ព័ត៌មានជាតិ

ទិន្នផលពោតក្រហមមិនប្រឈមទីផ្សារក្នុងស្រុក ខណៈតម្លៃបានប្រហាក់ប្រហែលឆ្នាំកន្លងទៅ

បានផុស

៣ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

ការប្រមូលទិន្នផលពោតក្រហមរបស់ប្រជាកសិករក្នុងខេត្តបាត់ដំបង ឆ្នាំនេះទទួលបានទិន្នផលល្អប្រសើរជាងឆ្នាំកន្លងទៅ ហើយសម្រាប់ទីផ្សារក្នុងស្រុកក៏មិនប្រឈមនោះដែរ។

កសិករនៅតាមបណ្តាស្រុកគោលដៅក្នុងខេត្តបាត់ដំបងបានអះអាងថា ដំណាំពោតឆ្នាំនេះលូតលាស់បានល្អ ហើយគ្រាប់ពោតក៏ដាក់ម្សៅ និងឡើងពណ៌ក្រហមស្រុះគ្នាបានតាមតម្រូវការទីផ្សារ មិនមានស្កកគ្រាប់ច្រើនដូចឆ្នាំកន្លងទៅនោះទេ។

អ្នកស្រី វ៉ាន់ សាវៀន កសិករក្នុងខេត្តបាត់ដំបងបានឲ្យដឹងថា ឆ្នាំនេះអ្នកស្រីបានដាំពោតក្រហមលើផ្ទៃដី ១០ ហិកតា លើទីតាំង ២ ផ្សេងគ្នា កើនជាងឆ្នាំមុនចំនួន ៣ ហិកតា។ ស្របទិន្នផលដូចតាមការរំពឹងទុក កសិកររូបនេះបានបញ្ជាក់ថា ពោតក្រហមឆ្នាំនេះបានរក្សាតម្លៃប្រហាក់ប្រហែលឆ្នាំកន្លងទៅ ខណះទីផ្សារមិនប្រឈមនោះដែរ។

អ្នកស្រី វ៉ាន់ សាវឿន ក្រៅពីមានផ្ទៃដីដាំពោតក្នុងស្រុករតនះមណ្ឌលក្នុងខេត្តបាត់ដំបង ក៏បានពង្រីកផ្ទៃដីដាំដុះនៅក្នុងខេត្តប៉ៃលិនមួយចំនួនធំផងដែរ។

អ្នកស្រី វ៉ាន់ សាវឿន បានបន្តថា ក្រោយពីអ្នកស្រីលក់ពោតរបស់ខ្លួនអស់ អ្នកស្រីក៏បានដើរទិញពីកសិករនៅក្នុងស្រុកបាណន់មួយចំនួនផងដែរ ដើម្បីយកចំណេញក្បាលកាក់ខ្លះស្របតាមតាមទីផ្សារក្នុងស្រុកធំទូលាយផង ដោយលក់បានតម្លៃក្នុង ១ គីឡូក្រាម ៥២០ រៀល ខណះឆ្នាំកន្លងទៅអ្នកស្រីលក់បានចន្លោះពី ៤៨០ រៀល – ៥១០ រៀលប៉ុណ្ណោះ។

លោក ហេង សិទ្ធ ទទួលបន្ទុកការិយាល័យស្ថិតរបស់មន្ទីរកសិកម្មខេត្តបាត់ដំបងបានឲ្យដឹងថា ពោតក្រហមក្នុងខេត្តបាត់ដំបង មានកសិករដាំដុះលើផ្ទៃដីសរុប ៨៩,៦៩០០ ហិកតា។ ចំណែកទីផ្សារតម្លៃប្រហាក់ប្រហែលឆ្នាំមុន តែបើកសិករដាំដុះមានគុណភាពល្អ អាចបានតម្លៃលើសឆ្នាំមុនខ្លះផងដែរ៕

អត្ថបទ÷សៅ សារិទ្ធ