Facebook និង TikTok មួយ​ណា​ល្អ​បំផុត​សម្រាប់​ផ្សាយ​ផលិតផល ឬសេវាកម្ម?

យុទ្ធសាស្ត្រ​ផ្សព្វផ្សាយផលិតផល ឬសេវាកម្ម ​តាម​បណ្ដាញ​សង្គម​សម្រាប់​អាជីវកម្ម​កំពុង​ពេញនិយមនៅកម្ពុជា ​ហើយ​ក្នុង​នោះ Facebook និង TikTok ជាកន្លែងមាន​មនុស្ស​ប្រើប្រាស់​ច្រើន​ជាងគេនាពេលបច្ចុប្បន្ន។

ខណៈបណ្ដាញទាំងពីរ កំពុងប្រដំប្រសងគ្នា ចម្ងល់នោះគឺ​ថា រវាង​បណ្ដាញ​ទាំង ២នេះ តើ​មួយ​ណា​នឹងមាន​ប្រសិទ្ធភាព​ផ្សព្វផ្សាយ​ទៅ​កាន់​អតិថិជន​គោលដៅ​បានល្អជាង?​ ដូច្នេះ ដើម្បីស្រាយចម្ងល់ មក​ពិចារណា​ទិន្នន័យ​ខាងក្រោមនេះសិន!

ចំពោះបណ្ដាញសង្គមយក្ស Facebook មនុស្ស​ប្រើ​ដើម្បី​ភ្ជាប់​ទំនាក់ទំនង​ជាមួយ​មិត្តភក្ដិ ​និង​ក្រុម​គ្រួសារ និងត្រូវបានប្រើប្រាស់ច្រើនផងដែរសម្រាប់អាជីវកម្ម ក៏ដូចជាផ្សាយពាណិជ្ជកម្មនានា។ ក្រៅពី​ប្រើ Facebook ដើម្បី​ចែករំលែក​រូបថត វីដេអូ និង​ព័ត៌មាន​ថ្មីៗពី​ជីវិត​ផ្ទាល់ខ្លួន គេក៏ប្រើវាដើម្បីផ្សព្វផ្សាយព័ត៌មានយ៉ាងទូលំទូលាយ។ បើ​និយាយ​ពី​ការ​ចូលរួមពីអតិថិជនគោលដៅ​ក្នុង​រយៈយូរ Facebook គឺ​ជា​ជម្រើស​ដ៏​ប្រសើរ ព្រោះ​ថា​វា​ទាក់ទាញ​អ្នក​ប្រើ​ម្នាក់​ចូល​មើល ៨ ដង​ក្នុង​មួយ​ថ្ងៃ ហើយ​អត្រា​ចុច Like ឬ Comment និង Share ​មាន​ខ្ពស់​ដល់​ទៅ ៧០% នៃ​អ្នក​ប្រើ​សរុប។

ដោយឡែក TikTok ត្រូវ​បាន​គេ​ប្រើ​ដើម្បី​ចែករំលែក​​វីដេអូខ្លីៗ និងត្រូវមនុស្សសឹងពេញពិភពលោក ងាកទៅប្រើយ៉ាងភ្លូកទឹកភ្លូកដី រហូតវ៉ាដាច់វេទិកាចាស់ៗដូចជា Twitter, LinkedIn និង Snapchat។ល។ យោងតាមទិន្នន័យឆ្នាំ ២០២១ នៅសហរដ្ឋអាមេរិក ក្នុង១នាទី មានអ្នក​ប្រើប្រាស់ ៦៨នាក់ បានចូល​ឆែក​មើល TikTok។ ដូច្នេះបើ​ប្រៀបធៀប​ជាមួយ Facebook ការប្រើប្រាស់ TikTok ដើម្បីផ្សព្វផ្សាយ ហាក់មាន​ប្រសិទ្ធភាព​ខ្ពស់​ជាង​ក្នុង​ការ​ទាក់ទាញ​អតិថិជន​ឲ្យ​ចូលរួម​ជាមួយផលិតផល ឬសេវាកម្មរបស់អ្នក។

ការផ្សាយពាណិជ្ជកម្មនៅលើ Facebook ជាយុទ្ធសាស្ត្រ​ជួប​ជាមួយ​អតិថិជន​ក្នុង​រយៈ​ពេល​យូរ តែបានទៅដល់មនុស្សយឺត និងតិចជាង TikTok។ ចំណែក TikTok ជា​កន្លែង​ទាក់ទាញ​អតិថិជន​បាន​ចំនួន​ច្រើន និងរហ័ស។

ទោះយ៉ាងណា ​អ្នកគួរតែ​សាកល្បង​ផ្សព្វផ្សាយ​ពាណិជ្ជកម្ម​ទាំង​លើ Facebook និង TikTok ព្រោះអតិថិជនគោលដៅអាចមានចំណូលចិត្តផ្សេងគ្នា អាស្រ័យតាមផលិតផល ឬសេវាកម្មរបស់អ្នកដែរ៕

ប្រែសម្រួល៖ សន្យា

ចុចអាន៖ តើវេទិកាប្រព័ន្ធផ្សព្វផ្សាយសង្គមមួយណា គួរប្រើនាបច្ចុប្បន្ននេះ ?

ចុចអាន៖ ងាយៗសម្រាប់អ្នកលក់អនឡាញថ្មីថ្មោង មិនចាំបាច់ចាយប្រាក់ Boost ក៏លក់ដាច់