អាម៉េរិកគ្រោងធ្វើសមយុទ្ធឆ្មាំអង្គរជាមួយកម្ពុជាឡើងវិញនៅចុងឆ្នាំនេះ ឬដើមឆ្នាំ២០២៧

សហរដ្ឋអាម៉េរិក គ្រោងធ្វើសមយុទ្ធឆ្មាំអង្គរជាមួយកម្ពុជាឡើងវិញនៅចុងឆ្នាំ២០២៦ នេះ ឬដើមឆ្នាំ២០២៧ខាងមុខ ស្របពេលដែលបច្ចុប្បន្នកំពុងធ្វើផែនការ។ នេះបើតាមការថ្លែងរបស់នាយឧត្ដមនាវី Samuel Paparo មេបញ្ជាកងទ័ពជើងទឹកសហរដ្ឋអាម៉េរិកប្រចាំតំបន់ឥណ្ឌូប៉ាស៊ីហ្វិក ក្នុងសន្និសីទសារព័ត៌មានធ្វើចេញពីមូលដ្ឋានសមុទ្ររាម   នាល្ងាចថ្ងៃទី២៦ ខែមករា បន្ទាប់ពីបានជួបពិភាក្សាការងារជាមួយនាយករដ្ឋមន្ត្រី និងជាមួយប្រមុខការពារជាតិកម្ពុជា  និងទស្សនកិច្ចនៅមូលដ្ឋានសមុទ្ររាមកងទ័ពជើងទឹកកម្ពុជា។

នាយឧត្ដមនាវី Samuel Paparo មេបញ្ជាកងទ័ពជើងទឹកអាម៉េរិកប្រចាំឥណ្ឌូប៉ាស៊ីហ្វិក ថ្លែងដូច្នេះ៖ «ការធ្វើផែនការចាប់ផ្តើមជាថ្មីយ៉ាងយកចិត្តទុកដាក់ សម្រាប់សមយុទ្ធឆ្មាំអង្គរ (Angkor Sentinel) នៅចុងខែកុម្ភៈ ឬដើមខែមីនា។ ការរំពឹងទុករបស់យើងគឺថា យើងនឹងធ្វើលំហាត់សមយុទ្ធនៅចុងឆ្នាំនេះ ឆ្នាំ២០២៦ ឬដើមឆ្នាំ២០២៧»។

កម្ពុជា និងសហរដ្ឋអាម៉េរិក បានចាប់ដៃគ្នាបង្កើតទំនាក់ទំនងការទូតជាផ្លូវការ នៅថ្ងៃទី១១ ខែកក្កដា ឆ្នាំ១៩៥០ ក្រោយពេលសង្គ្រាមលោកលើកទី២បញ្ចប់ទៅ។ នៅឆ្នាំ២០១០ ស្របពេលដែលទំនាក់ទំនងការទូតទ្វេភាគី ឈានដល់វ័យ៦០ឆ្នាំ  អាម៉េរិក បានចាប់ដៃកម្ពុជារួមគ្នាធ្វើជាសមយុទ្ធ «ឆ្នាំអង្គរ» ជាលើកដំបូង ក្នុងប្រវត្តិសាស្ត្រនៃវិស័យការពារជាតិនៃប្រទេសទាំងពីរ។  

ភាគីទាំងបានបន្តធ្វើសមយុទ្ធរួមគ្នានៅរៀងរាល់ឆ្នាំនីមួយៗ រយៈពេល៧លើកជាប់ៗគ្នា ដោយផ្ដោតទៅលើប្រធានបទ ប្រតិបត្តិ​ការរក្សា​សន្តិភាព ជំនួយ​មនុស្សធម៌ និង​ការឆ្លើយតប​នឹង​គ្រោះមហន្តរាយ ដែលប្រធានបទនេះ គឺដូចទៅនឹងប្រធានបទដែលកម្ពុជា ធ្វើសមយុទ្ធជាមួយប្រទេសដទៃទៀតដែរ។

យ៉ាងណា សមយុទ្ធឆ្មាំអង្គរ ត្រូវបានផ្អាកសកម្មភាពនៅក្នុងឆ្នាំ២០១៧។ ជិត១០ឆ្នាំហើយ បើគិតចាប់តាំងពីពេលនោះមកដល់ខែចុងខែមករា ឆ្នាំ២០២៦ នេះ  សមយុទ្ធឆ្មាំអង្គរ ត្រូវបានជាប់គាំង មិនទាន់បានធ្វើឡើងវិញឡើយ ទោះបីជារាល់ជំនួបរវាងថ្នាក់ដឹកនាំកំពូល ជំនួបរវាងមេដឹកនាំយោធាប្រទេសទាំងពីរ បានជជែកពីការរៀបចំសមយុទ្ធឆ្មាំអង្គរឡើងវិញម្ដងហើយម្ដងទៀតក៏ដោយ៕

ដោយ៖ ង៉ិល ណារ៉ាត់