ផ្លូវ៤ខ្សែក្នុងក្រុងខេមរភូមិន្ទ ត្រូវបានកែលម្អលើកកម្ពស់គុណភាពប្រើប្រាស់

ផ្លូវកៅស៊ូចំនួន៤ខ្សែដែលហួសសុពលភាពប្រើប្រាស់ ត្រូវបានរដ្ឋបាលខេត្តកោះកុង ផ្តើមជួសជុលកែលម្អឱ្យល្អប្រសើរឡើងវិញ ដើម្បីលើកកម្ពស់គុណភាពបម្រើដល់ការធ្វើដំណើរប្រកបដោយសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ូច ពន្លក នាយកទីចាត់ការផែនការ និងវិនិយោគសាលាខេត្តកោះកុង បានឱ្យដឹងនៅថ្ងៃទី១៤ ខែមករា ឆ្នាំ២០២៤ ថា ផ្លូវកៅស៊ូ៤ខ្សែដែលនឹងកែលម្អ ទី១ ពីរង្វង់មូលយាយរែកផ្លែឈើ ទៅកែងផ្លូវទល់មុខផ្សារក្តាម ទី២ ពីកែងផ្លូវផ្ទះពេទ្យម៉ឹង ទៅទល់កំពង់ផែក្រុងខេមរភូមិន្ទ ទី៣ ចាប់ពីផ្លូវកែងអគារធនាវឌ្ឍនៈទៅកែងផ្លូវពន្ធដារខេត្ត និងទី៤កែងផ្លូវ៤៨ ឆ្ពោះទៅកាន់ខាងលិចផ្សារដងទង់។

បើតាមលោក អ៊ូច ពន្លក គម្រោងលើកកម្រិតគុណភាពផ្លូវដែលហួសសុពលភាពប្រើប្រាស់លំបាកការធ្វើដំណើរចរាចរណ៍ទៅមករបស់ប្រជាពលរដ្ឋ និងអ្នកទេសចរមកលេងកម្សាន្តក្នុងខេត្ត។ ហើយគម្រោងកែលម្អផ្លូវទាំង៤ខ្សែលើកជាកញ្ចប់ថវិកាប្រើប្រាស់របស់រដ្ឋបាលខេត្ត។

ដោយឡែកលោក វីរៈ និងអ្នកស្រី លក្ខ័ណ ជាប្រជាពលរដ្ឋរស់នៅសងខាងផ្លូវដែលកំពុងជួសជុល បានសម្តែងក្តីរីករាយ បន្ទាប់ពីមានការកែលម្អផ្លូវដែលរងខូចខាតឡើងវិញ ដើម្បីងាយស្រួលធ្វើដំណើរចរាចរណ៍ដោយសុវត្ថិភាព។ ទោះយ៉ាងណាពួកគាត់ស្នើដល់រដ្ឋបាលខេត្ត និងមន្ទីរពាក់ព័ន្ធបន្តពិនិត្យកែលម្អផ្លូវដ៏ទៃទៀតក្នុងក្រុងខេមរភូមិន្ទ ព្រោះថាវាក៏ខូចខាតខ្លះផងដែរ៕

អត្ថបទ៖ សិរីវឌ្ឍនៈ