មណ្ឌលសុខភាពព្រែកកក់ ស្រុកស្ទឹងត្រង់ ត្រូវបានសម្ពោធដាក់ឱ្យប្រើប្រាស់ជាផ្លូវការ

នៅព្រឹកថ្ងៃទី០៩ ខែមីនា ឆ្នាំ២០២៦ មណ្ឌលសុខភាពព្រែកកក់ ស្រុកស្ទឹងត្រង់ ត្រូវបានសម្ភោធដាក់ឱ្យប្រើប្រាស់ជាផ្លូវការ ក្រោមអធិបតីភាព លោក អ៊ុន ចាន់ដា​ អភិបាលខេត្តកំពង់ចាម។ បើតាមលោកអភិបាលខេត្ត មណ្ឌលសុខភាពព្រែកកក់​ ជាសមិទ្ធផលថ្មីមួយទៀត​ កើត​ចេញពីការចូលរួមរបស់រាជរដ្ឋាភិបាលកម្ពុជា​ និងសប្បុរសជន​ ដើម្បីបម្រើសេវាគាំពារសុខភាពជូនប្រជាជន។

លោក អ៊ុន ចាន់ដា បានឱ្យដឹងទៀតថា មណ្ឌលសុខភាពព្រែកកក់ ទទួលខុសត្រូវលើសុខភាពប្រជាពលរដ្ឋ ទាំង១៣ភូមិ នៃឃុំព្រែកកក់ ដែលមានប្រជាជនសរុប ១៥,៨៣១នាក់។ លោកបានបញ្ជាក់ថា ក្រោមកិច្ចសហការរវាងមន្ទីរសុខាភិបាល នៃរដ្ឋបាលខេត្ត ជាមួយសប្បុរសជន ជាពិសេស លោកស្រីសាស្ត្រាចារ្យ ពឹង សយ (នាមដើម លី ឆេងគី) និងក្រុមគ្រួសារ បានឧបត្ថម្ភការសាងសង់អគារថ្មី ១ខ្នង (ទទឹង ៩ ម៉ែត្រ បណ្តោយ ១៧ ម៉ែត្រ) តម្លៃប្រមាណ ៣៨,០០០ ដុល្លារ បែងចែកជា ៧ បន្ទប់ និងបង្គន់អនាម័យ ៣បន្ទប់ (រួមទាំងបង្គន់សម្រាប់ជនពិការ ១) ដោយអគារនេះ ចាប់ផ្តើមសាងសង់ពីថ្ងៃទី១៧ ខែមិថុនា ឆ្នាំ ២០២៥ និងបញ្ចប់គម្រោងនៅថ្ងៃទី១៧ ខែធ្នូ ឆ្នាំ២០២៦ តាមផែនការ ហើយបានចាប់ផ្តើមផ្តល់សេវាបណ្តើរៗតាំងពីថ្ងៃទី០១ ខែមករា ឆ្នាំ២០២៦ មកម្ល៉េះ។

លោកអភិបាលខេត្ត បានយកឱកាសនោះផ្ដាំផ្ញើដល់គ្រូពេទ្យ ឱ្យយកអាគារមណ្ឌលសុខភាព ដែលបានសម្ពោធដាក់ឱ្យប្រើប្រាស់ក្នុងថ្ងៃនេះ ប្រើប្រាស់ឱ្យអស់លទ្ធភាព ក្នុងគោលបំណងផ្ដល់នូវសេវាល្អ សេវាគំរូជូនដល់ប្រជាពលរដ្ឋ និងបង្កើនចំណេះជំនាញ ឯកទេសឱ្យបានគ្រប់ៗគ្នា។ ជាមួយគ្នានេះ លោកក៏បានធ្វើការកៀងគរដៃគូអភិវឌ្ឍន៍ សប្បុរសជននានា ដើម្បីបន្តចូលរួមគាំទ្រដើម្បីឱ្យអង្គភាពមានការរីកចម្រើនតទៅមុខទៀត៕