នេះជាការពិត ដែលពិធីបុណ្យប្រពៃណីឥណ្ឌា មានអ្នកចាក់ទម្លុះម្ជុលពេញដងខ្លួន មិនខ្លាចឈឺ

Thaipusam គឺជាបុណ្យប្រពៃណីរបស់ឥណ្ឌាដែលប្រារព្ធឡើងដើម្បីថ្វាយជ័យជម្នះដល់អាទិទេពសង្រ្គាម Lord Murugan។ ក្នុង​ប្រពៃណី​នេះ អ្នក​កាន់​សាសនាហិណ្ឌូនឹងនាំគ្នា​ទម្លុះ​ដងខ្លួន មាត់ អណ្ដាត ឬថ្ពាល់ ដើម្បីដង្ហែ​ឆ្នាំង​ទឹកដោះគោ និងលំពែង ទៅថ្វាយអទិទេពរបស់ពួកគេ។

ជារៀងរាល់ឆ្នាំក្នុងអំឡុងខែមករា ឬកុម្ភៈ បុណ្យ Thaipusam នឹងប្រព្រឹត្តឡើងក្នុងចំណោមសាសនិកហិណ្ឌូ នៅតាមបណ្ដា​ប្រទេសដូចជា ស្រីលង្ការ ឥណ្ឌា ​ម៉ូរីស ម៉ាឡេស៊ី និង​សិង្ហបុរី។ ពិធីបុណ្យនេះធ្វើឡើងសម្រាប់ឧទ្ទិសដល់អទិទេព Lord Murugan ដែលជាបុត្ររបស់ព្រះសិវៈ និងព្រះនាង ភរវតី ។

យោងតាមរឿងព្រេង បាននិទានថា នៅថ្ងៃមួយ ព្រះនាងភរវតីបានប្រទានដាវដ៏ពិសិដ្ឋដល់ព្រះរាជបុត្រ Murugan ដើម្បីបំផ្លាញអសុរ Tharakasuran និងអារក្សដទៃទៀត ដែលបង្កើតសេចក្តីវិនាសនៅលើភពផែនដី។ ដូច្នេះហើយទើបបានជាពិធីបុណ្យ Thaipusam ត្រូវបានប្រារព្ធឡើងដើម្បីរំលឹកដល់ជ័យជម្នះនៃអំពើល្អលើអំពើអាក្រក់ ហើយថ្ងៃនោះក៏ត្រូវបានគេជឿថា ជាថ្ងៃដែល Muruga ក្លាយជាអទិទេពផងដែរ។

ជាធម្មតាការទម្លុះសាច់ អណ្ដាត ឬថ្ពាល់ ក្នុងពិធីបុណ្យ Thaipusam មិនតម្រូវឱ្យធ្វើទាំងអស់គ្នានោះទេ។ អ្នកទម្លុះសាច់ខ្លួនឯង​ ភាគច្រើនជាអ្នកស្បថស្បែសុំអ្វីម្យ៉ាងពីអទិទេព ​លុះបានសម្រេចសេចក្ដីសំណូមកាលណា ពួកគេត្រូវទម្លុះរាងកាយ ដើម្បីលាពាក្យសម្បថ​​។

ចំណែកអ្នកឯទៀត ដែលមិនបានស្បថសច្ចាអ្វី តែបែរជាទម្លុះរាងកាយខ្លួនដែរ នោះក៏ដោយសារតែពួកគេជឿថា ម្ជុលដែលភ្ជាប់ជាមួយនឹងសាច់ ប្រៀបបាននឹងលំពែងរបស់អទិទេព Lord Murugan ដែលអាចប្រើសម្រាប់កម្ចាត់សេចក្ដីអាក្រក់ទាំងឡាយទាំងពួង ជាពិសេសពួកគេជឿងប់ថា ពួកគេនឹងក្លាយជាអ្នកចម្បាំងដ៏ពូកែជាមួយពពួកអមនុស្ស៕

ប្រែសម្រួល៖ សន្យា

ចុចអាន៖ កុលសម្ព័ន្ធព្រៃអាម៉ាហ្សូន បរិភោគធាតុអ្នកស្លាប់ ដោយសារជំនឿម្យ៉ាង

ចុចអាន៖ មូលហេតុប្រទេសមួយបន្តប្រពៃណីចាប់ពង្រត់កូនក្រមុំ មកទល់សព្វថ្ងៃ