ទេសចរបរទេសម្នាក់ទៀត ស្លាប់នៅ ថៃ

ទេសចរបរទេសម្នាក់ទៀតហើយ ត្រូវបាត់បង់ជីវិតនៅក្នុងប្រទេសថៃ ដោយលើកនេះគឺជាស្រ្តីជនជាតិចិន ដែលធ្លាក់ពីម៉ូតូទឹក ខណៈជិះកម្សាន្តក្បែរកោះ Lan នៃខេត្ត ឈុនបុរី ទាំងដែលកំពុងមានខ្យល់ព្យុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post នៅថ្ងៃព្រហស្បតិ៍ទី១១ខែកញ្ញាឆ្នាំ២០២៥, ស្រ្តីជនជាតិចិនរូបនេះមានឈ្មោះ Yang Ojong អាយុ២៨ឆ្នាំ ជិះមូតូទឹកជាមួយស្វាមីជាជនជាតិចិនដូចគ្នាឈ្មោះ Ma Xiaoxiao​ អាយុ៣៣ឆ្នាំ។

សពរបស់នាងត្រូវគេរកឃើញនៅចម្ងាយជាង ៣គីឡូម៉ែត្រពីកោះ Nok ទាំងដែលមានពាក់អាវពោងសុវត្ថិភាពនៅជាប់នឹងខ្លួន។ ទោះបីជាយ៉ាងណាក៏ដោយ ប្តីរបស់នាង ត្រូវបានកងម៉ារីនថៃ ជួយសង្គ្រោះបាន។

ប៉ូលិសនៅតែមិនទាន់ដឹងច្បាស់ពីមូលហេតុនៃការស្លាប់របស់ស្រ្តីរូបនេះ ប៉ុន្តែកំពុងធ្វើកោសល្យវិច្ច័យសាកសព និងបើកការស៊ើបអង្កេតជាបន្តទៀត។

ករណីគ្រោះថ្នាក់អ្នកទេសចរចុងក្រោយនេះ ឆ្លុះបញ្ចាំងពីឧបទ្ទវហេតុជាបន្តបន្ទាប់ដែលបណ្តាលឲ្យមានការបាត់បង់ជីវិតនៅក្នុងប្រទេសថៃ។ ម្យ៉ាងវាធ្វើឲ្យគេនឹកឃើញដល់ហេតុការណ៍ដ៏រន្ធត់ដែលកើតលើជនជាតិម៉ាឡេស៊ី២នាក់ ដែលត្រូវជនជាតិថៃ ដុតទាំងរស់នៅកណ្តាលទីក្រុងបាងកក ទោះពួកគេមិនស្លាប់ក៏ដោយ។

កាលពីខែសីហា ទេសចរម៉ាឡេស៊ី២នាក់ជាគូស្នេហ៍នឹងគ្នាឈ្មោះ Gan Xiao Zhen និង Ong Yik Leong ត្រូវបុរសគ្មានការងារធ្វើម្នាក់វាយនិងដុតពួកគេនៅជិតផ្សារទំនើបមួយលើផ្លូវ Ratchadamri ក្នុងទីក្រុងបាងកក ដែលហេតុការណ៍នោះ បានបង្កការភ្ញាក់ផ្អើលទូទាំងពិភពលោក ជាពិសេសនៅតំបន់អាស៊ីុ។

ការវាយប្រហារនោះទៀតសោតគឺជាបញ្ហាប្រឈមដ៏ធំ ចំពោះវិស័យទេសចរណ៍របស់ថៃ ធ្វើឲ្យប្រទេសនេះស្អុយឈ្មោះកាន់តែខ្លាំង និងលាតត្រដាងយ៉ាងច្បាស់ថា ថៃជាប្រទេសគ្មានសន្តិសុខទេចំពោះទេសចរ៕

អត្ថបទ៖ សុខ សុវណ្ណ

ចុចអាន៖ មុខមាត់ថៃកាន់តែអាប់ឱន ក្រោយឪពុកទេសចរម៉ាឡេស៊ី អះអាងថា ថ្លៃសំណង ព្យាបាលកូនរបស់ពួកគេ មិនគ្រាន់