កម្ពុជាប្រតិកម្មនឹងការដាក់ទូរកុងតឺន័ររបស់យោធាថៃនៅតំបន់អានសេះ ក្នុងដីកម្ពុជា

ក្រសួងការបរទេសកម្ពុជាតវ៉ាជាផ្លូវការប្រឆាំងនឹងការដាក់កុងតឺន័រពីសំណាក់កងកម្លាំងប្រដាប់អាវុធថៃ នៅតំបន់អានសេះ ដែលស្ថិតក្នុងភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ។ សកម្មភាពរបស់កម្លាំងថៃបែបនេះ ត្រូវបានក្រសួងការបរទេសកម្ពុជា ចាត់ទុកថា ជាការរារាំងដល់ការចូលទៅកាន់ច្រកព្រំដែនអន្តរជាតិអានសេះ ដោយរំលោភទៅលើដែនអធិបតេយ្យជាតិរបស់កម្ពុជា។

ក្នុងលិខិតតវ៉ា ចុះថ្ងៃទី៤ ខែកុម្ភៈ ឆ្នាំ២០២៦ ក្រសួងការបរទេសកម្ពុជា បានបញ្ជាក់ថា សកម្មភាពនេះបានរំលោភបំពានយ៉ាងជាក់ច្បាស់លើអធិបតេយ្យ និងបូរណភាពទឹកដីរបស់កម្ពុជា ដែលអាចនឹងធ្វើឱ្យមានការផ្លាស់ប្តូរបរិយាកាសសន្តិសុខនៅក្នុង និងជុំវិញតំបន់ស៊ីវិល ដោយការពង្រឹងការគ្រប់គ្រង់ដោយយោធា ឬ បង្កើតស្ថានភាពថ្មីនៅលើទីតាំងជាក់ស្តែង ដែលធ្វើឱ្យប៉ះពាល់ដល់កិច្ចខិតខំប្រឹងប្រែងកាត់បន្ថយភាពតានតឹង និងរារាំងដល់ការវិលត្រឡប់ដោយសុវត្ថិភាព និងថ្លៃថ្នូររបស់ប្រជាជនស៊ីវិលទៅកាន់ផ្ទះសម្បែង និងទ្រព្យសម្បត្តិរបស់ពួកគេវិញ។

ក្រសួងការបរទេស បញ្ជាក់ពីការជំទាស់របស់កម្ពុជាយ៉ាងដាច់អហង្ការចំពោះសកម្មភាពខុសច្បាប់នេះ ដែលជាការពង្រឹងការកាន់កាប់លើទឹកដីកម្ពុជាដោយប្រទេសថៃ ហើយសកម្មភាពនេះ កម្ពុជា ថា ផ្ទុយនឹងវិធានការកាត់បន្ថយភាពតានតឹង ដែលមានចែងក្នុងសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ កាលពីថ្ងៃទី២៧ ខែធ្នូ ឆ្នាំ២០២៥កន្លងទៅ ព្រមទាំងបំពានទៅនឹងធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។

ជាថ្មីម្ដងទៀត កម្ពុជាទាមទារឱ្យភាគីថៃងាកមកស្វែងរកដំណោះស្រាយដោយសន្តិវិធី ផ្អែកលើច្បាប់អន្តរជាតិ ខណៈកម្ពុជានៅតែប្តេជ្ញាចិត្តយ៉ាងខ្ជាប់ខ្ជួន និងឥតងាករេ ក្នុងការស្វែងរកដំណោះស្រាយប្រកបដោយមិត្តភាពចំពោះចំពោះជម្លោះព្រំដែនទាំងអស់ជាមួយប្រទេសថៃ ក្នុងនាមជាប្រទេសជិតខាង តាមរយៈមធ្យោបាយសន្តិភាព ស្របតាមច្បាប់អន្តរជាតិ។ ដោយឡែក ការផ្លាស់ប្តូរព្រំដែនដោយប្រើកម្លាំងប្រដាប់អាវុធ កម្ពុជា មិនទទួលស្គាល់ឡើយ៕