កាតាប្រាប់​ថា ​អាមេរិកមិន​បាន​ជូន​ដំណឹង​មុនទេ​ ពេល​អ៊ីស្រាអែល​ផ្លោងគ្រាប់​ដាក់​ទីក្រុង​ដូហា

ប្រទេសកាតា បានច្រានចោលការអះអាងរបស់រដ្ឋបាល​​លោក ដូណាល់ ត្រាំ ដែលថាទីក្រុងវ៉ាស៊ីនតោនបានជូនដំណឹងដល់ទីក្រុងដូហាជាមុនអំពីការវាយប្រហារតាមអាកាសរបស់អ៊ីស្រាអែល ដែលកំណត់​គោលដៅ​លើ​អ្នកចរចារបស់ក្រុមហាម៉ាសនៅក្នុងរដ្ឋធានីកាតា ដោយបានសម្លាប់សមាជិកយ៉ាងហោចណាស់​៥​នាក់នៃក្រុមសកម្ម​ប្រយុទ្ធ​ប៉ាឡេស្ទីន។

ការវាយប្រហារ​ដែល​គេ​ជឿថា​មាន​គោលដៅ​ទៅលើ​ឥស្សរជន​ជាន់ខ្ពស់​របស់​ក្រុម​ហាម៉ាសលោក Khalil al-Hayya បានកើត​ឡើង​​នៅ​​​ទីក្រុងដូហា កាលពី​ថ្ងៃ​​ទី​៩ខែ​កញ្ញា។ សមាជិកការិយាល័យនយោបាយរបស់​ហាម៉ាស លោក Suheil al-Hindi បានប្រាប់សារព័ត៌មាន Al Jazeera ថា លោក al-Hayya បានរួចជីវិតពីអ្វីដែល​លោក​ហៅថា «ការប៉ុនប៉ងធ្វើឃាតដោយកំសាកញី» ទោះបីជាសមាជិកថ្នាក់ទាបជាច្រើននាក់ត្រូវបានសម្លាប់ក៏ដោយ។

អ្នកនាំពាក្យសេតវិមានលោកស្រី Karoline Leavitt បាននិយាយថា មន្ត្រីយោធាសហរដ្ឋអាមេរិកបានជូនដំណឹងដល់រដ្ឋបាលកាតា​មុនពេលមានការវាយប្រហារ។ លោកស្រីបានលើក​ឡើង​ថា «ការទម្លាក់គ្រាប់បែកជាឯកតោភាគីនៅខាងក្នុងប្រទេសកាតា ដែលជាប្រទេសអធិបតេយ្យភាព និងជាសម្ព័ន្ធមិត្តជិតស្និទ្ធរបស់សហរដ្ឋអាមេរិក ដែលធ្វើការយ៉ាងស្វិតស្វាញ និងហ៊ានប្រថុយប្រថាន​ជាមួយយើង ដើម្បីសន្តិភាពអន្តរការី មិនបានជួយ​ដល់គោលដៅរបស់អ៊ីស្រាអែល ឬអាមេរិកនោះទេ»។ យ៉ាង​ណាមិញ លោកស្រី​​បាន​បន្ថែមថា ប្រធានាធិបតី ដូណាល់ ត្រាំ នៅ​តែ​ចាត់ទុកការលុបបំបាត់ក្រុមហាម៉ាស«ជាគោលដៅដ៏សក្តិសម»។

ពាក់ព័ន្ធនឹង​បញ្ហា​នេះ អ្នកនាំពាក្យក្រសួងការបរទេសកាតា លោក Majed al-Ansari បានបដិសេធ​ការ​លើក​ឡើង​នេះ ដោយសរសេរនៅលើប្រព័ន្ធផ្សព្វផ្សាយសង្គមថា «សេចក្តីថ្លែងការណ៍ដែលត្រូវបានផ្សព្វផ្សាយអំពីប្រទេសកាតាដែលត្រូវបានជូនដំណឹងអំពីការវាយប្រហារជាមុនគឺមិន​ពិត​ទេ។ ការហៅទូរសព្ទពីមន្ត្រីសហរដ្ឋអាមេរិក បានធ្វើ​ឡើងក្នុងអំឡុងពេល​មាន​សំឡេង​ផ្ទុះដែលបណ្តាលមកពីការវាយប្រហាររបស់អ៊ីស្រាអែលនៅទីក្រុងដូហារួច​ទៅ​ហើយ»។

ការ​វាយ​​ប្រហារ​លើក​នេះ ត្រូវ​គេ​មើល​ឃើញ​ថា​ធ្វើ​ឡើង​ក្រោយ​​​ការព្រមានរបស់លោក ត្រាំ ដែលបានបង្ហោះសារ​នៅលើ​ Truth Social មួយថ្ងៃមុននេះ ដែល​លោក​ជំរុញ​​ឲ្យ​ក្រុម​ហាម៉ាស​ទទួលយកលក្ខខណ្ឌបទឈប់បាញ់ដែលបានព្រមព្រៀងដោយអ៊ីស្រាអែលថា «នេះ​គឺ​ជា​ការ​ព្រមាន​ចុង​ក្រោយ​របស់​ខ្ញុំ ហើយ​នឹង​មិន​មាន​អ្វី​ផ្សេង​ទៀត​ឡើយ»។

ការ​ផ្លោង​គ្រាប់​របស់​អ៊ីស្រាអែល​លើ​កាតា​ដែល​ជា​អ្នក​សម្របសម្រួល​ បានរង​ការថ្កោលទោសយ៉ាងខ្លាំងពីអន្តរជាតិ។ អគ្គលេខាធិការអង្គការសហប្រជាជាតិ លោក Antonio Guterres បានហៅវាថាជាការរំលោភអធិបតេយ្យភាព និងបូរណភាពទឹកដីនៃប្រទេសកាតា។ ប្រធានាធិបតីបារាំង Emmanuel Macron បាននិយាយថា ទង្វើ​នេះគឺ «មិនអាចទទួលយកបានទេ» ហើយបានព្រមានប្រឆាំងនឹងការរីករាលដាលនៃជម្លោះនៅទូទាំងតំបន់។ នាយករដ្ឋមន្ត្រីអ៊ីតាលី លោកស្រី Giorgia Meloni បានបង្ហាញពីសាមគ្គីភាពជាមួយ​ស្ដេច​កាតា Emir Sheikh Tamim bin Hamad Al Thani ដោយបញ្ជាក់សាជាថ្មីអំពីការគាំទ្ររបស់ប្រទេសអ៊ីតាលីសម្រាប់កិច្ចខិតខំប្រឹងប្រែងសម្របសម្រួលរបស់​កាតា។

ទន្ទឹមនឹងនេះ អ៊ីស្រាអែលបានទទូចថា ប្រតិបត្តិការនេះត្រូវបានអនុវត្តដោយឯករាជ្យ។ ការិយាល័យរបស់នាយករដ្ឋមន្ត្រី បេនចាមីន ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍មួយថា «អ៊ីស្រាអែលបានផ្តួចផ្តើមវា អ៊ីស្រាអែលបានអនុវត្តវា ហើយអ៊ីស្រាអែលចេញ​មុខ​រ៉ាប់រង​ទាំងស្រុង»។

ប្រទេសកាតា បានថ្កោលទោសអ៊ីស្រាអែលខ្លាំងៗ ដែលហ៊ានវាយប្រហារទឹកដីរបស់ខ្លួន ដើម្បីកម្ចាត់ក្រុមហ៉ាស ដោយព្រមានថា ខ្លួននឹងមិនអត់ឱនឲ្យឡើយចំពោះទង្វើដ៏គឃ្លើននេះ។ លើសពីនេះ កាតា ថែមទាំងចោទអ៊ីស្រាអែលទៀតផងថា កំពុងធ្វើទង្វើដែលគ្មានទំនួលខុសត្រូវ និងបង្កអសន្តិសុខជាបន្តបន្ទាប់នៅក្នុងតំបន់៕

ដោយ៖ ឈាង

ចុចអាន៖ កាតា ប្រកាសមិនអត់ឱន អ៊ីស្រាអែល ដាច់ខាត ​ខណៈលោក ត្រាំ ថា ខ្លួនមិនពាក់ព័ន្ធការវាយប្រហារនៅ ដូហា ទេ