ជនជាតិវៀតណាមជាង៦០នាក់ពាក់ព័ន្ធបទល្មើសអនឡាញ ត្រូវបានបណ្តេញចេញពីកម្ពុជា

អាជ្ញាធរកម្ពុជាបានបណ្ដេញនូវជនជាតិវៀតណាមចំនួន៦៣នាក់ចេញពីប្រទេស ក្រោយរកឃើញពាក់ព័ន្ធក្នុងបទល្មើសបច្ចេកវិទ្យា (Online Scam)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នីតិវិធីបណ្ដេញចេញជនបរទេសនេះ បានធ្វើឡើងតាមច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃទី២៧ ខែតុលា ឆ្នាំ២០២៥ ដែលអនុវត្តតាមការណែនាំពីសំណាក់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកអគ្គនាយកអន្តោប្រវេសន៍។

បើតាមអគ្គនាយកដ្ឋានអន្តោប្រវេសន៍ ជនជាតិវៀតណាមទាំង៦៣នាក់ ដែលក្នុងនោះមានស្រីចំនួន១១នាក់ គឺពាក់ព័ន្ធនឹងករណីលួចស្នាក់នៅ និងធ្វើការដោយខុសច្បាប់ ក្នុងការប្រព្រឹត្តបទល្មើស Online Scam ដែលទទួលបានពីស្នងការដ្ឋាននគរបាលខេត្តព្រះសីហនុ។

គួរឱ្យដឹងថា ក្នុងរយៈពេល៩ខែ ឆ្នាំ២០២៥ អាជ្ញាធរ និងកងកម្លាំងមានសមត្ថកិច្ចបានចុះស្រាវជ្រាវ និងបើកប្រតិបត្តិការបង្ក្រាបតាមគោលដៅដែលពាក់ព័ន្ធក្នុងបទល្មើសតាមប្រព័ន្ធបច្ចេកវិទ្យា (Online Scam) ចំនួន៤៨លើក ដោយឃាត់បានមនុស្សចំនួន២ ៩១០នាក់ ក្នុងនោះកសាងសំណុំរឿងបញ្ជូនទៅកាន់តុលាការ១៦៨នាក់ និងអនុវត្តនីតិវិធីបណ្ដេញចេញពីកម្ពុជាចំនួន២ ៧២២នាក់៕