដល់​អ្នក​ដែល​ជឿ​ថា​ត្រូវ​បាន​គេ​ឆបោក មិន​ថា​ដោយ​គ្រូទាយ ឬ​ការ​បរិច្ចាគ​ណាមួយទេ លោកសូមឲ្យជនរងគ្រោះទាំងអស់ ប្រញាប់រាយការណ៍​រឿង​​មក​នាយកដ្ឋាន​ប្រឆាំង​បទល្មើសភ្លាម។

ជាងនេះទៀត លោកក៏បានបញ្ចាក់ជាចុងក្រោយថា ជាឧទាហរណ៍ គ្រូទាយដែលចូលចិត្តទស្សន៍ទាយគ្រោះរញ្ជួយដីក្នុងប្រទេសថៃ ដែលមានមនុស្សជឿងុបងល់ មិនបានពិចារណាឲ្យល្អិតល្អន់ ប៉ុន្តែការទស្សន៍ទាយរបស់ពួកគេគឺមិនត្រឹមត្រូវដូចការសន្យា។ ដូច្នេះសូមអំពាវនាវឲ្យសាធារណជនមានការប្រុងប្រយ័ត្ន និងកុំចាញ់បោក ប្រសិនបើមាននរណាម្នាក់សុំជំនួយ ឬរៃអង្គាសថវិកាសម្រាប់គម្រោងផ្សេងៗ៕

អត្ថបទ៖ សាង ស្រីល័ក្ខ

ចុចអាន៖បក្សភឿថៃ ជឿថា លោក Anutin នឹងមិនរំលាយសភាដូចការសន្យាឡើយ