មហាព្យុះទីហ្វុង Ragasa ទៅដល់ចិន បន្ទាប់ពីបំផ្លិចបំផ្លាញកោះតៃវ៉ាន់

មហាព្យុះទីហ្វុង Ragasa បានទៅដល់ប្រទេសចិនហើយ បន្ទាប់ពីបង្កការបំផ្លិចបំផ្លាញយ៉ាងធំធេងនិងបណ្តាលឲ្យមានមនុស្សស្លាប់ចំនួន១៧នាក់ របួស៩០នាក់នៅកោះតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC, ព្យុះសាហាវបំផុតលើលោកប្រចាំឆ្នាំ២០២៥មួយនេះ បានហោះសំដៅទៅប្រទេសចិន ដោយល្បឿនកំពូល ២៥០គីឡូម៉ែត្រក្នុងមួយម៉ោងត្រូវបានកត់ត្រានៅតំបន់ Taishan នៃខេត្ត ក្វាងទុង បង្ខំឲ្យមានការជម្លៀសមនុស្សជិត២លាននាក់ នៅភាគខាងត្បូង។ 

យ៉ាងណា ក្រោយមកវាធ្លាក់កម្លាំងខ្យល់មកនៅត្រឹម១៤៤គីឡូម៉ែត្រក្នុងមួយម៉ោង ពេលវាយប្រហារទីក្រុង Yanjiang នៅរាត្រីថ្ងៃពុធទី២៤ខែកញ្ញាឆ្នាំ២០២៥។

ដោយសារតែឥទ្ធិពលរបស់វា ខេត្តក្វាងទុង បានចេញការព្រមានពណ៌ក្រហម ឲ្យមានពលរដ្ឋមានការប្រុងប្រយ័ត្នខ្ពស់ ជាពិសេសអ្នករស់នៅតាមតំបន់ភ្នំ។

មុនទៅដល់ដីគោកចិន ព្យុះ Ragasa បានបំផ្លិចបំផ្លាញកោះតៃវ៉ាន់ ដោយវាយប្រហារទីក្រុង Guangfu ក្នុងតំបន់ Hualien នៅពេលបឹងមួយ​កន្លែង​បានហូរហៀធ្វើឲ្យទឹក​ចាល់​​ និង​ហូរ​កាត់​ទីប្រជុំជន ​នាំ​មក​នូវ​ភក់ ថ្ម ​​បណ្ដាល​ឲ្យ​អគារ​​នានា​បាក់​រលំ​។

ព្រោះឥទ្ធិពលដ៏កាចសាហាវរបស់ព្យុះ តៃវ៉ាន់ក៏សម្រេចប្រកាសអាសន្នតែម្តង ខណៈប្រជាជនរាប់ពាន់នាក់ត្រូវជម្លៀសខ្លួន។

សូមជម្រាបថា ព្យុះទីហ្វុង Ragasa បានបោកបក់លើកោះតៃវ៉ាន់ចាប់តាំងពីថ្ងៃចន្ទមក ជាមួយកម្លាំងខ្យល់បក់ខ្លាំង និងភ្លៀងធ្លាក់ជញ្ជ្រំ ដោយ​មាន​​បរិមាណទឹកភ្លៀងប្រហែល ៧០​សង់ទីម៉ែត្រ នៅភាគខាងកើត៕

អត្ថបទ៖ សុខ សុវណ្ណ

ចុចអាន៖ ស្លាប់ ១៤នាក់ និង ១២៤​នាក់បាត់ខ្លួន បន្ទាប់ពី​ព្យុះទីហ្វុងនៅ​តៃវ៉ាន់