ក្រុមជនជាតិថៃព្រួតចាក់សម្លាប់សន្តិសុខខ្មែរម្នាក់ ខណៈម្នាក់ទៀតរងរបួស

បុរសជាសន្តិសុខជនជាតិខ្មែរម្នាក់ត្រូវបានជនជាតិថៃពីរនាក់ចាក់សម្លាប់នៅក្នុងផ្ទះល្វែងមួយកន្លែងក្នុងបុរីសានស៊ាន្តហូរ សង្កាត់ផ្សារកណ្ដាល ក្រុងប៉ោយប៉ែត ខណៈម្នាក់ទៀតរងរបួស។ ករណីចាក់សម្លាប់បុរសជាសន្តិសុខបង្កដោយជនជាតិថៃនេះ បានកើតឡើងកាលពីព្រឹកថ្ងៃទី៣ ខែធ្នូ ឆ្នាំ២០២៥។ ទោះបីយ៉ាងណា គេនៅមិនទាន់ដឹងពីមូលហេតុនៃករណីឃាតកម្មនេះនៅឡើយទេ ខណៈកម្លាំងសមត្ថកិច្ចជំនាញកំពុងហ៊ុមព័ទ្ធទីតាំងកើតហេតុដើម្បីស្រាវជ្រាវ។

បើតាមសន្តិសុខម្នាក់ដែលរងរបួសក្នុងហេតុការណ៍នេះបានឱ្យដឹងថា នៅក្នុងផ្ទះកើតហេតុមានជនជាតិថៃប្រុសស្រីសរុបចំនួន៩នាក់ ហើយនៅក្នុងពេលកើតហេតុ មានជនជាតិថៃពីរនាក់បានមកវាយ និងចាក់បណ្ដាលឲ្យសន្តិសុខគ្នាគាត់ម្នាក់ស្លាប់ក្នុងប្លុកឈាមនៅក្នុងផ្ទះកើតហេតុ។

ដោយឡែកបើតាមប្រជាពលរដ្ឋដែលរស់នៅសងខាងកន្លែងកើតហេតុបានឲ្យដឹងថា ទីតាំងខាងលើគេសង្កេតឃើញមានជនជាតិថៃស្នាក់នៅជាន់លើ ហើយពេលល្ងាចៗតែងចេញតាមវេរ៉ង់ដារមកជក់បារី ដោយពុំដឹងថា ជនជាតិថៃទាំងនោះធ្វើអ្វីឡើយដោយឃើញមានតែសន្តិសុខយាមការយ៉ាងតឹងរ៉ឹង។

ក្រោយពីកើតហេតុ ទាំងកម្លាំងនគរបាល ក៏ដូចជាអាវុធហត្ថ បានចុះដល់ទីតាំងកើតហេតុ ក៏ស្រាប់តែជនជាតិថៃដែលស្នាក់នៅកន្លែងកើតហេតុបានស្ទុះរត់ចេញទៅតាមអគារខាងលើ ធ្វើឲ្យប្រជាពលរដ្ឋភ័យខ្លាចនាំគ្នាបិទទ្វារផ្ទះ និងត្រូវបានសមត្ថកិច្ចចាប់បានជនជាតិថៃទាំងនោះបាន២នាក់។

ជុំវិញហេតុការណ៍ឃាតកម្មជនជាតិថៃចាក់សម្លាប់សន្តិសុខខ្មែរនេះ សមត្ថកិច្ចនៅមិនតាន់បញ្ជាក់ព័ត៌មានឲ្យច្បាស់នៅឡើយទេ ខណៈជំនាញកំពុងស្រាវជ្រាវ៕

អត្ថបទ៖ អ ពៅ