មន្ត្រីសុខាភិបាល ណែនាំឱ្យមន្ទីរពេទ្យបង្អែកកម្រិត៣ពង្រឹងផ្នែកសង្គ្រោះបន្ទាន់ សង្គ្រោះកម្រិតធ្ងន់ ផ្នែកវះកាត់ ឱ្យកាន់តែមានគុណភាព

លោកវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល និងជាប្រធានក្រុមការងារបច្ចេកទេសសុខភាពបឋមមន្ទីរពេទ្យបង្អែកកម្រិត៣ បានណែនាំដល់ថ្នាក់ដឹកនាំមន្ទីរពេទ្យបង្អែកកម្រិត៣ សម្រាប់ជុំទី៣ ត្រូវយកចិត្តទុកដាក់ពិនិត្យពង្រឹងសមត្ថភាពផ្នែកសង្គ្រោះបន្ទាន់ ផ្នែកសង្គ្រោះកម្រិតធ្ងន់ ផ្នែកវះកាត់ និងផ្នែកអមវេជ្ជសាស្រ្ត ដែលផ្នែកទាំង៤នេះ ជាចំណុចសំខាន់ដែលថ្នាក់ដឹកនាំចុះពង្រឹងមន្ទីរពេទ្យត្រូវតែយកចិត្តទុកដាក់ពិនិត្យធ្វើការកែលម្អ និងណែនាំទៅតាមការជាក់ស្ដែងក្នុងគោលបំណងធ្វើឱ្យផ្នែកទាំង៤នេះផ្ដល់សេវាប្រកបដោយគុណភាព សុវត្ថិភាពនិងមានការកែប្រែនៅរបៀបរបបដែលមិនទាន់សមស្រប។

លោកណែនាំបែបនេះ នៅថ្ងៃទី១ ខែវិច្ឆិកា ឆ្នាំ២០២៤ ក្នុងឱកាសដឹកនាំកិច្ចប្រជុំក្រុមការងារបច្ចេកទេសសុខភាពបឋមមន្ទីរពេទ្យបង្អែកកម្រិត៣។ ក្រៅពីការណែនាំខាងលើ លោកក៏បានណែនាំពីចំណុចសំខាន់ៗដល់ថ្នាក់ដឹកនាំដែលចុះគាំទ្រពង្រឹងមន្ទីរពេទ្យបង្អែកកម្រិត៣ សម្រាប់ជុំទី៣ដូចជា ពិនិត្យទៅលើការរៀបចំកែលម្អទីធ្លា សោភណភាពអនាម័យ និងហេដ្ឋារចនាសម្ព័ន្ធរបស់មន្ទីរពេទ្យ និងឯកសណ្ឋានរបស់បុគ្គលិកឱ្យបានសមរម្យ និងមានភាពល្អប្រសើរជាងពេលកន្លងមក។ បន្ថែមពីនេះ ក៏ត្រូវពិនិត្យទៅលើដំណើរការនៃការផ្ដល់សេវារបស់មន្ទីរពេទ្យ និងជួយណែនាំរៀបចំលំហូរអ្នកជំងឺមកទទួលសេវាជាពិសេសផ្នែកពិគ្រោះជំងឺក្រៅ ផ្នែកចុះឈ្មោះ និងកន្លែងបញ្ជរបង់ប្រាក់។

លោកវេជ្ជបណ្ឌិត ណែនាំឱ្យថ្នាក់ដឹកនាំត្រូវពិនិត្យមើលឯកសារព្យាបាលអ្នកជំងឺ ឯកសាររដ្ឋបាល ឯកសារគតិយុត្តផ្សេងៗរបស់មន្ទីរពេទ្យ។ ជាមួយគ្នានេះ ក៏ពិនិត្យណែនាំការប្រើប្រាស់ថវិកាក្នុងការអភិវឌ្ឍន៍មន្ទីរពេទ្យប្រកបដោយតម្លាភាព និងមានប្រសិទ្ធភាពផងដែរ។

សូមជម្រាបថា កិច្ចប្រជុំខាងលើ មានគោលបំណងរៀបចំឡើងដើម្បី ១.ពិនិត្យរបាយការណ៍លទ្ធផលការងាររបស់ថ្នាក់ដឹកនាំដែលបានចុះអភិបាលគាំទ្រពង្រឹងមន្ទីរពេទ្យបង្អែកកម្រិត៣ក្នុងជុំទី២ កន្លងមក។ ទី២ រៀបចំផែនការសកម្មភាពសម្រាប់ជុំទី៣ ដែលនឹងត្រូវចុះអភិបាលគាំទ្រ ចាប់ពីខែធ្នូ ឆ្នាំ២០២៤ ដល់ខែមីនា ឆ្នាំ២០២៥ និងទី៣ ពិភាក្សាពីការអនុវត្ត និងគម្រូនៃការចុះទៅពិនិត្យ៕