អាម៉េរិកមើលឃើញថាកម្ពុជាគ្មានចេតនាឡើយ ចំពោះករណីផ្ទុះគ្រាប់នៅមុំបី កាលពីថ្ងៃទី៦ ខែមករា

សហរដ្ឋអាម៉េរិកមើលឃើញថា កម្ពុជាគ្មានចេតនាឡើយ ចំពោះករណីផ្ទុះគ្រាប់មួយគ្រាប់នៅតំបន់មុំបី កាលពីព្រឹកថ្ងៃទី៦ ខែមករា ឆ្នាំ២០២៦ ដែលកើតឡើងរយៈពេលជាង១សប្ដាហ៍ក្រោយបទឈប់បាញ់ជាបន្ទាន់រវាងកម្ពុជា-ថៃ បានចូលជាធរមាន។  

អនុរដ្ឋមន្រ្តីការប្រទេសសហរដ្ឋអាមេរិក​សម្រាប់​កិច្ចការ​អាស៊ី​ខាងកើត និង​ប៉ាស៊ីហ្វិក Michael George DeSombre  ថ្លែង​នៅ​ថ្ងៃទី ៩ ខែមករា ឆ្នាំ២០២៦ ក្នុង​សន្និសីទ​សារព័ត៌មាន​តាមអនឡាញ​ពីទីក្រុង​បាងកក ដូច្នេះ ៖«វាហាក់ដូចជាការផ្ទុះនូវគ្រាប់ដែលមិនចេតនាពីកម្ពុជា ទៅកាន់ថៃ។ …។ មេបញ្ជាការនិយាយផ្ទាល់ និងសម្រេចថា មិនមានការប្រឆាំងតបវិញនោះទេ…។ ដោយចង់បង្ហាញពីការគោរព និងពង្រឹងនៃកិច្ចព្រមព្រៀងនៃបទឈប់បាញ់នេះ។ »។

បើតាមក្រសួងការពារជាតិកម្ពុជា មានករណីផ្ទុះគ្រាប់ចេញពីគំនរសំរាមចំនួន១គ្រាប់ នៅវេលាម៉ោង ៧៖២៧នាទីព្រឹក ថ្ងៃទី៦ ខែមករា ឆ្នាំ២០២៦ ក្នុងភូមិសាស្ត្រមុំបី ខេត្តព្រះវិហារ  ក្នុងពេលដែលកងកម្លាំងកម្ពុជាកំពុងរៀបចំសណ្តាប់ធ្នាប់ និងរបៀបរៀបរយ នៅមូលដ្ឋានឈរជើងរបស់ខ្លួនក្នុងដែនអធិបតេយ្យរបស់កម្ពុជា។ ករណីនេះ បណ្តាលឱ្យកងកម្លាំងកម្ពុជា២នាក់ដែលកំពុងបំពេញការងារនៅទីនោះរងរបួសធ្ងន់និងស្រាល។  ករណីនេះមិនបណ្ដាលឱ្យមានការតានតឹង​ឬឈានដល់ការផ្ទុះអាវុធឡើងវិញឡើយ។

តាមក្រសួងការពារជាតិកម្ពុជា ភ្លាមៗក្រោយមានករណីនេះ ក្រុមការងារសម្របសម្រួលរវាងភាគីកម្ពុជា-ថៃ បានធ្វើការរួមគ្នា ដោយបានសាកសួរ និងផ្តល់ព័ត៌មាន ដើម្បីដោះស្រាយជាមួយគ្នា ទប់ស្កាត់ស្ថានការណ៍កុំឱ្យមានភាពតានតឹងឡើងវិញ។

ទោះបីជាយ៉ាង ភាគីថៃបានចោទប្រកាន់ថាកម្ពុជា ជាអ្នកប្រើកាំភ្លើងត្បាល់បើកការបាញ់ប្រហារទៅលើទីតាំងឈរជើងរបស់ខ្លួនបណ្ដាលឱ្យកូនទាហានថៃម្នាក់រងរបួសស្រាល។ ថៃបានយកករណីនេះ ចោទប្រកាន់ និងគំរាមបើកការវាយប្រហារមកលើកម្ពុជាជាថ្មីម្ដងទៀត ប្រសិនបើមានករណីផ្ទុះគ្រាប់ជាលើកទី២។ បើទោះបីជាថៃចោទប្រកាន់ និងគំរាមបែបនេះក្ដី ក្រសួងការពារជាតិកម្ពុជា មិនបានតបតអ្វីទៅកាន់ភាគីថៃឡើយ។

បន្ទាប់ពីនេះ ក៏មានការបញ្ជាក់ពីក្រសួងមហាផ្ទៃកម្ពុជាថា រយៈពេល៣យប់ជាប់ៗគ្នា នៅដើមខែមករា នេះ ភាគីថៃបានបង្ហោះដ្រូនជាច្រើនគ្រឿងរំលោភចូលមកក្នុងដែនអាកាសកម្ពុជាជាច្រើនគ្រឿងក្នុងដែនអធិបតេយ្យ និងបូរណភាពទឹកដីកម្ពុជានៅខេត្តកោះកុង ពោធិ៍សាត់ និងព្រះវិហារជាដើម។ តាមក្រសួងមហាផ្ទៃនៅយប់ថ្ងៃទី៧ ខែមករា ភាគីថៃ បានបង្ហោះដ្រូនចូលមកក្នុងដែនអាកាសកម្ពុជាចំនួន២៧គ្រឿង ក្នុងនោះបង្ហោះចំនួន២៥គ្រឿងចូលមកក្នុងដែនអាកាសនៅខេត្តព្រះវិហារ និង២គ្រឿងទៀតនៅខេត្តពោធិ៍សាត់។ យ៉ាងណាភាគីថៃ មិនបានប្រតិកម្ម ឬច្រានចោលអ្វីដែលក្រសួងមហាផ្ទៃកម្ពុជាបានអះអាងឡើយ៕

ដោយ៖ង៉ិល ណារ៉ាត់