ព័ត៌មានជាតិ

អភិបាលខណ្ឌឫស្សីកែវ ចុះពិនិត្យសណ្ដាប់ធ្នាប់ផ្សារសាំហាន់ និងសិក្សាគម្រោងជួសជុលហេដ្ឋារចនាសម្ព័ន្ធ

បានផុស

៥ ខែ មុន

នៅ

ថ្ងៃព្រហស្បតិ៍ ៥ កុម្ភៈ ២០២៦

ដោយ

កាលពីល្ងាចថ្ងៃទី ០៤ ខែកុម្ភៈ ឆ្នាំ ២០២៦ ម្សិលមិញ រដ្ឋបាលខណ្ឌឫស្សីកែវ ដឹកនាំដោយ លោក ជិន ប៊ុនធឿន អភិបាលខណ្ឌឫស្សីកែវ និង លោក ឡុង ង៉ែត អភិបាលរងខណ្ឌ ព្រមទាំងមន្ត្រីជំនាញពាក់ព័ន្ធ នៃរដ្ឋបាលខណ្ឌ និងរដ្ឋបាលសង្កាត់ បានចុះសួរសុខទុក្ខ សំណេះសំណាល និងពិនិត្យស្ថានភាពជាក់ស្ដែងជាមួយប្រជាពលរដ្ឋដែលជាអាជីវករលក់ដូរនៅផ្សារសាំហាន់ និង ផ្សារឫស្សីកែវថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរចុះពិនិត្យនេះ គណៈដឹកនាំខណ្ឌបានផ្តោតសំខាន់ទៅលើការពិនិត្យសណ្ដាប់ធ្នាប់សាធារណៈ អនាម័យបរិស្ថាន សុវត្ថិភាព និងលក្ខខណ្ឌជុំវិញបរិវេណផ្សារ ព្រមទាំងសិក្សាគម្រោង ជួសជុល និងស្ថាបនាផ្លូវក្នុងមូលដ្ឋាន ដើម្បីឆ្លើយតបតម្រូវការរស់នៅ និងការប្រកបអាជីវកម្មរបស់ប្រជាពលរដ្ឋឲ្យកាន់តែល្អប្រសើរ។

នាឱកាសនោះ លោក ជិន ប៊ុនធឿន បានថ្លែងអំណរគុណ និងកោតសរសើរដល់អាជីវករលក់ដូរទាំងអស់ ដែលបានចូលរួមយ៉ាងសកម្មក្នុងការថែរក្សាអនាម័យបរិស្ថាន និងសណ្ដាប់ធ្នាប់ក្នុងផ្សារ ឲ្យមានភាពស្អាត រៀបរយ និងមានសុវត្ថិភាពជាបន្តបន្ទាប់។ ជាមួយគ្នានេះ លោកអភិបាលខណ្ឌ ក៏បានស្នើសុំឲ្យម្ចាស់ផ្សារទាំងពីរ ពង្រឹងប្រព័ន្ធពន្លត់អគ្គិភ័យ ដោយត្រូវរៀបចំឧបករណ៍ពន្លត់អគ្គិភ័យឲ្យគ្រប់គ្រាន់ និងងាយស្រួលប្រើប្រាស់ ដើម្បីអាចអន្តរាគមន៍បានទាន់ពេលវេលា ក្នុងករណីមានគ្រោះអគ្គិភ័យកើតឡើងជាយថាហេតុ។

លោកអភិបាលខណ្ឌ គូសបញ្ជាក់ថា រដ្ឋបាលខណ្ឌឫស្សីកែវ នឹងបន្តយកចិត្តទុកដាក់ខ្ពស់ក្នុងការអភិវឌ្ឍហេដ្ឋារចនាសម្ព័ន្ធមូលដ្ឋាន ដោយគ្រោងនឹងបើកការដ្ឋានជួសជុល និងស្ថាបនាផ្លូវឡើងវិញ រៀបចំប្រព័ន្ធលូបង្ហូរទឹក ដាក់ធុងសំរាមតាមដងផ្លូវ និងដំឡើងបង្គោលភ្លើងបំភ្លឺផ្លូវបន្ថែម ដើម្បីធានាឲ្យមានភាពងាយស្រួល និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ជាពិសេសនៅពេលយប់ និងជួយគាំទ្រដល់ការប្រកបអាជីវកម្មរបស់អាជីវករដែលលក់ដូររហូតដល់យប់ជ្រៅ។

លើសពីនេះទៅទៀត លោកអភិបាលខណ្ឌ ក៏បានបញ្ជាកម្លាំងជំនាញឲ្យត្រៀមប្រើប្រាស់រថយន្តបាញ់ទឹក លាងសម្អាតផ្លូវជុំវិញបរិវេណផ្សារ ក្នុងពេលឆាប់ៗ ខាងមុខ ដើម្បីលើកកម្ពស់អនាម័យបរិស្ថាន សោភ័ណភាពទីក្រុង និងបង្កើនគុណភាពជីវិតរបស់ប្រជាពលរដ្ឋក្នុងមូលដ្ឋាន៕

អត្ថបទ ៖ សំណាង