ព័ត៌មានជាតិ

យកតេស្តសំណាក អាជីវករផ្សារក្រោម ១៥៦នាក់ ពាក់ព័ន្ធអ្នកវិជ្ជមានកូវីដ១៩

បានផុស

៥ years មុន

នៅ

ថ្ងៃព្រហស្បតិ៍ ១៥ មេសា ២០២១

ដោយ

ប្រជាពលរដ្ឋ ក៏ដូចជាអាជីវករនៅផ្សារក្រោម ក្នុងភូមិវិហារចិន សង្កាត់ស្វាយដង្គំ ក្រុងសៀមរាប ជិត១៥៦នាក់ ស្រី ១១៦នាក់ បាននាំគ្នាមកយកសំណាកដើម្បីធ្វើតេស្តរកមេរោគកូវីដ១៩ តាមការអំពាវនាវរបស់អាជ្ញាធររខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការយកសំណាកនេះ ធ្វើឡើងបន្ទាប់ពីបានរកឃើញអាជីវករលក់គ្រឿងក្រអូបក្នុងផ្សារក្រោមនេះ មានវិជ្ជមានមេរោគកូវីដ១៩កាលពីថ្ងៃទី១២ ខែមេសា ឆ្នាំ២០២១។

តាមលោកវេជ្ជបណ្ឌិត ក្រុស សារ៉ាត់ ចាប់តាំងពីមានព្រឹត្តិការណ៍ឆ្លងសហគមន៍២០កុម្ភៈមក ខេត្តសៀមរាប រកឃើញអ្នកវិជ្ជមានចំនួន ១៧នាក់ និងព្យាបាលជាសះស្បើយចំនួន ៣នាក់។ លោកបន្តថា ក្នុងចំនួននេះមាន ៧នាក់ ជាករណីនាំចូលពីខេត្តក្រៅ ហើយមានមួយករណីនៃការនាំចូលនេះ បានបន្តការឆ្លងនៅក្នុងសហគមន៍ចំនួន១០នាក់។ ជាមួយការឆ្លងរាលដាលនេះ អាជ្ញាធរខេត្តសៀមរាប បានធ្វើការបិទទីតាំងមួយចំនួនជាបន្តបន្ទាប់ ដូចជាភូមិខ្វៀន ភូមិគោកតាចាន់ ផ្សារភូមិភាគ៤ ក្នុងសង្កាត់គោកចក និងចុងក្រោយនេះ គឺការបិទនូវផ្សារក្រោម ភូមិវិហារចិន សង្កាត់ស្វាយដង្គំ និងផ្សារវត្តអធ្វា ក្នុងភូមិកក្រាញ់ សង្កាត់សៀមរាប ក្រុងសៀមរាប។

រដ្ឋបាលខេត្ត សូមអំពាវនាវឲ្យបងប្អូនប្រជាពលរដ្ឋរស់នៅក្នុងខេត្តសៀមរាប សូមបង្កើនការប្រុងប្រយ័ត្នខ្ពស់ចូលរួមអនុវត្តវិធានការការពារ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។ ជាមួយគ្នានេះ រដ្ឋបាលខេត្តសៀមរាប សូមជម្រាបជូនបងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានខាងលើ ដែលមិនទាន់បានមកយកសំណាកដើម្បីធ្វើតេស្ត សូមប្រញាប់រួសរាន់ និងត្រូវធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ រដ្ឋបាលខេត្តសៀមរាប សង្ឃឹមយ៉ាងមុតមាំថា បងប្អូនប្រជាពលរដ្ឋទាំងអស់ ចូលរួមអនុវត្តឲ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាល៕