BREAKING! អាជ្ញាធរហាមបង្ហោះដ្រូនក្នុងរាជធានីភ្នំពេញដាច់ខាត បើល្មើសត្រូវទទួលខុសត្រូវចំពោះមុខច្បាប់

រដ្ឋបាលរាជធានីភ្នំពេញ ហាមពលរដ្ឋបង្ហោះអាកាសយានគ្មានមនុស្សបើក ឬហៅថាដ្រូនគ្រប់ប្រភេទ ក្នុងភូមិសាស្ត្ររាជធានីភ្នំពេញជាដាច់ខាត។  រដ្ឋបាលរាជធានីភ្នំពេញដាក់ចេញបម្រាមនេះ នាថ្ងៃទី១៧ ខែធ្នូ   ដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយជូនពលរដ្ឋក្នុងភូមិសាស្ត្ររបស់ខ្លួន  ក្នុងកាលៈទេសៈដែលកម្ពុជាបន្តរងការឈ្លានពានពីសំណាក់យោធាថៃ។

រដ្ឋបាលរាជធានីភ្នំពេញ ក៏ព្រមានថា៖«ជនណាដែលបំពាន ឬប្រើប្រាស់អាកាសយានគ្មានមនុស្សបើក (ដ្រូន) ដោយគ្មានការអនុញ្ញាត ពីរដ្ឋបាលរាជធានីភ្នំពេញ ត្រូវទទួលខុសត្រូវទាំងស្រុងនៅចំពោះមុខច្បាប់ជាធរមាន។»។

ករណីប្រជាពលរដ្ឋរស់នៅរាជធានីភ្នំពេញ ប្រទះឃើញជនណាមួយបង្ហោះដ្រូន រដ្ឋបាលរាជធានី ប្រាប់ឱ្យរាយការណ៍ជាបន្ទាន់មកអាជ្ញាធរមានសមត្ថកិច្ច ឬទំនាក់ទំនងទៅលេខ Hotline ១២៩៩ ដើម្បីសមត្ថកិច្ចចាត់វិធានការឱ្យបានទាន់ពេលវេលា។

រដ្ឋបាលរាជធានី ក៏បានបញ្ជាឱ្យស្នងការដ្ឋាននគរបាល និងបញ្ជាការដ្ឋានកងរាជអាវុធហត្ថរាជធានីភ្នំពេញ និង គណៈបញ្ជាការឯកភាពរដ្ឋបាលខណ្ឌទាំង១៤ ត្រូវបង្កើនការយកចិត្តទុកដាក់ តាមដានចាត់ចែង និងគ្រប់គ្រងសភាពការណ៍ឱ្យបានល្អប្រសើរ ក្នុងករណីពិនិត្យឃើញមានជ​នណាលួចបង្ហោះដ្រូន  ត្រូវចាត់វិធានការជាបន្ទាន់។

ក្រសួងមហាផ្ទៃកាលពីថ្ងៃទី៩ ខែធ្នូ បានបញ្ជាទៅកាន់អភិបាលខេត្តជាប់ព្រំដែនជាមួយប្រទេសថៃត្រូវហាមឃាត់ ទប់ស្កាត់ការបង្ហោះអាកាសយានគ្មានមនុស្សបើក​ឬដ្រូនរបស់ជនស៊ីវិលឱ្យទាន់ពេលវេលា រហូតដល់សភាពការណ៍ជម្លោះព្រំដែនកម្ពុជាថៃវិល​មកធម្មតាឡើងវិញ។  

អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ឧត្ដមសេនីយ៍ឯក ជួន ណារិន្ទ ធ្លាប់បានបញ្ជាក់កាលពីថ្ងៃទី១៤ ខែធ្នូ ថា កងកម្លាំងជំនាញរបស់លោក បានតាមដានសភាពការណ៌ផ្សេងៗ ជាពិសេសពាក់ព័ន្ធនឹងការបង្ហោះអាកាសយានគ្មានមនុស្សបើក ឬដ្រូនក្នុងភូមិសាស្ត្ររាជធានីភ្នំពេញជាប់ជាប្រចាំ។

ក្រសួងការពារជាតិកម្ពុជា បានបញ្ជាក់ថា ក្នុងសង្គ្រាមដែលថៃឈ្លានពានមកលើកម្ពុជា យោធាថៃបានប្រើប្រាស់ដ្រូនស៊ើបការណ៍ហោះចូលមកក្នុងដែនអធិបតេយ្យកម្ពុជា និងប្រើប្រាស់ដ្រូនទម្លាក់គ្រាប់បែកថែមទៀតផង៕

ដោយ៖ ង៉ិល ណារ៉ាត់