ទីផ្សារដូងក្រអូបនៅបាត់ដំបង កំពុងមានហាង​ឆេងល្អ និងមានតម្រូវការច្រើន

ទីផ្សារដូងក្រអូបនាពេលបច្ចុប្បន្នសម្រាប់ខេត្តបាត់ដំបង កំពុងមានតម្រូវការច្រើន ដោយសារតែសម្បូរអតិថិជននិយមចូលចិត្តពិសា ព្រោះដូងក្រអូបមានរសជាតិផ្អែមឆ្ងាញ់ ដែលអាចជួយទ្រទ្រង់ដល់សុខភាពផងដែរ។

មួយរយៈនេះគេសង្កេតឃើញថា មានការនិយមចូលចិត្តជ្រើសរើសយកផ្លែដូងក្រអូបដែលមានលក្ខណៈតូចល្មម យកមកលក់នៅលើទីផ្សារស្ទើរគ្រប់ទីកន្លែងក្នុងក្រុងបាត់ដំបង បើទោះបីជាមានអ្នកលក់ច្រើនព្រោងព្រាតយ៉ាងណាក៏ដោយ ក៏ផ្លែដូងប្រភេទនេះនៅតែមានទីផ្សារល្អ និងមានតម្លៃខ្ពស់បង្គួរ។

អ្នកស្រី សោ សុខារី ជានាយកសាលា រស់នៅភូមិលំផាត់ ឃុំអូដា ស្រុកកំរៀង ខេត្តបាត់ដំបង ដែលបានដាំដុះប្រភេទដូងក្រអូបនេះជាច្រើនដើមបានបញ្ជាក់ថា ពូជដូងក្រអូបនេះគឺដើមទាបល្មម ដែលដើមខ្លះស្ទើរតែផ្លែធ្លាក់ដល់ដី តែដើមខ្លះទៀតក៏អាចឈរបេះបាន ហើយពូជដូងនេះ គឺទឹកមានឱជារសផ្អែមឆ្ងាញ់ជាងដូងធម្មតា ដោយគ្រាន់តែបរិមាណទឹកវាតិចជាងតែប៉ុណ្ណោះ។

អ្នកស្រីបានបន្ថែមថា សព្វថ្ងៃគឺមិនចាំបាច់កាប់យកទៅលក់នៅលើទីផ្សារនោះឡើយ ដោយមានឈ្មួញកណ្ដាលបានចុះទៅទិញដល់ផ្ទះតែម្ដង ហើយក៏បានតម្លៃសមរម្យដែលអាចទទួលយកបាន ព្រោះបច្ចុប្បន្នផ្លែដូងគឺមានតម្រូវការច្រើននៅលើទីផ្សារ ដោយសារតែមានអ្នកនិយមចូលចិត្តពិសាច្រើន។

ដោយឡែកលោក ម៉ៅ វាសនា រស់នៅភូមិរំចេក៤ សង្កាត់រតនៈ ក្រុងបាត់ដំបង ជាអ្នកប្រកបមុខរបរលក់ចាប់ហួយផង និងលក់ដូងក្រអូបនេះផងបានរៀបរាប់ថា ប្រភេទដូងនេះគឺមានម៉ូយដឹកទាំងឡានៗ យកមកបោះដុំឲ្យដល់ផ្ទះ ហើយលោកក៏យកមកកាប់លក់រាយដោយក្នុងតម្លៃមួយផ្លែ ចាប់ពី ៣.០០០ រៀល ដល់ ៣.៥០០រៀល។

លោក វាសនា បានបន្ថែមថា ការទិញផ្លែដូងក្រអូបយកមកលក់នេះ ពេលខ្លះលោកទិញដល់កន្លះឡាន ដើម្បីយកមកទុកលក់ដោយសារតែសម្បូរអតិថិជនមករកទិញច្រើន ដែលបច្ចុប្បន្នទីផ្សាររបស់ផ្លែដូងក្រអូបគឺបានល្អបំផុត ទាំងលក់ដាច់ និងបានទាំងតម្លៃខ្ពស់ ហើយបច្ចុប្បន្នផ្លែដូងក្រអូបភាគច្រើនគឺគេដឹកមកពីស្រុកមួយចំនួននៅប៉ែកខាងលិចជាប់ព្រំដែនថៃ ដូចជាស្រុកកំរៀង ស្រុកសំឡូត និងខេត្តប៉ៃលិនជាដើម៕

អត្ថបទ៖ សោ និយមរ័ត្ន