អភិបាលស្រុកសំបូរចុះសួរសុខទុក្ខវីរកង​ទ័ពរងរបួសពីសង្រ្គាមឈ្លានពានរបស់​ថៃ

វីរកងទ័ពជួរមុខម្នាក់ ដែលរងរបួសដោយគ្រាប់ផ្លោងខ្មាំងសៀម ត្រូវរបួសត្រង់ចំនុចឆ្អឹងខ្នង និងត្រគាក និងបានព្យាបាលនៅមន្ទីរពេទ្យខេត្តសៀមរាប បច្ចុប្បន្នបាននឹងកំពុងបន្តមកសម្រាកព្យាបាលនៅផ្ទះម្ដាយស្ថិតក្នុងឃុំសំបូរ ស្រុកសំបូរ ខេត្តក្រចេះ។ នេះតាមការឱ្យដឹងពីលោក គង់ មេត្តា អភិបាលស្រុកសំបូរ នៅថ្ងៃនេះ។

លោក គង់ មេត្តា បានបន្តឱ្យដឹងថា នាថ្ងៃទី១៦ ខែធ្នូ ឆ្នាំ២០២៥ ម្សិលមិញ​នេះ លោកនិងក្រុមការងារ បានចុះជួប​សួរសុខ​ទុក្ខដល់វីរកងទ័ពជួរមុខម្នាក់ ឈ្មោះ តូច វីរៈ ឋានន្តរស័កិ្ត នាយចំណង់នៅក្នុងកងពលធំអន្តរាគមន៍លេខ២ នៃយោធភូមិភាគ៤ ដែលជាវីរកងទ័ព ឈរជើងទប់ទល់ខ្មាំងនៅចំនុចប្រាសាទតាក្របីបានរងរបួស កាលពីថ្ងៃទី៩ ខែធ្នូ ឆ្នាំ២០២៥ ដោយគ្រាប់ផ្លោងខ្មាំងសៀម ដែល​ពេលនេះកំពុងស្នាក់នៅបណ្ដោះអាសន្ន នៅក្នុងឃុំសំបូរ ស្រុកសំបូរ។

លោក​បាននាំយកស្បៀងអាហារ សម្ភារៈប្រើប្រាស់ និងថវិកាមួយចំនួនទៅប្រគល់ជូនដល់គ្រួសារវីរកងទ័ពចំនួន ០១​គ្រួសារ និងគ្រួសារភៀសសឹកចំនួន ៦ គ្រួសារផ្សេងទៀត ដែលកំពុងស្នាក់នៅបណ្ដោះអាសន្ននៅក្នុងឃុំសំបូរ ស្រុកសំបូរ។ 

លោកអភិបាលស្រុក បានលើកទឹកចិត្ត និងអរគុណជាខ្លាំងចំពោះវីរភាពដ៏អង់អាចក្លា​ហាន របស់នាយចំណង់ តូច វីរៈ និងវីរកងទ័ពទាំងអស់ ដែល​បានធ្វេីជាខែលដ៏រឹងមាំ និងកំពុងបំពេញភារកិច្ចនៅសមរភូមិមុខ ក្នុងការការពារអធិបតេយ្យភាព និង បូរណភាពទឹកដី។

គិតត្រឹមថ្ងៃ១៦ ខែធ្នូ ឆ្នាំ២០២៥ ម្សិលមិញនេះ ស្រុកសំបូរមានជនភៀសសឹក មកពីតំបន់ព្រំដែនខ្មែរ-សៀម មកស្នាក់នៅបណ្ដោះអាសន្នសរុបចំនួន ២៣ គ្រួសារ ស្មេី ៧២នាក់៕

អត្ថបទ៖ ប្រុញ វិធិន