រយៈពេល ៣ខែ មានពលករខ្មែរត្រឡប់មកពីថៃជាង ៣៤ម៉ឺននាក់ ហើយទទួលបានការងារធ្វើ

ក្នុងរយៈពេល៣ខែចុងក្រោយឆ្នាំ២០២៥នេះ មានពលករខ្មែរត្រឡប់មកពីថៃវិញប្រមាណជាង ៣៤ម៉ឺននាក់ ទទួលបានការងារធ្វើដែលបានជួយលើកកម្ពស់ជីវភាពរស់នៅរបស់ពលករខ្មែរកាន់តែប្រសើរឡើងបន្ថែមទៀត។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍នៅថ្ងៃទី៧ ខែវិច្ឆិកានេះថាក្នុងរយៈពេល៣ខែកន្លងមកនេះ ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយវិស័យឯកជន សហជីព និងអ្នកពាក់ព័ន្ធផ្សេងទៀត បានជួយស្វែងរកការងារឱ្យពលករខ្មែរត្រឡប់មកពីថៃវិញ បានជាង ៣៤ម៉ឺននាក់ ដោយក្នុងនោះប្រមាណ ២៧ម៉ឺននាក់ បានចូលធ្វើការនៅក្នុងក្រុមហ៊ុន សហគ្រាស និងរោងចក្រផ្លូវការ ហើយប្រមាណ ៧ម៉ឺននាក់ផ្សេងទៀត បានទទួលការងារនៅតាមសហគ្រាសខ្នាតតូច និងមធ្យម សិប្បកម្ម ភោជនីយដ្ឋាន និងនៅតាមការដ្ឋានសំណង់ ជាដើម។

ខណៈដែលព្រះរាជពិធីបុណ្យអុំទូក បានបញ្ចប់ហើយនោះ លោក ស៊ុន មេសា បានបន្តអំពាវនាវដល់ពលករខ្មែរត្រឡប់មកពីថៃ និងប្រជាពលរដ្ឋដែលមិនទាន់មានការងារធ្វើ សូមទាក់ទងមកលេខ ១២៩៧ ដើម្បីទទួលបានឱកាសការងារធ្វើ។

លោក ស៊ុន មេសា បានបន្តថា «ព្រះរាជពិធីបុណ្យអុំទូក បានបញ្ចប់ហើយ សម្រាប់ពលករខ្មែរត្រឡប់មកពីថៃ និងប្រជាពលរដ្ឋដែលកំពុងស្វែងរកការងារធ្វើ សូមទាក់ទងមកលេខ ១២៩៧ ដើម្បីទទួលបានឱកាសការងារធ្វើ ព្រោះនៅទូទាំងប្រទេសកម្ពុជា នៅសល់ឱកាសការងារចំនួន ៧៥ ៣០២កន្លែងថែមទៀត កំពុងរង់ចាំ។ លោកថា សម្រាប់ពលករ និងប្រជាពលរដ្ឋ ដែលមិនមានជំនាញក៏អាចទាក់ទងមកលេខ ១២៩៧ បានដែរ ហើយក៏អាចទទួលបានឱកាសការងារធ្វើដូចគ្នា»៕

អត្ថបទ៖ សំអឿន