ក្រសួងការងារណែនាំពលរដ្ឋខ្មែរទៅធ្វើតេស្តជំនាញ និងតេស្តភាសាជប៉ុនដើម្បីទៅធ្វើការនៅប្រទេសជប៉ុន

ក្រសួងការងារ និងបណ្តុះបណ្តាលវិជ្ជាជីវៈ បានធ្វើការណែនាំដល់ប្រជាពលរដ្ឋខ្មែរដែលមានជំនាញទៅធ្វើតេស្តជំនាញនិងតេស្តភាសាជប៉ុនដើម្បីទៅធ្វើការនៅប្រទេសជប៉ុនទទួលបានបទពិសោធន៍ល្អៗ និងទទួលប្រាក់ខែខ្ពស់។

តាមរយៈសេចក្តីជូនដំណឹងស្តីពីការធ្វើតេស្តជំនាញ និងតេស្តភាសាជប៉ុន សម្រាប់ពលករជំនាញដើម្បីទៅធ្វើការនៅប្រទេសជប៉ុន ចុះនៅថ្ងៃទី២៨តុលានេះ លោក ហេងសួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា «យោងតាមការជូនដំណឹងពីក្រសួងយុត្តិធម៌ នៃប្រទេសជប៉ុន ក្រសួងការងារ និងបណ្តុះបណ្តាលវិជ្ជាជីវៈ មានកិត្តិយស សូមជូនដំណឹងដល់ទីភ្នាក់ងារជ្រើសរើសឯកជនទាំងអស់ និងសាធារណជនដែលមានបំណងទៅធ្វើការនៅប្រទេសជប៉ុន ក្នុងប្រព័ន្ធពលករជំនាញឱ្យបានជ្រាបថា អង្គភាពទទួលបន្ទុកការធ្វើតេស្តជំនាញ និងតេស្ត ភាសាជប៉ុននឹងរៀបចំការធ្វើតេស្តជំនាញ និងតេស្តភាសាជប៉ុនសម្រាប់ពលករជំនាញ តាមរយៈប្រព័ន្ធកុំព្យូទ័រ (CBT)»។

លោករដ្ឋមន្ត្រីបានបន្តថា ការធ្វើតេស្តភាសាជប៉ុនលើផ្នែកការងារភោជនីយដ្ឋាននឹងប្រព្រឹត្តិទៅនៅវិទ្យាស្ថានអភិវឌ្ឍន៍វិស័យអប់រំដែលមានអាសយដ្ឋានលេខ៩A ផ្លូវលេខ៣៧០ នៅសង្កាត់បឹងកេងកង១ ខណ្ឌចំការមន រាជធានីភ្នំពេញដែលកាលបរិច្ឆេទធ្វើតេស្តភាសាជប៉ុនមានតម្លៃ៣៦ដុល្លារ និងផ្នែកការងារនៅភោជនីដ្ឋានមានតម្លៃ៣៣ដុល្លារ នឹងធ្វើនៅថ្ងៃទី១២, ១៤, ១៧ និង១៩ ខែធ្នូ ឆ្នាំ២០២៥ ថ្ងៃទី៨, ៩, ១១ និង១៥ ខែមករា ឆ្នាំ២០២៦។ ចំពោះសេវានៃការចុះឈ្មោះធ្វើតេស្ត គឺបង់ជូនទៅអង្គភាពទទួលបន្ទុកការធ្វើតេស្តជំនាញ និងតេស្តភាសាជប៉ុន។

លោករដ្ឋមន្ត្រីបានបន្តទៀតថា ចំពោះលក្ខខណ្ឌចុះឈ្មោះធ្វើតេស្តជំនាញ និងតេស្តភាសាជប៉ុន គឺចាប់ពីអាយុ ១៧ឆ្នាំឡើងទៅ ដោយមិនគិតពី កម្រិតវប្បធម៌ហើយឯកសារចាំបាច់ដែលត្រូវយកមកជាមួយនៅថ្ងៃធ្វើតេស្តរួមមាន អត្តសញ្ញាណបណ្ណ លិខិតឆ្លងដែន ឬបណ្ណបើកបរ៕

អត្ថបទ៖ សំអឿន