ស្ទើរតែ ១០០ ភាគរយនៃអ្នករស់នៅជាមួយអ្នកជំងឺ កូវីដ ចេញរោគសញ្ញា គ្រុនក្ដៅ ហើយតេស្តវិជ្ជមាន

ការស្ទង់មតិរបស់ប្រទេសជប៉ុនបានរកឃើញថា ៩៧ ភាគរយនៃមនុស្សដែលមានគ្រុនក្តៅ ពេលរស់នៅជាមួយអ្នកជំងឺកូវីដ ១៩ បានធ្វើតេស្តវិជ្ជមានសម្រាប់វីរុសនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យសុខភាពសាធារណៈនៅខេត្ត Ibaraki ជិតទីក្រុងតូក្យូបានធ្វើការស្ទង់មតិនេះកាលពីខែមករា និងរាយការណ៍លទ្ធផលទៅក្រុមអ្នកជំនាញរបស់ក្រសួងសុខាភិបាល ។

ការិយាល័យបានធ្វើការស្ទង់មតិលើមនុស្សចំនួន ១០៧ នាក់ដែលរស់នៅជាមួយនរណាម្នាក់ដែលត្រូវបានបញ្ជាក់ថា បានឆ្លងកូវីដនៅចន្លោះថ្ងៃទី ៤ ដល់ថ្ងៃទី ២២ ខែមករា និងអ្នកដែលកើតរោគសញ្ញាមួយចំនួន ។

ក្នុងចំណោមពួកគេ, ៧៥ នាក់មានគ្រុនក្តៅ ហើយ ៩៧.៣ ភាគរយនៃពួកគេបានធ្វើតេស្តវិជ្ជមានកូវីដ ។ ចំណែក ៣២ នាក់ទៀតមានរោគសញ្ញាផ្សេងទៀតដូចជា ក្អក ហើយ ៦៨.៨ ភាគរយនៃពួកគេបានធ្វើតេស្តវិជ្ជមាន ។

ការិយាល័យសុខភាពសាធារណៈកត់សម្គាល់ថា នៅពេលដែលមនុស្សបែបនេះមានគ្រុនក្តៅ ពួកគេទំនងជាធ្វើតេស្តវិជ្ជមាន ហើយការធ្វើរោគវិនិច្ឆ័យរបស់វេជ្ជបណ្ឌិតប្រហែលជាត្រឹមត្រូវនៅក្នុងករណីភាគច្រើន ។

ទោះបីជាយ៉ាងណាក៏ដោយ ការិយាល័យបានណែនាំដល់អ្នកដែលគ្មានគ្រុនក្តៅក៏ត្រូវធ្វើការធ្វើតេស្តរកកូវីដផងដែរដើម្បីបញ្ជាក់ថា តើពួកគេឆ្លងឬក៏អត់ មុនពេលចាប់ផ្តើមប្រើថ្នាំ ឬបដិសេធមិនចេញទៅក្រៅ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ពិភពលោកចាំបាច់ត្រូវចាក់វ៉ាក់សាំង កូវីដ ដូសទី ៤ ដើម្បីទប់ អូមីក្រុង