អគ្គិភ័យយ៉ាងសន្ធោសន្ធៅឆាបឆេះឃ្លាំងមួយក្នុងខេត្ត Rayong ប្រទេសថៃ

យោងតាមការចេញផ្សាយរបស់សារព័ត៌មាន Khaosod នៅថ្ងៃទី០៣ខែ តុលា អគ្គិភ័យយ៉ាងសន្ធោសន្ធៅបានឆាបឆេះឃ្លាំងមួយនៅកណ្តាលទីក្រុង Rayong ប្រទេសថៃ បញ្ចេញផ្សែងខ្មៅយ៉ាងក្រាស់ពាសពេញទីក្រុង និងបង្កឱ្យមានភាពចលាចលក្នុងចំណោមអ្នកស្រុក និងអ្នកដំណើរ។

អគ្គិភ័យ​នេះបាន​កើត​ឡើងកាលពី​វេលា​ម៉ោង​៧​និង​២៥​នាទី​ព្រឹក នៅ​ជិត​ផ្លូវ​បំបែក​សណ្ឋា​គារ Kameo ក្នុង​ឃុំ Noen Phra ស្រុកMueang ខេត្ត Rayong។ សាក្សី​បាន​រាយការណ៍​ថា ផ្សែង​ហុយ​យ៉ាង​ខ្លាំង​ចេញពីឃ្លាំង ខណៈ​ក្រុម​ពន្លត់​អគ្គិភ័យ​មក​ពី​ភ្នាក់ងារ​ជា​ច្រើន​បាន​ប្រញាប់​ទៅ​កន្លែង​កើតហេតុ។ រថយន្ត​ពន្លត់​អគ្គិភ័យ​រាប់សិប​គ្រឿង​ត្រូវ​បាន​ដាក់​ពង្រាយ​ក្នុង​កិច្ច​ខិត​ខំ​ប្រឹង​ប្រែង​ដើម្បី​គ្រប់គ្រង​អណ្តាត​ភ្លើង។

ប៉ូលិសបានបិទផ្លូវជុំវិញដើម្បីការពារសាធារណជន និងអនុញ្ញាតឱ្យក្រុមជួយសង្គ្រោះធ្វើការដោយគ្មានការរារាំង។ មក​ដល់​ពេល​នេះមិន​ទាន់​ដឹងពីមូលហេតុ​នៃ​ការ​ឆេះ ​និងក៏មិន​ទាន់​មាន​របាយការណ៍​ពីអ្នកស្លាប់នៅឡើយ។

គួរបញ្ជាក់ថា អគ្គិភ័យនេះបានកើតឡើងតែមួយថ្ងៃបន្ទាប់ពីមានអគ្គិភ័យបានឆាបឆេះផ្ទះកម្ពស់២ជាន់ នាវេលាម៉ោង២រំលងអធ្រាតឈានចូលថ្ងៃទី២ខែតុលាឆ្នាំ២០២៥ ក្នុងឃុំ Tha Pradu, ស្រុក Mueang ខេត្ត Rayong សម្លាប់មនុស្ស៧នាក់ឯណោះ៕

អត្ថបទ៖ ប៊ុន សុភាព