KPT+

ម្ចាស់ស្នាដៃនិពន្ធសៀវភៅ«សម្ដេចពុកសន្តិភាព» និងបទចម្រៀង«ស្នាដៃសម្ដេចតេជោ» ដង្ហោយសុំក្តីអាណិតពី សម្ដេចតេជោ

បានផុស

១ year មុន

នៅ

ថ្ងៃព្រហស្បតិ៍ ១ កុម្ភៈ ២០២៤

ដោយ

អ្នកនាង ចន្ទ សិរីរដ្ឋ អតីតសិស្សពូកែទូទាំងប្រទេសផ្នែកអក្សរសាស្ត្រខ្មែរ និងត្រូវបានគេស្គាល់ថា ជាអ្នកនិពន្ធកម្រងបទចម្រៀងស្នាដៃសម្ដេចតេជោ និងសៀវភៅ«សម្តេចពុកសន្តិភាព» បានដង្ហោយសុំក្តីអាណិតពី សម្តេចតេជោ ហ៊ុន សែន ក្រោយជួបគ្រោះថ្នាក់ចរាចរណ៍រងរបួសធ្ងន់ កាលពីថ្មីៗ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាង ចន្ទ សិរីរដ្ឋ បានបញ្ជាក់ប្រាប់ឲ្យដឹងថា អ្នកនាងបានជួបគ្រោះថ្នាក់ចរាចរណ៍កាលពីរាត្រីថ្ងៃទី ២៨ ខែមករា ឆ្នាំ ២០២៤ ត្រង់ចំណុចផ្លូវ ៦០ ម៉ែត្រ ក្រោយពេលចេញពីបំពេញការងារ ដោយខណៈនោះក៏ត្រូវបានបញ្ជូនទៅព្យាបាល និងសង្គ្រោះបន្ទាន់ នៅមន្ទីរមិត្តភាពកម្ពុជា-ចិន ព្រះពេទ្យកុសុមៈ(មន្ទីរពេទ្យលោកសង្ឃ)។

យ៉ាងណាដោយសារតែកត្តាជីវភាពលំបាក ត្រូវទទួលបន្ទុកចិញ្ចឹមកូនស្រីតូច និងប្តីមានបញ្ហាសុខភាពផងនោះ អ្នកនិពន្ធចម្រៀងស្នាដៃសម្តេចតេជោ ចន្ទ សិរីរដ្ឋ កន្លងមក បានប្រឹងប្រែងធ្វើការតែម្នាក់ឯងដើម្បីផ្គត់ផ្គង់ជីវភាពគ្រួសារ។

អ្នកនាង ចន្ទ សិរីរដ្ឋ បានលើកឡើងថា អ្នកនាងមិនមានផ្ទះសម្បែងនៅទេ ដោយបច្ចុប្បន្នស្នាក់នៅបន្ទប់ជួល ទើបខំប្រឹងទាំងថ្ងៃយប់ដើម្បីសន្សំប្រាក់ទិញផ្ទះតូចល្មមនៅជាមួយនឹងកូនតូច និងគ្រួសារ។ ក្រោយពីអ្នកនាងបានជួបហេតុការណ៍គ្រោះថ្នាក់ចរាចរណ៍នេះហើយ ទើបបណ្ដាលឲ្យខ្លួនត្រូវប៉ះទង្គិចជាមួយផ្នែកខាងក្នុង នៃរាងកាយមួយចំនួនយ៉ាងដំណំ។

ជាមួយគ្នានេះ អ្នកនាង ចន្ទ សិរីរដ្ឋ ដែលជាអ្នកនិពន្ធស្នាដៃចម្រៀងសម្តេចតេជោ និងសៀវភៅ«សម្តេចពុកសន្តិភាព» ក៏បានលើកដៃសូមគោរពសំពះសុំក្តីសន្ដោសក្តីអាណិតពី សម្តេចតេជោ ហ៊ុន សែន មេត្តាជួយដល់ជីវិតអ្នកនាងកំពុងជួបការលំបាក និងរងគ្រោះពីគ្រោះថ្នាក់ចរាចរណ៍កាលពីថ្មីៗកន្លងទៅ៕

អត្ថបទ ៖ ចាន់រ៉ា