សុខភាព

តែបៃតង ឬកាហ្វេខ្មៅ តើមួយណាល្អសម្រាប់ការសម្រកទម្ងន់?

បានផុស

២ ខែ មុន

នៅ

ថ្ងៃអង្គារ ២៣ កក្កដា ២០២៤

ដោយ

តែបៃតង និងកាហ្វេខ្មៅ វាជាភេសជ្ជៈដ៏ល្អសម្រាប់អ្នកដែលចង់សម្រកទម្ងន់។ ព្រោះវាជួយបង្កើនអត្រារំលាយអាហារ និងពន្លឿនដំណើរការដុតបំផ្លាញជាតិខ្លាញ់ ប៉ុន្តែតើ តែបៃតង ឬកាហ្វេខ្មៅមួយណាល្អជាង?

តែបៃតង និងកាហ្វេខ្មៅ ភេសជ្ជៈទាំងពីរប្រភេទនេះ គឺជាជម្រើសសម្រាប់សុខភាព។ នេះគឺដោយសារតែពួកគេមានកាឡូរីតិច និងសារធាតុចិញ្ចឹមច្រើនដែលមានប្រយោជន៍ចំពោះសុខភាពរបស់អ្នក។ ការសិក្សាជាច្រើនបានបង្ហាញថា ភេសជ្ជៈទាំងនេះបង្កើនការរំលាយអាហារ និងពន្លឿនដំណើរការដុតបំផ្លាញជាតិខ្លាញ់លើសពីនេះទៀត ភេសជ្ជៈក្តៅៗទាំងនេះមានគុណសម្បត្តិផ្សេងទៀត ដែលលើកកម្ពស់សុខភាពផងដែរ។

តែបៃតងមានផ្ទុកជាតិកាហ្វេអ៊ីន និងប្រភេទ flavonoid ហៅថា catechin ហើយ Catechin គឺជាប្រភេទសារធាតុប្រឆាំងអុកស៊ីតកម្ម។ ការសិក្សាស្រាវជ្រាវបង្ហាញថា សមាសធាតុទាំងនេះអាចជួយបង្កើនល្បឿននៃការរំលាយអាហារ ខណៈពេលដែល catechins ត្រូវបានគេដឹងថាអាចបំបែកជាតិខ្លាញ់លើសនៅក្នុងខ្លួនប្រកបដោយប្រសិទ្ធភាព។

តែបៃតងអាចមានឥទ្ធិពលវិជ្ជមានទៅលើអ្នកដែលចង់សម្រកទម្ងន់ និងរក្សាទម្ងន់របស់ពួកគេឲ្យស្ថិតក្រោមការគ្រប់គ្រង។ តែបៃតងត្រូវបានចាត់ទុកថាមានសុវត្ថិភាពក្នុងការទទួលទាន។ ប៉ុន្តែអ្នកមិនគួរផឹកលើសពី ២-៣ ពែងក្នុងមួយថ្ងៃនោះទេ វាជាការពិតដែលថាតែបៃតងមានសុវត្ថិភាព និងមានសុខភាពល្អ។ ប៉ុន្តែវាមានជាតិកាហ្វេអ៊ីនខ្លះ។ ដូច្នេះហើយ ការទទួលទានជាតិកាហ្វេអ៊ីនច្រើនពេកក្នុងមួយថ្ងៃ អាចបណ្តាលឲ្យមានបញ្ហានៃការគេង និងអាចមានគ្រោះថ្នាក់សម្រាប់អ្នកដែលមានបញ្ហាបេះដូង។ តែបៃតងមិនត្រឹមតែល្អសម្រាប់អ្នកដែលចង់សម្រកទម្ងន់ប៉ុណ្ណោះទេ។ ប៉ុន្តែវាក៏ល្អសម្រាប់សុខភាពផងដែរ។ តែមានផ្ទុកនូវវីតាមីន B, folate, magnesium និង flavonoids វាមានអត្ថប្រយោជន៍សុខភាពជាច្រើនដូចជា កាត់បន្ថយកូឡេស្តេរ៉ុល បង្កើនប្រសិទ្ធភាពបេះដូង កាត់បន្ថយហានិភ័យនៃជំងឺ Alzheimer និងគ្រប់គ្រងជំងឺទឹកនោមផ្អែមប្រភេទទី២។

ដោយឡែក កាហ្វេគឺជាភេសជ្ជៈដ៏ពេញនិយមមួយទៀតដែលមនុស្សភាគច្រើនផឹកនៅពេលចង់សម្រកទម្ងន់។ ដូចគ្នានឹងតែបៃតង កាហ្វេមានអត្ថប្រយោជន៍សុខភាពជាច្រើន រួមទាំងជួយឲ្យអ្នកមានអារម្មណ៍ប្រុងប្រយ័ត្ន និងកាត់បន្ថយហានិភ័យនៃជំងឺទឹកនោមផ្អែមប្រភេទទី២ ។ មនុស្សភាគច្រើនចូលចិត្តផឹកកាហ្វេខ្មៅដើម្បីសម្រកទម្ងន់។ ការផឹកកាហ្វេខ្មៅច្រើនពេកអាចជះឥទ្ធិពលអវិជ្ជមានដល់សុខភាពរបស់អ្នក។

កាហ្វេខ្មៅមានផ្ទុកជាតិកាហ្វេអ៊ីនដែលបង្កើនអត្រារំលាយអាហារ និងបង្កើនកម្រិតថាមពលក្នុងរាងកាយ។ ការរំលាយអាហារខ្ពស់ទប់ស្កាត់ភាពអត់ឃ្លាន និងការពារអ្នកពីការញ៉ាំអាហារមិនល្អ។ ការសិក្សាជាច្រើនបង្ហាញថា កាហ្វេអាចបង្កើនអត្រាមេតាបូលីសរបស់អ្នកពី ៣ ទៅ ១១ ភាគរយ កាហ្វេខ្មៅសម្បូរទៅដោយសារធាតុចិញ្ចឹម និងសារធាតុប្រឆាំងអុកស៊ីតកម្ម និងមានវីតាមីន B2 B3 B5 ម៉ង់ហ្គាណែស ប៉ូតាស្យូម និងម៉ាញ៉េស្យូម។ ការផឹកកាហ្វេខ្មៅជាប្រចាំអាចជួយបង្កើនការចងចាំ និងបង្កើនប្រសិទ្ធភាពនៃការហាត់ប្រាណ។ ប៉ុន្តែការផឹកកាហ្វេខ្មៅច្រើនពេកអាចបង្កគ្រោះថ្នាក់ដល់សុខភាពរបស់អ្នក។

យ៉ាងណា ក៏មានភស្តុតាងជាច្រើនដែលបង្ហាញថា ភេសជ្ជៈទាំងពីរអាចមានប្រសិទ្ធភាពសម្រាប់ការសម្រកទម្ងន់។ ទោះបីជាវាមិនមានភាពខុសគ្នាច្រើនក៏ដោយ។ ប៉ុន្តែនៅពេលនិយាយអំពីសុខភាពទូទៅ តែបៃតងមានប្រយោជន៍ជាងកាហ្វេខ្មៅ។ តែបៃតងសម្បូរទៅដោយសារធាតុប្រឆាំងអុកស៊ីតកម្ម និងមានអត្ថប្រយោជន៍ជាច្រើនចំពោះសុខភាព។

ចងចាំថាកុំញ៉ាំច្រើនពេក។ សូម្បីតែរបស់ដែលមានសុខភាពល្អក៏គួរតែទទួលទានក្នុងកម្រិតមធ្យមដែរ លើសពីនេះការសម្រកទម្ងន់ត្រូវបានសម្រេចដោយការញ៉ាំអាហារដែលមានសុខភាពល្អ និងធ្វើលំហាត់ប្រាណឲ្យបានខ្លាំងក្លា។ អ្នកមិនអាចសម្រកទម្ងន់ដោយការផឹកតែបៃតង ឬកាហ្វេខ្មៅតែឯងបានទេ។ អ្នកនឹងត្រូវផ្លាស់ប្តូររបៀបរស់នៅរបស់អ្នកផងដែរ៕