ព័ត៌មានជាតិ

រដ្ឋមន្ត្រីសុខាភិបាល ឱ្យគ្រប់មូលដ្ឋានសុខាភិបាល ត្រូវជំរុញការប្រើប្រព័ន្ធបច្ចេកវិទ្យាឌីជីថល ដើម្បីបង្កើនប្រសិទ្ធភាពការងារ

បានផុស

៦ ខែ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានណែនាំដល់គ្រប់មូលដ្ឋានសុខាភិបាលទាំងអស់ ត្រូវខិតខំស្វែងយល់ និងជំរុញការប្រើប្រាស់ប្រព័ន្ធបច្ចេកវិទ្យាឌីជីថល ដើម្បីបង្កើនប្រសិទ្ធភាពការងារឱ្យកាន់តែរលូន។

ក្នុងកិច្ចប្រជុំកម្រិតថ្នាក់ដឹកនាំលើកទី ១ នៃខែវិច្ឆិកា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត កាលពីថ្ងៃទី ១០ វិច្ឆិកា តាមប្រព័ន្ធ Zoom លោកសាស្ត្រាចារ្យរដ្ឋមន្ត្រី ក៏បានណែនាំដល់មន្ទីរសុខាភិបាល នៅតាមខេត្តជាប់ព្រំដែន ត្រូវពិនិត្យមូលដ្ឋានសុខាភិបាល ដែលផ្អាកដំណើរការក្នុងអំឡុងពេលជម្លោះព្រំដែនកម្ពុជា-ថៃ ដោយរៀបចំឱ្យដំណើរការឡើងវិញ ដើម្បីធានាការបម្រើសេវាជូនប្រជាពលរដ្ឋ។ បន្តពង្រឹងការបម្រើសេវា ប្រកបដោយគុណភាព សមធម៌ និងក្រមសីលធម៌ ដើម្បីបង្កើនទំនុកចិត្តដល់ប្រជាពលរដ្ឋ។ គ្រប់មូលដ្ឋានសុខាភិបាល ត្រូវមានពិធីសារ ដោយបិតលើជញ្ជាំងងាយស្រួលក្នុងការមើល និងអនុវត្តការងារ។ បន្តយកចិត្តទុកដាក់បន្ថែមលើការងារនិយ័តកម្ម និងការងារឱសថ ដោយផ្ដោតសំខាន់លើគុណភាព និងការផលិតឱ្យត្រឹមត្រូវតាមលក្ខណៈបច្ចេកទេស។

ជាមួយគ្នានេះដែរ ត្រូវពង្រឹងបន្ថែមការផ្សព្វផ្សាយឱ្យបានទូលំទូលាយនូវការបម្រើសេវាសុខាភិបាល នៅតាមអង្គភាពរៀងៗ ខ្លួន។ គ្រប់មូលដ្ឋានសុខាភិបាលទាំងអស់ ត្រូវខិតខំស្វែងយល់ និងជំរុញការប្រើប្រាស់ប្រព័ន្ធបច្ចេកវិទ្យាឌីជីថល ដើម្បីបង្កើនប្រសិទ្ធភាពការងារឱ្យកាន់តែរលូន។ ចំណែកថ្នាក់ដឹកនាំមន្ទីរពេទ្យ ត្រូវចុះពិនិត្យក្នុងមូលដ្ឋានរបស់ខ្លួនឱ្យបានជាប្រចាំទាំងហេដ្ឋារចនាសម្ព័ន្ធ បរិស្ថាន ឥរិយាបថជាមួយអ្នកជំងឺ ដើម្បីពិនិត្យរកចំណុចខ្វះខាតកែលម្អ។ ជំរុញការចុះពង្រឹងមណ្ឌលសុខភាព និងមន្ទីរពេទ្យបង្អែក ដោយធ្វើការផ្ទៀងផ្ទាត់នូវចំណុចដែលត្រូវកែលម្អឱ្យកាន់តែល្អប្រសើរ។

លោកសាស្ត្រាចារ្យរដ្ឋមន្ត្រី បានណែនាំឱ្យថ្នាក់ដឹកនាំ មន្ទីរពេទ្យជាតិ មន្ទីរសុខាភិបាលរាជធានី ខេត្ត ជាពិសេសការិយាល័យស្រុកប្រតិបត្តិ មណ្ឌលសុខភាព ដែលនៅកៀកនឹងប្រជាពលរដ្ឋ ត្រូវពង្រឹងការបម្រើសេវាគុណភាព ប្រសិទ្ធភាព ក្រមសីលធម៌វិជ្ជាជីវៈ ក្នុងការលើកកម្ពស់សុខុមាលភាពពលរដ្ឋកម្រិតមូលដ្ឋាន ឱ្យកាន់តែប្រសើរឡើង។