ផ្លូវក្រាលដីល្បាយក្រួសចំនួនពីរខ្សែ នៅក្នុងខេត្តរតនគិរី ត្រូវបានលើកម្ពស់គុណភាព

ផ្លូវក្រាលដីល្បាយក្រួសចំនួនពីរខ្សែ ស្ថិតនៅស្រុកលំផាត់ ខេត្តរតនគិរី ត្រូវបានកែលម្អ ជួសជុល ដើម្បីលើកកម្ពស់កម្រិតផ្លូវជនបទ សម្រួលដល់ការធ្វើដំណើររបស់ប្រជាពលរដ្ឋមូលដ្ឋាន ជាពិសេសងាយស្រួលក្នុងការដឹកជញ្ជូនកសិផលទៅកាន់ទីប្រជុំជន។

ផ្លូវចំនួនពីរខ្សែនោះរួមមាន គម្រោងទី១ ការងារជួសជុលស្តារឡើងវិញផ្លូវក្រាលដីល្បាយក្រួសចំនួន ១ខ្សែ ប្រវែង ៨ ១០០ម ទទឹង ៩ម កម្រាស់ ០,២ម សាងសង់លូមូលមុខពីរចំនួន ១កន្លែង លូមូលមុខមួយចំនួន ៣កន្លែង លូមូលមុខមួយមានស្លាបជញ្ជាំងខ្លីចំនួន ១កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិកាណាងកិត និងភូមិកាឡែង ឃុំកាឡែង ស្រុកលំផាត់។ គម្រោងទី២ ការងារជួសជុលផ្លូវក្រាលដីល្បាយក្រួសចំនួន ១ខ្សែ ប្រវែង ៩ ០០០ម ទទឹង ៩ម កម្រាស់ ០,១២ម សាងសង់ទំនប់បង្ហៀរប្រវែង ៦០ម ទទឹង ៧ម ចំនួន ១កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិពួក និងភូមិបាតាង ឃុំបាតាង ស្រុកលំផាត់ (បញ្ចប់សុពលភាព)។

ដើម្បីពិនិត្យគុណភាពផ្លូវ រដ្ឋលេខាធិការប្រចាំការ ក្រសួងអភិវឌ្ឍន៍ជនបទ លោក ឈឹម សៅគី កាលពីថ្ងៃទី ២៨ ខែមករា បានដឹកនាំគណៈកម្មការអន្តរក្រសួង រួមមានតំណាងក្រសួងសេដ្ឋកិច្ច និងហិរញ្ញវត្ថុ ដែលមានការចូលរួមពី មន្ត្រីរាជការ មកពីអន្តរក្រសួង សេដ្ឋកិច្ចនិងហិរញ្ញវត្ថុ ប្រធានមន្ទីរអភិវឌ្ឍន៍ជនបទខេត្ត និងតំណាងកងវិស្វកម្ម បានចុះត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ កែលម្អ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ.)  វាយតម្លៃ និងបញ្ចប់សុពលភាព។

នៅចំពោះមុខប្រជាពលរដ្ឋ លោក ឈឹម សៅគី បានលើកឡើងថា ហេដ្ឋារចនាសម្ព័ន្ធនេះ បានរួមចំណែកអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលបានដាក់ចេញនូវគោលនយោបាយជាតិ ស្តីពីការអភិវឌ្ឍជនបទ ឆ្នាំ២០២៥-២០៣៥ កំណត់ចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន និងចីរភាព ទាំងផ្នែកសេដ្ឋកិច្ច សង្គមកិច្ច និងវប្បធម៌” ។ ព្រមទាំងបានកំណត់យុទ្ធសាស្រ្តគន្លឹះ អភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាធន់។

ឆ្លៀតឱកាសនោះ លោក ឈឹម សៅគី រដ្ឋលេខាធិការប្រចាំការ បានសំណូមពរទៅកាន់ អាជ្ញាធរ និងប្រជាពលរដ្ឋ ដែលប្រើប្រាស់ផ្លូវសាធារណៈ ជួយថែទាំផ្លូវទាំងនេះឱ្យបានដិតដល់ដើម្បីធានាថាផ្លូវនេះអាចប្រើប្រាស់បានយូរអង្វែង និងបម្រើផលប្រយោជន៍ជូនប្រជាពលរដ្ឋ៕

ដោយ៖ ខៀវ ចាប