រុក្ខជាតិកម្រ ៦ ដើមជិតផុតពូជពីផែនដី

រុក្ខជាតិកម្រគឺសំដៅទៅលើពូជផ្លែឈើដែលមានចំនួនតិចដើមបំផុតនៅលើលោក ថែមទាំងកំពុងប្រឈមមុខនឹងការផុតពូជទៀតផង ។ ខាងក្រោមនេះជាឈ្មោះ និងព័ត៌មានខ្លះៗពីរុក្ខជាតិកម្រទាំង ៦ ដើម ៖

 ១. Caféier de Humblot

ផ្លែនេះមានទីតាំងនៅកោះ Mayotte កោះ Ngazidja និងកោះ Comoro សរុបមិនដល់ ១១០ ដើមទេ ឈ្មោះក្នុងវិទ្យាសាស្ត្ររបស់វាគឺ Coffea humblotiana ហើយកំពុងរងការគំរាមកំហែងពីការពង្រីកវិស័យកសិកម្មដែលធ្វើឲ្យបាត់បង់ជម្រក ។ 

២. Pimentero de Temisas

Pimentero de Temisas មានទីតាំងនៅប្រទេសអេស្ប៉ាញ កោះកាណារី មានចំនួនតែ ៩៣ ដើមប៉ុណ្ណោះ ឈ្មោះក្នុងវិទ្យាសាស្ត្ររបស់វាគឺ Solanum lidii ។ យ៉ាងណាមិញវាត្រូវបានដាក់បញ្ចូលក្នុងបញ្ជីរុក្ខជាតិកម្រដើម្បីការពារហើយ ។ 

៣. Sardinian Currant

ដើម Sardinian មានប្រហែល ៨០ ដើមនៅប្រទេសអ៊ីតាលី ខេត្ត Nuoro ឈ្មោះក្នុងវិទ្យាសាស្ត្ររបស់វាគឺ Ribes sardoum ចំណែកឯមូលហេតុចម្បងបណ្ដាលឲ្យវាជិតផុតពូជនោះ គឺមកពីចៀមព្រៃ និងពពែព្រៃ ។

៤. សារី Gergeranian 

ជាផ្លែឈើដុះនៅតំបន់ផ្កា Daralegis នៃប្រទេសអាមេនី ហើយឈ្មោះក្នុងវិទ្យាសាស្ត្រគឺ Pyrus gergerana មានតិចជាង ៥០ ដើមទៅទៀត ព្រោះបាត់បង់ទីជម្រកដូច Caféier de Humblot ដែរ ។

៥. ចេកម៉ាដាហ្គាស្កា

ជាប្រភេទចេកកម្រមានប្រហែល ៥ ដើមនៅម៉ាដាហ្គាស្កាខាងលិច ឈ្មោះវិទ្យាសាស្ត្ររបស់វាគឺ Ensete perrieri ទន្ទឹមនេះគេបានដាក់បញ្ចូលវាក្នុងបញ្ជី IUCN កាលពីឆ្នាំ ២០១៨ ហើយ ។

៦. Murray’s Plum 

Murray’s Plum កម្រខ្លាំង ព្រោះនៅសល់ពីរបីដើមគត់នៅរដ្ឋតិចសាស់ សហរដ្ឋអាមេរិក ។ ឈ្មោះវិទ្យាសាស្ត្ររបស់វាគឺ Prunus murrayana ណាមួយគេបញ្ចូលក្នុងបញ្ជីក្រហមរួចដូចគ្នា ។

សូមបញ្ជាក់ថា បច្ចុប្បន្នមិនមានអ្នកស្រាវជ្រាវណាដឹងពីចំនួនពិតប្រាកដរបស់វាឡើយ ដូច្នេះទិន្នន័យផ្លែឈើ ៦ ដើមខាងលើបានដកស្រង់តាំងពីថ្ងៃទី ១៨ ខែ កុម្ភៈ ឆ្នាំ ២០១៩ មកម្ល៉េះ ៕

ប្រែសម្រួល ៖ វារី

ចុចអាន ៖ ដឹងកាន់តែច្បាស់ពីសួនច្បារពុលនៅ អង់គ្លេស អាចឲ្យមនុស្សដួលសន្លប់