ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ១៣ ឧសភា

ពីមួយថ្ងៃទៅមួយថ្ងៃ មានរឿងច្រើនរាប់មិនអស់ បានកើតឡើងទូទាំងពិភពលោក ហើយរឿងខ្លះត្រូវបានគេចាត់ទុកថាជាព្រឹត្តិការណ៍ប្រវត្តិសាស្រ្តទៀតផង។

ចុះតើអ្នកដឹងទេ នៅថ្ងៃទី១៣ខែឧសភា មានព្រឹត្តិការណ៍ប្រវត្តិសាស្រ្តអ្វីខ្លះ ត្រូវបានគេកត់ត្រាទុក? តោះទៅមើលជាមួយ កម្ពុជាថ្មី ទាំងអស់គ្នា!

ឆ្នាំ២០១៩ – តារាចម្រៀង និងតារាសម្ដែង អាមេរិក Doris Day

តារាចម្រៀង និងតារាសម្ដែងជនជាតិអាមេរិកឈ្មោះ Doris Day ដែលក្លាយជាតារាហូលីវូដឈានមុខនៅដើមទសវត្សរ៍ឆ្នាំ ១៩៦០  បានទទួលមរណភាពក្នុងអាយុ ៩៣ ឆ្នាំ។

ឆ្នាំ១៩៨១ – សម្តេចប៉ាប John Paul ទី២ រួចជីវិតពីការប៉ុនប៉ងធ្វើឃាត

សម្តេចប៉ាប John Paul ទី២ បានរួចជីវិតពីការប៉ុនប៉ងធ្វើឃាតនៅទីលាន St. Peter នៃបុរីវ៉ាទីកង់ ដែលក្នុងនោះសម្តេចត្រូវបានគេបាញ់ និងបង្ករបួសធ្ងន់ធ្ងរដោយ Mehmet Ali Agca ជនជាតិទួរគី។

ឆ្នាំ១៩៦៤ – តារាសម្ដែង និងជាតារាកំប្លែងអាមេរិក Stephen Colbert

តារាសម្ដែង និងជាតារាកំប្លែងអាមេរិក Stephen Colbert ដែលល្បីឈ្មោះជាពិធីករនៃកម្មវិធី The Colbert Report បានចាប់កំណើត។

ឆ្នាំ១៩៦០ – បេសកកម្មឡើងដល់កំពូលភ្នំ Dhaulagiri នៅ ហិមាល័យ

បេសកកម្មរបស់ ស្វីស ដឹកនាំដោយ Max Eiselin បានទៅដល់កំពូលភ្នំ Dhaulagiri នៅតំបន់ ហិមាល័យ។

ឆ្នាំ១៩៥០ – តន្ត្រីករអាមេរិក Stevie Wonder

តន្ត្រីករជនជាតិអាមេរិក Stevie Wonder ដែលជាក្មេងជំទង់ អភិវឌ្ឍខ្លួនទៅជាតួអង្គតន្ត្រីប្រកបដោយភាពច្នៃប្រឌិតបំផុតនៅចុងសតវត្សរ៍ទី២០ បានកើតនៅទីក្រុង Saginaw រដ្ឋ Michigan។

ឆ្នាំ១៩៤១ – តារា​ Rock and Roll ឡាទីនដំបូងគេ 

តារាចម្រៀង និងជាអ្នកនិពន្ធបទចម្រៀងជនជាតិអាមេរិក Ritchie Valens ដែលជាតារា​ Rock and Roll ឡាទីនដំបូងគេ បានកើតនៅទីក្រុង Pacoima រដ្ឋកាលីហ្វ័រញ៉ា។

ឆ្នាំ១៩៤០ – នាយករដ្ឋមន្ត្រីអង់គ្លេសប្រឈមមុខនឹងសភាជាលើកដំបូង

អ្នកនយោបាយអង់គ្លេស Winston Churchill បានប្រឈមមុខនឹងសភាជាលើកដំបូងក្នុងនាមជានាយករដ្ឋមន្ត្រី ហើយបានប្រាប់តំណាងរាស្រ្តថា “ខ្ញុំគ្មានអ្វីឲ្យទេ ក្រៅពីឈាម ការនឿយហត់ ទឹកភ្នែក និងញើស”។

ឆ្នាំ១៨៤៦ – ការ​ប្រកាស​សង្គ្រាម​របស់​អាមេរិក​លើ​ម៉ិកស៊ិក ត្រូវ​បាន​អនុម័ត

ភាពតានតឹងរវាងម៉ិកស៊ិក និងសហរដ្ឋអាមេរិក ដែលផ្តើមចេញពីការកាត់យករដ្ឋតិចសាស់ដោយអាមេរិកនៅឆ្នាំ ១៨៤៥ បាននាំឲ្យសភាអាមេរិក អនុម័តការប្រកាសសង្រ្គាមប្រឆាំងនឹងម៉ិកស៊ិកយ៉ាងច្រើនលើសលប់៕

ប្រែសម្រួល៖ Vann Vann

ចុចអាន៖ ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ១២ ឧសភា