តើស្ត្រីមានផ្ទៃពោះ គួរធ្វើដំណើរផ្លូវឆ្ងាយដែរ ឬទេ?

តាមប្រភពពីមន្ទីរពេទ្យកាល់ម៉ែត អំឡុងពេលមានផ្ទៃពោះ មិនមែនជាពេលវេលាដ៏ល្អសម្រាប់ស្រ្តីធ្វើដំណើរឆ្ងាយឡើយ។ ស្ត្រីមានផ្ទៃពោះ គួរជៀសវាងការធ្វើដំណើរផ្លូវឆ្ងាយ ដែលអាចបង្កគ្រោះថ្នាក់ផ្សេងៗនៅអំឡុងពេលធ្វើដំណើរ ឬនៅតំបន់ដែលគ្មានមន្ទីរពេទ្យ។

ប្រភពដដែល បានបញ្ជាក់ថា ការធ្វើដំណើរផ្លូវឆ្ងាយ ត្រូវហាមឃាត់ចំពោះស្ត្រីមានផ្ទៃពោះ នៅពេលដែលស្ត្រីមានផ្ទៃពោះកូនភ្លោះ ប្រវត្តិរលូតកូន មានរោគសញ្ញាគម្រាមកើតមិនគ្រប់ខែ ជំងឺលើសឈាម និងជំងឺទឹកនោមផ្អែម។ កន្លែងដែលស្ត្រីមានផ្ទៃពោះមិនគួរធ្វើដំណើរទៅ គឺក្នុងតំបន់ពុំមានកន្លែងសម្រាកពេទ្យ តំបន់ដែលមានជំងឺគ្រុនចាញ់ ជំងឺហ្ស៊ីកា គ្រុនឈាម និងជំងឺឆ្លង។

ដោយឡែក ក្នុងពេលធ្វើដំណើរស្ត្រីមានផ្ទៃពោះ ត្រូវយកទៅជាមួយនូវប្រដាប់ស្ទង់កម្តៅ ថ្នាំ Paracétamol និងប្រដាប់វាស់ឈាម។ ក្នុងករណីចាំបាច់ត្រូវធ្វើដំណើរតាមយន្តហោះ ស្ត្រីអាចធ្វើដំណើរតាមយន្តហោះ (ចំពោះការហោះហើររយៈពេលខ្លី) បានរហូតកូនក្នុងផ្ទៃអាយុ ៧ខែ ឬ ៨ខែ ដោយមានសំបុត្រពេទ្យបញ្ជាក់ពីការប៉ាន់ស្មានថ្ងៃសម្រាល។ ការធ្វើដំណើរតាមយន្តហោះត្រូវហាមឃាត់ក្នុងរយៈពេលខែចុងក្រោយ និង៧ថ្ងៃ ក្រោយសម្រាល។

ប្រសិនបើមានបញ្ហាកើតឡើង បន្ទាប់ពីការធ្វើដំណើរ សូមប្រញាប់មកជួបជាមួយវេជ្ជបណ្ឌិតជំនាញ ដើម្បីធ្វើការពិគ្រោះ និងពិនិត្យឱ្យបានច្បាស់លាស់ ជៀសវាងគ្រោះថ្នាក់ផ្សេងៗដែលកើតឡើងចំពោះម្តាយ និងកូននៅក្នុងផ្ទៃ៕

ប្រភព៖ មន្ទីរពេទ្យកាល់ម៉ែត