សមត្ថកិច្ចក្រុងសែនមនោរម្យ ចុះអប់រំសិស្សគេចសាលា និងណែនាំម្ចាស់ទីតាំងកម្សាន្ត

ខេត្តមណ្ឌលគិរី៖ កម្លាំងនៃអធិការដ្ឋាននគរបាលក្រុងសែនមនោរម្យ សហការជាមួយកម្លាំងប៉ុស្តិ៍នគរបាលរដ្ឋបាលស្ពានមានជ័យ បានចុះអប់រំសិស្សគេចសាលា និងណែនាំម្ចាស់ទីតាំងកម្សាន្តនានា ឱ្យរាយការណ៍ទៅអាជ្ញាធរ ករណីឃើញមានក្មេង ឬយុវជនពាក់ឯកសណ្ឋានសិស្សចូលលេងកន្លែងកម្សាន្ត។ ប្រតិបត្តិការចុះអប់រំ និងផ្សព្វផ្សាយនេះ ធ្វើឡើងកាលពីថ្ងៃទី ១១​ខែវិច្ឆិកា ឆ្នាំ ២០២៥ នៅតាមហាង និងកន្លែងកម្សាន្តមួយចំនួន ដែលស្ថិតនៅក្បែរសាលារៀន បន្ទាប់ពីបើកបវេសនកាល។

លោក កាន់ ពេញ អធិការនគរបាលក្រុងសែនមនោរម្យ បានប្រាប់(កម្ពុជាថ្មី)ឱ្យដឹងថា ក្នុងការអនុវត្តនោះសមត្ថកិច្ចបានចុះដល់ទីតាំងកម្សាន្តក្បែរ វិទ្យាល័យហ៊ុនសែនមណ្ឌលគីរីជាច្រើនកន្លែង ដូចជា តារាងបាល់ទះ ស្នុកឃ័រ បុកប៊ីយែរ ហាងកាហ្វេ និងកន្លែងកម្សាន្តផ្សេងៗទៀត និងបានរកឃើញក្មេងដែលមានឯកសណ្ឋានសិស្សចំនួន១៨នាក់។ បើតាមសមត្ថកិច្ច សិស្សទាំងនោះបានចេញក្រៅសាលារៀននៅម៉ោង (លីប) ដូច្នេះបានអប់រំហើយបញ្ជូនត្រឡប់ទៅចូលរៀនវិញ។

លោកសង្កត់ធ្ងន់ថា​ ក្នុងករណីរកឃើញសិស្សគេចម៉ោងសិក្សា ហើយចូលលេងល្បែងដែលហាមឃាត់ សមត្ថកិច្ចនឹងចាត់វិធានការអនុវត្តយកមកកន្លែង និងហៅអាណាព្យាបាលមកធ្វើកិច្ចសន្យាជាជំហានដំបូង ហើយបើសិនករណីសមត្ថកិច្ចរកឃើញមិនរាងចាល និងសហការផ្តល់តួនាទីឱ្យលោកគ្រូនាយកចាត់ការតាមច្បាប់សាលាផងដែ។

យ៉ាងណាមិញ លោក កាន់ ពេញ អធិការក្រុងសែនមនោរម្យ បានអំពាវនាវទៅដល់ម្ចាស់ទីតាំងកម្សាន្ត ឬម្ចាស់ហាង ត្រូវរាយការណ៍ទៅសមត្ថកិច្ចក្នុងករណីឃើញមានសិស្សសាលាគេចម៉ោងសិស្សា ជាពិសេសចូលរួមអប់រំ ហាមក្មេងដែលមានឯកសណ្ឋានសិស្សចូលលេងល្បែងផ្សេងៗជាដាច់ខាត់។ លោកថ្លែងថា៖«បើសិនជាឃើញសិស្សមុខសញ្ញាដដែល សូមរាយការណ៍មកសមត្ថកិច្ចជាបន្ទាន់ ដែលធ្វើឱ្យជំនាញចុះទៅអប់រំទាន់ពេលវេលា»។

ក្នុងនាមអធិការនគរបាលក្រុង អំពាវនាវទៅដល់សិស្សានុសិស្សគ្រប់រូប យកពេលទំនេរអានសៀវភៅក្នុងបណ្ណាល័យ ព្យាយាមសិក្សារៀនសូត្រក្រេបជញ្ជក់ចំណេះវិជ្ជា ដើម្បីជាយុវជនធនធានមនុស្សសម្រាប់អភិវឌ្ឍខ្លួនឯងនៅថ្ងៃអនាគត និងចូលរួមកសាងសង្គមជាតិ៕

អត្ថបទ៖ រៀម សុខហេង