ជប៉ុន រកឃើញរុក្ខជាតិចម្លែកម្ដងទៀត ក្រោយដាច់ពូជរយៈពេល ៣០ ឆ្នាំ

រុក្ខជាតិចម្លែកមួយហៅថាគោមទេពអប្សរ (fairy lantern) ពូជ Thismia គឺជារុក្ខជាតិគ្មានស្លឹកបៃតងនិងមិនធ្វើរស្មីសំយោគទេ ពួកវាស៊ីផ្សិតឬរស់នៅលើដើមឈើដើម្បីរក្សាជីវិត ។

រុក្ខជាតិគោមទេពអប្សរគឺជា រុក្ខជាតិកម្រប៉ុន្តែមានការបែកខ្ញែកយ៉ាងទូលំទូលាយទូទាំងតំបន់ត្រូពិកនៃទ្វីបអាស៊ី អូស្ត្រាលី និងអាមេរិកខាងត្បូង ។

រុក្ខជាតិពូជ Thismia ត្រូវគេរកឃើញប្រហែល ៩០ ប្រភេទប៉ុណ្ណោះ ក្នុងចំណោមនោះមានមួយប្រភេទគេស្មានថាផុតពូជបាត់ទៅហើយគឺ “ Thismia Kobensis ឬ គោមទេពអប្សរ” នេះឯង ។

ក្រុមអ្នកវិទ្យាសាស្ត្រធ្លាប់រកឃើញវាលើកទីមួយនៅប្រទេសជប៉ុន ទីក្រុងកូបេ ឆ្នាំ ១៩៩២ និងលើកទីពីរនៅទីក្រុងសានដា ចម្ងាយប្រហែល ១៨ ម៉ាយពីកន្លែងដំបូងដោយសាស្ត្រាចារ្យ Kenji Suetsugu ជាមួយក្រុមការងារនៅសាកលវិទ្យាល័យកូបេ ។

ការរកឃើញឡើងវិញលើកនេះអាចជួយបំភ្លឺពីរុក្ខជាតិមួយទៀតគឺ Thismia americana ដែលគេចាត់ទុកវាជារុក្ខជាតិអាថ៍កំបាំង និងសង្ស័យមានពាក់ព័ន្ធជាមួយ Thismia Kobensis ទើបអ្នកសិក្សានាំគ្នារំពឹងទុកថានឹងមានលទ្ធផលថ្មីៗមិនខាន ។

ក្រុមអ្នកស្រាវជ្រាវដដែលបានវាយតម្លៃថា Thismia Kobensis ជាប្រភេទរុក្ខជាតិកំពុងរងគ្រោះថ្នាក់យ៉ាងធ្ងន់ធ្ងរដោយផ្អែកលើលក្ខណៈវិនិច្ឆ័យនៃបញ្ជីក្រហមរបស់ IUCN ថែមទាំងរៀបចំការការពារព្រៃដែលពួកវានៅទៀតផង ៕

ប្រែសម្រួល ៖ វារី

ចុចអាន ៖ ដឹងកាន់តែច្បាស់ពីសួនច្បារពុលនៅ អង់គ្លេស អាចឲ្យមនុស្សដួលសន្លប់

ចុចអាន ៖ រុក្ខជាតិកម្រ ៦ ដើមជិតផុតពូជពីផែនដី