TikTok បញ្ជាក់ការវិនិយោគទំហំជាង ៨ ប៊ីលានដុល្លារ ក្នុងប្រទេសថៃ

វេទិកាបណ្ដាញសង្គមយក្ស TikTok បានបញ្ជាក់ផែនការវិនិយោគរយៈពេលវែងរបស់ខ្លួនក្នុងប្រទេសថៃ ដែលមានតម្លៃសរុបជាង ២៧០ ប៊ីលានបាត ឬប្រហែល ៨,៥២ ប៊ីលាន​ដុល្លារ។ នេះបើតាមការចុះផ្សាយរបស់កាសែតបាងកកប៉ុស្តិ៍ ដែលស្រង់សម្ដីរបស់រដ្ឋមន្ត្រីហិរញ្ញវត្ថុបណ្ដោះអាសន្នរបស់ថៃ លោក អេកនីទី នីទីថាន់ប្រាប៉ាស (Ekniti Nitithanprapas)​។

ការបញ្ជាក់នេះបានធ្វើឡើងក្នុងអំឡុងពេលកិច្ចប្រជុំវេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស ប្រទេសស្វីស។ មន្ត្រីរដ្ឋាភិបាលថៃ រួមទាំងក្រុមប្រឹក្សាវិនិយោគថៃ (BoI) និងលោកស្រី Chanida Klaiphan ប្រធានគោលនយោបាយសាធារណៈប្រចាំប្រទេសថៃ​របស់ TikTok បាន​ជួបពិភាក្សាគ្នា​អំពីការវិនិយោគលើហេដ្ឋារចនាសម្ព័ន្ធឌីជីថល ការគាំទ្រសហគ្រាសខ្នាតតូច និងមធ្យម (SMEs) ​និង​ការជំរុញសេដ្ឋកិច្ចឌីជីថល និងសហគ្រិនថៃ។

TikTok ក៏បានស្នើឱ្យ​ប្រទេសថៃក្លាយជាមូលដ្ឋានតំបន់ សម្រាប់ការផលិត​មាតិកា និងសកម្មភាពឌីជីថលផ្សេងៗ ហើយក្រុមហ៊ុន​បានបង្ហាញពីការត្រៀមខ្លួនក្នុងការសហការជាមួយរដ្ឋាភិបាលថៃ ដើម្បីការពារអ្នកប្រើប្រាស់ បង្កើនចំណេះដឹងហិរញ្ញវត្ថុ និងទប់ស្កាត់ការបោកប្រាស់តាមអនឡាញ។

គួរគូសបញ្ជាក់ថា TikTok គឺជាវេទិកា​បណ្ដាញ​សង្គម​របស់ក្រុមហ៊ុនមេចិន​ ByteDance​។ វេទិកានេះមានអ្នកប្រើប្រាស់ជាង ២ ​ប៊ីលាននាក់នៅទូទាំងពិភពលោក រួមទាំងអ្នកប្រើប្រាស់ចំនួន ៣៦៨ លាននាក់នៅអាស៊ីអាគ្នេយ៍ និងអ្នកប្រើប្រាស់សម្រាប់មុខងារ​អាជីវកម្មជាង ១៥ លាននាក់។

TikTok បានបង្កើតអង្គភាពរបស់ខ្លួននៅថៃ ឈ្មោះ​ TikTok Technologies Co ដែលត្រូវបានប្រើប្រាស់ជាការិយាល័យប្រតិបត្តិការប្រចាំតំបន់ក្នុងឆ្នាំ ២០២១ ហើយចាប់តាំងពីពេលនោះ បាន​វិនិយោគយ៉ាងខ្លាំងលើមជ្ឈមណ្ឌលទិន្នន័យ ការបណ្តុះបណ្តាលជំនាញឌីជីថល និងការគាំទ្រអាជីវកម្មក្នុងស្រុក។

នៅឆ្នាំ ២០២៥ TikTok បានទទួលការយល់ព្រមពី BoI ដើម្បីដំណើរការអាជីវកម្មបង្ហោះទិន្នន័យ ​ក្នុងទំហំវិនិយោគ ១២៧ ​ប៊ីលានបាត ដើម្បីផ្តល់សេវាកម្មម៉ាស៊ីនមេ និងផ្ទុកទិន្នន័យ ដែលភាគច្រើនសម្រាប់ប្រតិបត្តិការ​របស់ក្រុមហ៊ុន​នៅសិង្ហបុរី។

លោករដ្ឋមន្រ្តី អេកនីទី បាននិយាយថា ការវិនិយោគរបស់ TikTok បង្ហាញពីការជឿជាក់របស់វិនិយោគិនអន្តរជាតិចំពោះសក្តានុពលសេដ្ឋកិច្ចឌីជីថលរបស់ប្រទេសថៃ៕