៦ ក្បាច់ ជួយបង្កើនកម្លាំងក្នុងខ្លួន អត់​ខ្ចី​ផឹក​ភេសជ្ជៈ​ប៉ូវ​កម្លាំង​នាំខូច​សុខភាព

ព្រឹកឡើងៗ ធ្លាប់​មាន​អារម្មណ៍ខ្សោះៗ អត់​កម្លាំង​ អត់​ស្រឡះ​ក្នុង​ខ្លួន ដែរអត់? ការ​ពិត វា​អាច​មក​ពី​នឿយ​ហត់​អស់​កម្លាំង​កាល​ពី​ក្បាល​ល្ងាច ឬ​ក៏​គិត​ច្រើន​ស្ត្រេស​ច្រើន។ អត្ថបទនេះនឹង​ប្រាប់វិធីសាស្ត្រ ៦ យ៉ាង អាចជួយឲ្យមានកម្លាំងភ្លាមៗតែម្តង។

១- ទាញថាមពលចេញពីខ្លួន

ត្រូវសាកល្បងវិធីបង្កើនថាមពល ក្រោយភ្ញាក់ ដោយឈរនៅមាត់ទ្វារ សម្លឹងទៅមុខ ហើយឈរចំទើតចុងជើង ព្យាយាមប៉ះឲ្យដល់គែមទ្វារ ពើងទ្រូងទៅមុខរហូតទាល់តែមានអារម្មណ៍ចង្កេះ និងខ្នងយឺតត្រង់ ព្យាយាមឈរទប់ ៣០ វិនាទី ជាការស្រេច។ វាអាចបន្ថយភាពតានតឹងប្រព័ន្ធរំញោចសរសៃប្រសាទផ្លូវចិត្ត ធ្វើឲ្យអារម្មណ៍ឆេវឆាវបានធូរស្បើយ។

២- សម្រាកមួយភ្លែតៗឲ្យបានច្រើនដង

វាអាចផ្តល់ប្រយោជន៍កាន់តែច្រើន និងចៀសផុតពីភាពអស់កម្លាំងល្ហិតល្ហៃ។ ការស្រាវជ្រាវរបស់សាកលវិទ្យាល័យរដ្ឋ Louisiana (អាមេរិក) អះអាងថា បុគ្គលិកដែលមានម៉ោងសម្រាកខ្លីៗច្រើនដង អាចបំពេញការងារបានច្រើន និងលឿន មិនសូវមានកំហុស ជាងសម្រាករយៈពេលវែង ម្តង ឬពីរដង ក្នុងមួយថ្ងៃ។ ឯការស្រាវជ្រាវរបស់​សាកលវិទ្យាល័យ Princeton (អាមេរិក) រកឃើញថា ការស្ងាបជួយរាងកាយ​សម្រួលខួរក្បាល ដាស់ខួរក្បាលវិលមកសភាពធម្មតាវិញ។

៣- ស្រូបក្លិនធ្វើឲ្យអារម្មណ៍ស្ងប់ស្រួល

ពេលមានអារម្មណ៍អស់កម្លាំង គួរស្រូបយកក្លិនក្រអូបខ្លះៗ អាចជួយបង្កើនសមត្ថភាពប្រមូលផ្តុំ និងធ្វើឲ្យយើងអារម្មណ៍ល្អ ក្នុងនោះមានក្លិនក្រូចឆ្មារ ក្រូចធម្មតា ពិសេសក្រូចថ្លុង។ បើយើងមួម៉ៅនឹងអ្វីមួយ អាចយកស្លឹកជីរអង្កាមមកហិត ឬផឹកតែជីរអង្កាមមួយកែវអាចផ្តល់កម្លាំងប្រាជ្ញាភ្លាម។

៤- ធ្វើចលនា

ក្រោកដើរទៅនេះបន្តិច ទៅនោះបន្តិច គ្នាយើងនឹងមានអារម្មណ៍ស្រឡះខ្លួន គ្រាន់តែចំណាយពេលដើរ ២-៣ នាទី អាចជួយយើងបង្កើនថាមពលមិនចំណាយពេលអត់ប្រយោជន៍ច្រើនលើការងារប្រចាំថ្ងៃ។ បើអាចទៅរួច គួរទៅលុបមុខនៅបន្ទប់ទឹក បន្ទាប់មកដើរចេញទៅក្រៅ ដកដង្ហើមស្រូបយកខ្យល់បរិសុទ្ធវែងៗ។ ការដើរ ១០ នាទី ល្អសម្រាប់ចរន្តឈាម ជួយឲ្យយើងស្រស់ស្រាយ សម្រេចការងារដោយប្រសិទ្ធភាព។

៥- ធ្វើសមាធិ

ចំណាយពេលហោចណាស់ ៥ នាទី រាល់ព្រឹក ផ្តោតសំខាន់លើការដកដង្ហើម មិនថាការទ្រេតខ្លួន ឬអង្គុយទេ។ ការសមាធិ អាចជួយយើងបន្ធូរបន្ថយសម្ពាធ និងប្រឆាំងភាពអស់កម្លាំង។ ពេលធ្វើសមាធិ អាចយល់ច្បាស់ពីដង្ហើមយើង។ អ្វីៗកន្លងផុតត្រូវរលាយបាត់ កាន់តែធ្វើឲ្យសុខភាពផ្លូវចិត្តល្អជាងមុន នាំឲ្យដំណើរការងាររលូន មិនមានអារម្មណ៍អស់កម្លាំង។

៦- ផឹកទឹកគ្រប់គ្រាន់

គ្មានអ្វីគួរឲ្យភ្ញាក់ផ្អើលទេ កត្តារួមធ្វើឲ្យយើងឆាប់ហត់ គឺព្រោះខ្សោះជាតិទឹក។ រាល់ថ្ងៃ បើយើងផឹកទឹកតិច អុកស៊ីហ្សែន​រត់ក្នុងសរសៃឈាមក៏តិចដែរ។ ផឹកទឹកស្អាតឲ្យបាន ៨ កែវក្នុងមួយថ្ងៃ ឬផឹកទឹករ៉ែមួយកែវ គ្រប់ពេលមានអារម្មណ៍អស់កម្លាំង៕

អត្ថបទផ្ដល់សិទ្ធិ៖​ Hello គ្រូពេទ្យ

ចុចអាន៖ គេងបានច្រើនម៉ោងដែរ តែនៅស្ងាបរហូត មកពីអ្វីទៅ? ផឹកកាហ្វេ ឬភេសជ្ជៈផ្អែមៗល្អអត់?

ចុចអាន៖ តិចនិក ​៥ ​យ៉ាងដោះស្រាយ​បញ្ហា​ឈឺខ្នង ឈឺភ្នែក ពេលធ្វើការយូរម៉ោងជាមួយ​កុំព្យូទ័រ