ព័ត៌មានជាតិ

អ្នកនាំពាក្យក្រសួងការងារស្នើឱ្យនារីម្នាក់ដែលបង្ហោះថានាងត្រូវគេបញ្ឈប់ព្រោះដេកក្នុងម៉ោងសម្រាកដាក់បណ្ដឹងមកក្រសួង

បានផុស

៥ ខែ មុន

នៅ

ថ្ងៃពុធ ១១ កុម្ភៈ ២០២៦

ដោយ

អ្នកនាំពាក្យក្រសួងការងារលោក ស៊ុន មេសា បានស្នើដល់បុគ្គលិកក្រុមហ៊ុន កម្មករ កម្មការិនីរោងចក្រ និងអ្នកដែលធ្វើការស្ថិតក្រោមច្បាប់ការងារទាំងអស់រាល់ពេលមានបញ្ហាកន្លែងការងារដាក់ពាក្យប្ដឹងមកកាន់ក្រសួងដើម្បីឱ្យក្រសួងចាត់វិធានការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក ស៊ុន មេសា គឺបន្ទាប់ពីមានករណីនារីម្នាក់បានបង្ហោះលើបណ្ដាញសង្គមថានាងត្រូវបានកន្លែងការងារបណ្ដេញចេញដោយសារបានគេងថ្ងៃត្រង់។ លោក ស៊ុន មេសា បានស្នើដល់នារីដែលបង្ហោះនោះដាក់បណ្ដឹងមកកាន់ក្រសួងដើម្បីឱ្យក្រសួងមានចំណាត់ការស្រាវជ្រាវផងដែរ។

លោកថា៖ «ក្រសួងលើកទឹកចិត្តដល់ប្អូនស្រីដែលមានបញ្ហានៅកន្លែងការងារនេះទាក់ទងមកកាន់ក្រសួងក្នុងករណីដែលប្អូនស្រីមានតម្រូវការលើដំណោះស្រាយ។ ក្រសួងមានលទ្ធភាពក្នុងការពិនិត្យថាតើករណីនេះមានបញ្ហាអ្វីហើយរឿងអ្វីកើតឡើងដោយពិតប្រាកដ»។

លោកបញ្ជាក់ថាក្រសួងមានលេខទូរស័ព្ទ ១២៨៦ ដែលជាលេខទទួលរាល់បណ្ដឹងទាំងអស់ពាក់ព័ន្ធនឹងការរំលោភបំពាននៅកន្លែងការងារ។

ក្នុងវីដេអូដែលបានបង្ហោះលើបណ្ដាញសង្គមកាលពីថ្ងៃទី៩ ខែកុម្ភៈ ម្ចាស់គណនី Fa Lata បានលើកឡើងថានាងត្រូវបានក្រុមហ៊ុនមួយបញ្ឈប់ចេញពីការងារបន្ទាប់ពីម្ចាស់ក្រុមហ៊ុននោះបានឃើញនាងសម្រាកគេងនៅកន្លែងធ្វើការនៅម៉ោង១២ និង៤៥នាទី ជាម៉ោងសម្រាកការងារ។ នាងបានសំដែងការហួសចិត្តចំពោះករណីនេះជាខ្លាំង។

ខណៈវីដេអូនេះកំពុងមានការចាប់អារម្មណ៍ច្រើនពីមហាជន ម្ចាស់គណនីដដែលក៏បានបង្ហោះនូវនូវលិខិតសុំឈប់មួយច្បាប់ផងដែរ ដោយក្នុងនោះបានដាក់មូលហេតុនៃការសុំឈប់ថា «ត្រូវបានក្រុមហ៊ុនបញ្ឈប់ពីការងារភ្លាមៗដោយលើកហេតុផល ខ្ញុំបានសម្រាកគេងនៅកន្លែងធ្វើការនៅម៉ោងសម្រាកការងារវេលាម៉ោង ១២:៤៥នាទី»។

នៅថ្ងៃទី១០ ខែកុម្ភៈ ម្ចាស់គណនី Fa Lata បានបង្ហោះបន្ថែមដែរថានាងមិនចង់បានសំណងអ្វីពីក្រុមហ៊ុនចាស់នាងទេ និងសង្ឃឹមថាក្រុមហ៊ុនផ្សេងទៀតគួរថែរក្សាបុគ្គលិករបស់ពួកគេឱ្យល្អ។

ករណីនេះអ្នកនាំពាក្យក្រសួងការងារលោក ស៊ុន មេសា បានលើកទឹកចិត្តដល់ម្ចាស់គណនីហ្វេសបុកខាងលើដាក់បណ្ដឹងមកក្រសួងប្រសិនជាមានតម្រូវការឱ្យមានដំណោះស្រាយ ខណៈលោកថាក្រសួងមានលទ្ធភាពពិនិត្យថាមានរឿងអ្វីពិតប្រាកដនៅពីក្រោយការបញ្ឈប់បុគ្គលិកនេះ៕

អត្ថបទដោយ ហ៊ុន សិរីវឌ្ឍន៍