ខេត្តបន្ទាយមានជ័យដាក់បម្រាមគោចរក្នុងភូមិសាស្ត្រក្រុងប៉ោយប៉ែតរយៈពេល២សប្តាហ៍

រដ្ឋបាលខេត្តបន្ទាយមានជ័យបានសម្រេចអនុវត្តវិធានការរដ្ឋបាលជាបណ្ដោះអាសន្ននៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យរយៈពេល២សប្ដាហ៍ គិតចាប់ពីម៉ោងសូន្យថ្ងៃទី២៦ខែមេសា រហូតដល់ថ្ងៃទី៩ខែឧសភាឆ្នាំ២០២១ដើម្បីទប់ស្កាត់ការឆ្លងរាលដាលជំងឺកូវីដ១៩ ។

លោក អ៊ុំ រាត្រី អភិបាលខេត្តបន្ទាយមានជ័យបានឲ្យដឹងនៅក្នុងសេចក្តីជូនដំណឹងថាត្រូវបានផ្អាកការធ្វើសកម្មភាពចរាចរណ៍ឆ្លងកាត់ផ្លូវក្នុងភូមិសាស្ត្រក្រុងប៉ោយប៉ែត ចាប់ពីម៉ោង២០យប់ដល់ម៉ោង៥ព្រឹកជាកំហិតលើកលែងតែចំពោះករណីការដឹកជញ្ជូនទំនិញធុនធន់ធ្ងន់ពីព្រំដែនថៃមកព្រំដែនកម្ពុជានិងពីព្រំដែនកម្ពុជាទៅព្រំដែនថៃ។

ការធ្វើដំណើរដោយមូលហេតុសុខភាពបន្ទាន់និងមូលហេតុចាំបាច់ក្នុងគ្រួសារដែលមានលិខិតបញ្ជាក់ឬការអនុញ្ញាតពីអាជ្ញាធរមានសមត្ថកិច្ចដែលនៅជិតបំផុត។ការធ្វើដំណើររបស់បុគ្គលិក ក្រុមគ្រូពេទ្យផ្នែករដ្ឋឯកជនមន្ត្រីរាជការក្រុមពន្លត់អគ្គីភ័យកងកម្លាំងប្រដាប់អាវុធគ្រប់ប្រភេទ។

ការធ្វើចរាចរណ៍រថយន្តកុងតឺន័ររថយន្តសម្រាប់បម្រើការដឹកជញ្ជូននិងផ្គត់ផ្គង់ការដ្ឋានសំណង់រថយន្តបាញ់បេតុងរថយន្តដឹកជញ្ជូនសំរាមសំណល់រឹងនិងការធ្វើដំណើរស្របច្បាប់ផ្សេងទៀតដែលមានការអនុញ្ញាតពីអាជ្ញាធរ។

លោកអភិបាលខេត្តបានបញ្ជាក់ថា បុគ្គលឬនីតិបុគ្គលទាំងឡាយដែលមិនអនុវត្តតាមខ្លឹមសារខាងលើនឹងត្រូវទទួលទោសដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀតនិងលិខិតបទដ្ឋានគតិយុត្តពាក់ព័ន្ធធរមាន៕

អត្ថបទ៖ សំអឿន