អាជ្ញាធរក្រុងប៉ោយប៉ែត អំពាវនាវឲ្យពលរដ្ឋជម្លៀសចេញឲ្យអស់ ខណៈស្ថានភាពកំពុងប្រុងជើងការខ្ពស់

អាជ្ញាធរក្រុងប៉ោយប៉ែត នៅរសៀលថ្ងៃទី១០ ខែធ្នូ ឆ្នាំ២០២៥នេះ តាមការណែនាំរបស់អាជ្ញាធរខេត្តបន្ទាយមានជ័យ បានប្រកាសឲ្យប្រជាពលរដ្ឋជម្លៀសចេញពីក្រុងប៉ោយប៉ែតឲ្យអស់ ខណៈស្ថានការណ៍នៅក្រុងប៉ោយប៉ែត កំពុងមានការប្រុងជើងការខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការប្រកាសរបស់អាជ្ញាធរ ស្ថានភាពផ្ទុះអាវុធនៅតាមបន្ទាត់ព្រំដែនរបស់ខេត្តបន្ទាយមានជ័យ មាន* ភូមិជោគជ័យ ភូមិព្រៃចាន់ និងបឹងត្រកួន ខណៈនៅព្រឹកថ្ងៃទី១០ធ្នូ នេះមានយន្តហោះចម្បាំងរបស់ ថៃ F-16 ក៏បានហោះ ឆ្វែលលើគោលដៅជាច្រើនកន្លែង ក្នុងក្រុងប៉ោយប៉ែត។

អាជ្ញាធរក្រុងប៉ោយប៉ែតបានឲ្យដឹងថា មកដល់ពេលនេះ ប្រជាពលរដ្ឋក្នុងក្រុងប៉ោយប៉ែត បានជម្លៀសទៅទីសុវត្ថិភាព ដែលអាជ្ញាធរខេត្តបានរៀបចំ និងទៅតាមតំបន់ផ្សេងៗ បានប្រមាណជា ៦០%ហើយ នៅសល់៤០%ទៀត ដែលពួកគាត់កំពុងតែបន្តរស់នៅ និងជម្លៀសជាបន្តបន្ទាប់។ អាជ្ញាធរនៅតែអំពាវនាវ តាមលទ្ធភាពដែលប្រជាពលរដ្ឋអាចធ្វើទៅបាន គឺ សូមឱ្យប្រជាពលរដ្ឋជម្លៀសចេញពីក្រុងប៉ោយប៉ែត។

សូមបញ្ជាក់ថា ក្រុងប៉ោយប៉ែតចាប់ផ្ដើមតានតឹងចាប់តាំងពីថ្ងៃទី៩ ធ្នូ បន្ទាប់ពីយោធាថៃ បានដាក់ពង្រាយរថពាសដែក នៅផ្សាររ៉ុងក្លឿ ឈមនឹងក្រុងប៉ោយប៉ែត និងបន្ទាប់ពីមានសំឡេងផ្ទុះអាវុធដែលស្នូរអាវុធទាំងនោះ ផ្ទុះនៅភូមិជោគជ័យ និងភូមិព្រៃចាន់ និងបន្ទាប់ពីអាជ្ញាធរថៃ បានបណ្ដេញ និងជម្លៀសពលរដ្ឋរបស់ខ្លួន និងអាជីវករខ្មែរនៅផ្សាររ៉ុងក្លឿ ចេញអស់កាលពីម្សិលមិញ។ យោធាថៃបានបាញ់ប្រហារមកលើយោធាកម្ពុជា លើទីតាំងរបស់ប្រទេសកម្ពុជា នៅខេត្តបន្ទាយមានជ័យតាំងពីរសៀលថ្ងៃទី៨ ធ្នូ រហូតមកដល់ពេលនេះ គឺពុំទាន់មានការថមថយនៅឡើយ៕

អត្ថបទ៖ អ ពៅ