សុខភាព

ការសិក្សា៖ ហានិភ័យនៃឈាមកកខ្ពស់ក្នុងរយៈពេល៦ខែ បន្ទាប់ពីឆ្លងកូវីដ

បានផុស

៤ years មុន

នៅ

ថ្ងៃព្រហស្បតិ៍ ៧ មេសា ២០២២

ដោយ

ការសិក្សាមួយបាននិយាយនៅថ្ងៃព្រហស្បតិ៍ ទី៧ ខែមេសានេះថា មនុស្សដែលបានឆ្លងជំងឺកូវីដ-១៩មានហានិភ័យនៃឈាមកកកាន់តែខ្ពស់សម្រាប់រយៈពេលរហូតដល់៦ខែ បន្ទាប់ពីឆ្លង សូម្បីតែអ្នកមានអាការស្រាល។

ការសិក្សាមុនបានបង្ហាញថា ជំងឺកូវីដ-១៩កើនឡើងហានិភ័យនៃឈាមកក ប៉ុន្តែការសិក្សាថ្មីបានចេញផ្សាយនៅក្នុងទិនានុប្បវត្តិវេជ្ជសាស្ត្រ BMJ បង្ហាញពីរយៈពេលដែលការគំរាមកំហែងអាចបន្តមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីស្វែងយល់ជុំវិញករណីនេះ អ្នកស្រាវជ្រាវបានប្រៀបធៀបទិន្នន័យពីមនុស្សជាង១លាននាក់នៅក្នុងការចុះបញ្ជីរបស់ប្រទេសស៊ុយអែតដែលបានឆ្លងកូវីដពីខែកុម្ភៈ ឆ្នាំ២០២០ ដល់ ខែឧសភា ឆ្នាំ២០២១ ជាមួយនឹងក្រុមមនុស្សដែលមិនឆ្លងកូវីដជាង៤លាននាក់។

ពួកគេបានរកឃើញថា អ្នកឆ្លងកូវីដមានហានិភ័យកាន់តែខ្ពស់នៃការស្ទះសរសៃឈាមសួតក្នុងរយៈពេលរហូតដល់៦ខែ បន្ទាប់ពីឆ្លង។ ជាមួយគ្នានេះ ក៏មានការកើនឡើងពីហារនិភ័យនៃការស្ទះសរសៃឈាមវ៉ែន ដែលជាធម្មតាឈាមកកនៅជើងរហូតដល់៣ខែ បន្ទាប់ពីឆ្លងកូវីដ។

បន្ទាប់ពីកែតម្រូវកត្តាជាច្រើន ពួកគេបានរកឃើញការកើនឡើង៣៣ដងនៅក្នុងហានិភ័យនៃការស្ទះសរសៃឈាមសួតសម្រាប់អ្នកដែលបានឆ្លងកូវីដ និងកើនឡើងដល់៥ដងសម្រាប់ការស្ទះសរសៃឈាមវ៉ែន។

ពួកគេបានរកឃើញថា មនុស្សដែលមានអាការជំងឺកូវីដធ្ងន់ធ្ងរជាមួយនឹងជំងឺផ្សេងមុនស្រាប់ផងនោះគឺកាន់តែមានហានិភ័យខ្លាំង។

ប៉ុន្តែសូម្បីតែអ្នកដែលមានអាការស្រាលដែលមិនបានចូលព្យាបាលនៅមន្ទីរពេទ្យក៏មានហានិភ័យនៃការស្ទះសរសៃឈាមសួត និងស្ទះសរសៃឈាមវ៉ែនដែរ។

ឱកាសនៃឈាមកកគឺខ្ពស់អំឡុងពេលជំងឺកូវីដ-១៩រាតត្បាតក្នុងរលកទី១ខ្លាំងជាងដំណាក់កាលបន្តបន្ទាប់ដែលអ្នកស្រាវជ្រាវនិយាយថា ដោយសារគុណសម្បត្តិនៃការចាក់វ៉ាក់សាំង និងវិធីព្យាបាលល្អប្រសើរ។

អ្នកស្រាវជ្រាវបាននិយាយថា ការរកឃើញរបស់ពួកគេមានផលប៉ះពាល់ដល់គោលការណ៍សំខាន់ដែលអំពាវនាវឲ្យមានការព្យាបាលបន្ថែមទៀតដើម្បីការពារឈាមកកពីការវិវត្ត ជាពិសេសក្នុងករណីហានិភ័យខ្ពស់៕

ប្រែសម្រួល៖ វីរបុត្រ
ប្រភព៖ AFP

Related Topics:កូវីដ-១៩