មហាសេដ្ឋី​លំដាប់​លេខ​​​២​​​​នៅ​ថៃ​ លោក Charoen ផ្ទេរភាគហ៊ុន​នៅ​ក្រុមហ៊ុន​គ្រាក់ៗ ឲ្យកូនទាំង​៥​រូប

មហាសេដ្ឋីអចលនទ្រព្យលោក Charoen Sirivadhanabhakdi ជាមហាសេដ្ឋី​លំដាប់​ទីពីររបស់ប្រទេសថៃ បានប្រគល់កម្មសិទ្ធិនៃក្រុមហ៊ុនចុះបញ្ជីសំខាន់ៗមួយចំនួនដល់កូនៗទាំងប្រាំរបស់គាត់ នៅក្នុងការផ្លាស់ប្តូរដែលត្រូវបានគេមើលឃើញថា ជាផ្នែកមួយនៃផែនការស្នងតំណែងឬប្រគល់មរតករបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន​មេ​ដែលគ្រប់គ្រងដោយប្រយោលលើក្រុមហ៊ុនស្នូលចំនួនបីនៃក្រុមហ៊ុនរបស់គាត់គឺក្រុមហ៊ុន Berli Jucker, Asset World Corp និង Thai Group Holdings បានចែកចាយភាគហ៊ុនរបស់ខ្លួនឡើងវិញស្មើៗគ្នាក្នុងចំណោម​អ្នកស្នងមរតក។ នេះបើតាមកាសែតថៃ The Nation បានរាយការណ៍ ដោយដកស្រង់ព័ត៌មានដែលបានបង្ហាញ​ទៅកាន់ផ្សារហ៊ុនថៃកាលពីថ្ងៃចន្ទ។

ឯកសារកាលពីថ្ងៃចន្ទ ចេញ​ផ្សាយ​​​ដោយ​​ក្រុមហ៊ុន Asset World Corp និងក្រុមហ៊ុន Berli Jucker បាននិយាយថា ការរៀបចំរចនាសម្ព័ន្ធនៃម្ចាស់ភាគហ៊ុនធំរបស់ពួកគេ នឹងមិនប៉ះពាល់ដល់ការគ្រប់គ្រង ប្រតិបត្តិការ ឬទិសដៅយុទ្ធសាស្ត្ររបស់​ក្រុមហ៊ុន​ដែល​មានស្រាប់នោះ​ទេ​​។

ការផ្លាស់ប្តូរនេះត្រូវបានគេមើលឃើញថា ជាផ្នែកនៃផែនការស្នងមរតក​រយៈពេលវែងដោយអ្នកជំនួញវ័យ ៨១ ឆ្នាំ ដែលជាស្ថាបនិក និងជាប្រធានក្រុមហ៊ុនភេសជ្ជៈ និងអចលនទ្រព្យយក្ស TCC Group ដើម្បីបញ្ជូនដល់មនុស្សជំនាន់ក្រោយតាមរបៀបដែលមានរចនាសម្ព័ន្ធរួចស្រាប់។

លោកបានលាលែងពីតំណែងជាប្រធានក្រុមហ៊ុនអាហារ និងភេសជ្ជៈ Fraser and Neave ដែលមានមូលដ្ឋាននៅប្រទេសសិង្ហបុរីក្នុងខែមករា ហើយបានចូលនិវត្តន៍ជាប្រធានក្រុមហ៊ុនអភិវឌ្ឍន៍អចលនទ្រព្យថៃ-សិង្ហបុរី Frasers Property ក្នុងខែកុម្ភៈ។

លោក Charoen Sirivadhanabhakdi កើត និង​​ធំដឹង​ក្តី​នៅទីក្រុងបាងកក ឈានចូលទីផ្សារស្រាបៀរថៃក្នុងឆ្នាំ ១៩៩៥ ហើយក្រោយមកបានពង្រីកទៅផ្នែកអចលនទ្រព្យ និងបដិសណ្ឋារកិច្ច។ ចក្រភព​អាជីវកម្ម​របស់​លោក​ក៏​រួម​បញ្ចូល​​ទាំង​ក្រុមហ៊ុន​ផលិត​ភេសជ្ជៈ​ធំ​បំផុត​របស់​ប្រទេស​ថៃ Thai Beverage ផង​ដែរ។

ជាមួយនឹងទ្រព្យសម្បត្តិសុទ្ធប៉ាន់ស្មានចំនួន ១១.៦ ពាន់លានដុល្លារ លោកជាប់ចំណាត់ថ្នាក់ជាបុគ្គលដែលមានជាងគេទីពីររបស់ប្រទេស បន្ទាប់ពីមហាសេដ្ឋីថាមពល លោក Sarath Ratanavadi។​ នេះបើយោងតាមសន្ទស្សន៍មហាសេដ្ឋី Bloomberg ៕

អត្ថបទ៖ សាង ស្រីល័ក្ខ

ចុចអាន៖ឆ្នាំ២០២៤ Forbes រកឃើញថា មហាសេដ្ឋីថៃកំពូលទាំង៥ រូប ធ្លាក់ចុះទ្រព្យសម្បត្តិមិនខុសគ្នា