មន្ត្រីសុខាភិបាល ណែនាំឱ្យមានការអប់រំផ្សព្វផ្សាយបានទូលំទូលាយពីបញ្ហាប្រឈមនៃជំងឺមាត់ធ្មេញ

ទន្តបណ្ឌិត អឿន បូរារ័ត្នន៍ រដ្ឋលេខាធិការក្រសួងសុខាភិបាល បានណែនាំឱ្យមន្ត្រីសុខាភិបាល និងភាគីពាក់ព័ន្ធ រៀបចំផែនការអភិវឌ្ឍន៍ការងារអប់រំផ្សព្វផ្សាយឱ្យបានទូលំទូលាយ តាមមូលដ្ឋានសុខាភិបាលសាធារណៈ សាលារៀន និងសហគមន៍ផ្សេងៗ ដើម្បីបញ្រ្ជាបការយល់ដឹងពីបញ្ហាប្រឈមនឹងជំងឺមាត់-ធ្មេញ។ នេះបើតាមការផ្សាយរបស់ទំព័រហ្វេសប៊ុករបស់ក្រសួងសុខាភិបាល នៅល្ងាចថ្ងៃទី១៣ ខែតុលា ឆ្នាំ២០២៤។

ការលើកឡើងនេះ ធ្វើឡើងស្របពេលដែល លោកទន្តបណ្ឌិត អឿន បូរារ័ត្នន៍ ចុះពិនិត្យជាក់ស្តែងលើស្ថានភាពទូទៅក្នុងផ្នែកព្យាបាលមាត់-ធ្មេញ របស់មន្ទីរពេទ្យ និងឆ្លៀតឱកាសសំណេះសំណាលសាកសួរសុខទុក្ខ ដល់ថ្នាក់ដឹកនាំការិយាល័យសុខាភិបាលស្រុកប្រតិបត្តិ ថ្នាក់ដឹកនាំមន្ទីរពេទ្យ និងមន្ត្រីផ្នែកសុខភាពមាត់-ធ្មេញ និងប្រជុំពិភាក្សាបូកសរុបលទ្ធផលជាមួយ ថ្នាក់ដឹកនាំមន្ទីរសុខាភិបាល នៃរដ្ឋបាលខេត្ត ប្រធានក្រុមប្រឹក្សាគណៈទន្តពេទ្យខេត្ត ប្រធានក្រុមប្រឹក្សាគណៈគិលានុបដ្ឋាកខេត្ត មន្ត្រីបង្គោលសុខភាពមាត់-ធ្មេញ ព្រមទាំងមន្រ្តីសុខាភិបាលពាក់ព័ន្ធចំនួន៤ខេត្តផងដែរ។ ជាមួយគ្នានេះ ក្រៅពីណែនាំឱ្យមានការរៀបចំផែនការអភិវឌ្ឃន៍ផ្សព្វផ្សាយឱ្យបានទូលំទូលាយពីបញ្ហាប្រឈមនៃជំងឺមាត់ធ្មេញ រដ្ឋលេខាធិការ ក៏បានណែនាំអនុសាសន៍គន្លឹះសំខាន់ៗផ្សេងទៀតដូចគ្នា។

លោកទន្តបណ្ឌិត អឿន បូរារ័ត្នន៍ បានណែនាំឱ្យមានការរៀបចំផែនការអភិវឌ្ឍន៍ការងារផ្តល់សេវា រួមមានផែនការរៀបចំកែលម្អផ្នែកសុខភាពមាត់-ធ្មេញ រៀបចំរចនាសម្ព័ន្ធបុគ្គលិក និងរៀបចំផែនការនៃតម្រូវការឧបករណ៍ សម្ភារៈ បរិក្ខារ និងឱសថសារវន្ដ ដែលមានតម្រូវការចាំបាច់ជាអាទិភាព។ បន្ថែមពីនេះ ណែនាំឱ្យពង្រឹងការងារកត់ត្រាទិន្នន័យអ្នកជំងឺ និងបញ្ចូលទៅក្នុងប្រព័ន្ធព័ត៌មានសុខាភិបាលឱ្យបានត្រឹមត្រូវ និងទាន់ពេលវេលា។ ព្រមទាំងស្នើឱ្យគណៈទន្តពេទ្យ និងគណៈគិលានុបដ្ឋាក រៀបចំផែនការអនុវត្តរបស់ខ្លួនឱ្យបានគ្រប់ជ្រុងជ្រោយ និងត្រូវធ្វើការត្រួតពិនិត្យ តាមដាន និងវាយតម្លៃជាប្រចាំ នូវគុណវឌ្ឍិរបស់អ្នកប្រកបវិជ្ជាជីវៈរបស់ខ្លួន ដើម្បីផ្តល់សេវាជូនអ្នកជំងឺ ប្រកបដោយគុណភាព និងប្រសិទ្ធភាពខ្ពស់។ លើសពីនេះ លោករដ្ឋលេខាធិការ ក៏ស្នើសូមឱ្យសមត្ថកិច្ចពាក់ព័ន្ធការងារគ្រប់គ្រងសេវាឯកជន រួមមានមន្ទីរសុខាភិបាល នៃរដ្ឋបាលខេត្ត និងការិយាល័យសុខាភិបាលស្រុកប្រតិបត្តិ បន្តចុះពង្រឹងត្រួតពិនិត្យ នៅតាមទីតាំងផ្តល់សេវាពិគ្រោះព្យាបាល និងថែទាំជំងឺមាត់-ធ្មេញ ឯកជនឱ្យបានហ្មត់ចត់ មុនផ្តល់លិខិតអនុញ្ញាតជូនទៅអតិថិជន ដើម្បីធានាសុវត្ថិភាពខ្ពស់ជូនប្រជាពលរដ្ឋផងដែរ។

សូមជម្រាបថា ចាប់ពីថ្ងៃទី០៩ ដល់ថ្ងៃទី១២ ខែតុលា ឆ្នាំ២០២៤ ដោយទទួលបានការណែនាំពី រដ្ឋមន្រ្តីក្រសួងសុខាភិបាល ដឹកនាំដោយ ទន្តបណ្ឌិត អឿន បូរារ័ត្នន៍ អមដំណើរដោយ លោកវេជ្ជបណ្ឌិត ភូ លាង អគ្គនាយករងបច្ចេកទេសសុខាភិបាល រួមទាំងក្រុមការងារ ចុះពិនិត្យវឌ្ឍនភាពការងារលើកកម្ពស់ការផ្តល់សេវាសុខភាពមាត់-ធ្មេញ ចំនួន០៤មន្ទីរពេទ្យ រួមមាន មន្ទីរពេទ្យបង្អែកព្រៃកប្បាស មន្ទីរពេទ្យបង្អែកខេត្តតាកែវ នៃមន្ទីរសុខាភិបាលខេត្តតាកែវ និងមន្ទីរពេទ្យបង្អែកអង្គរជ័យ មន្ទីរពេទ្យបង្អែកខេត្តកំពត នៃមន្ទីរសុខាភិបាលខេត្តកំពត៕