ថ្នាំ៣មុខ អ្នកជំងឺកូវីដកម្រិតស្រាល ចាំបាច់ត្រូវមានបម្រុងទុកក្នុងផ្ទះកុំខានឲ្យសោះ

វីរុសកូវីដ-១៩ នៅតែបន្តឆ្លងរាលដាលក្នុងសហគមន៍ ពុំទាន់ស្រាកស្រាន្ត។ គ្រប់គ្នាសុទ្ធតែកំពុងប្រឈមហានិភ័យនៃការចម្លងពីមេរោគ សូម្បីតែក្មេងតូចៗមិនថាអាយុតិច ឫច្រើននោះឡើយ។

បច្ចុប្បន្ន យើងគ្រប់គ្នាសុទ្ធសឹងបានប្រុងប្រយ័ត្នហើយ ប៉ុន្តែការថ្លោះធ្លោយនៅតែអាចកើតមាន ដោយមានអ្នកឆ្លងវីរុសកូវីដច្រើនៗឡើង។ ដូច្នេះដើម្បីសម្រួលបន្ទុកមន្ត្រីសុខាភិបាល ព្រមទាំងបង្កភាពងាយស្រួលសម្រាប់អ្នកជំងឺកូវីដ-១៩កម្រិតសា្រល ក្រសួងសុខាភិបាលនៃព្រះរាជាណាចក្រកម្ពុជា​បានអនុញ្ញាតឱ្យអ្នកជំងឺសម្រាកព្យាបាលនៅផ្ទះដោយខ្លួនឯង និងបានណែនាំវិធានការតាមដានរោគសញ្ញានិងកាព្យាបាលមួយចំនួនរួមមាន៖

១. ករណីគ្មានរោគសញ្ញា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រសិនអ្នកជំងឺតេស្តវិជ្ជមានកូវីដ-១៩ ពុំមានរោគសញ្ញាដូចជា គ្មានក្អក កម្ដៅក្រោម ៣៧.៥ អង្សារសេ គ្មានហៀរសំបោរ គ្មានឈឺបំពង់ក ព្រមទាំងមានសភាពទូទៅធម្មតាពួកគេពុំចាំបាច់ប្រើឱសថអ្វីដើម្បីព្យាបាលនោះទេ។

២. ករណីមានរោគសញ្ញា

ករណីដែលអ្នកជំងឺជាមនុស្សពេញវ័យឬកុមារមានទម្ងន់ចាប់ពី ៣០ គីឡូក្រាមឡើងទៅ ហើយមានរោគសញ្ញាដូចជា កម្ដៅលើស ៣៧.៥ អង្សារសេ មានឈឺសាច់ដុំ ឈឺបំពង់ក ពួកគេអាចប្រើថ្នាំប៉ារ៉ាសេតាម៉ុល ៥០០ម.ក្រ ១ថ្ងៃ ៣ ដង។

ចំពោះកុមារទម្ងន់ចាប់ពី ២០-២៩ គីឡូក្រាម ត្រូវប្រើថ្នាំប៉ារ៉ាសេតាម៉ុល ៣០០ម.ក្រ ១ថ្ងៃ ៣ ដង។

ក្នុងករណីបន្ថែមអ្នកជំងឺអាចមានអាការដូចជា តឹងច្រមុះឬហៀរសំបោរ ឬក្អក (មានឬមិនមានស្លេស) ដែលពួកគេជាក្រុមមនុស្សពេញវ័យឬកុមារអាយុរចាប់ពី៦ឆ្នាំឡើងទៅ ត្រូវប្រើថ្នាំ ប្រូម៉ិចស៊ីន (Bromhexine) ៨ ម.ក្រ ១ថ្ងៃ៣ដង ឬថ្នាំ សេទីរីហ្សែន (Cetirizen) ១០ ម.ក្រ ១ថ្ងៃ ១ដង។

៣. ការអនុវត្តវិធានការសុខាភិបាលក្នុងរយៈពេលព្យាបាលនៅតាមផ្ទះ

-ស្នាក់នៅបន្ទប់ដាច់ដោយឡែក មានអនាម័យស្អាត និងមានខ្យល់ចេញចូលល្អ

-ត្រូវពាក់ម៉ាស លាងដៃឱ្យបានញឹកញាប់ជាមួយសាប៊ូនិងទឹក ឬអាល់កុល និងរក្សារគម្លាតយ៉ាងតិច ២ ម៉ែត្រពីសមាជិកដទៃ

-បរិភោគអាហារមានជីជាតិគ្រប់គ្រាន់ (សាច់ បន្លែ ផ្លែឈើ) និងពិសារទឹកឱ្យច្រើន

-តាមដានសុខភាពខ្លួនឯងឱ្យបានញឹកញាប់និងទៀងទាត់ជាប្រចាំ

-ថែរក្សាសុខភាពផ្លូវចិត្ត និងធ្វើលំហាត់ប្រាណឱ្យបានទៀងទាត់

-ហាមជក់បារី ផឹកស្រា ឬគ្រឿងស្រវឹងផ្សេងៗ

-ប្រើប្រាស់សម្ភារ និងបោកគក់ដាច់ដោយឡែកពីសមាជិកគ្រួសារ

-វេចខ្ចប់សំរាមចោលឱ្យបានត្រឹមត្រូវ និងដាច់ដោយឡែក៕

អត្ថបទ៖ សន្យា

ប្រភព៖ ក្រសួងសុខាភិបាល

ចុចអាន៖ កូវីដមិនទាន់ទៅណា! ប្រសិនមានសមាជិក​ក្នុងផ្ទះ​ឆ្លងជំងឺ ត្រូវការពារដោយវិធីទាំងនេះ

ចុចអាន៖ ប្រសិនបើមានលេចចេញនូវរោគសញ្ញាកូវីដ-១៩ ក្រោយពីជាសះស្បើយ