អាជីវករផ្សារដើមគរលួចចេញពីភ្នំពេញទៅស្រុកកំណើត បានចម្លងកូវីដ១៩ទៅកូនស្រីអាយុ៤ឆ្នាំ

លោក អំ ណារ័ត្ន អនុប្រធានមណ្ឌលសុខភាពឃុំព្រែកដំបូកបានឲ្យដឹងនៅព្រឹកថ្ងៃទី២៧មេសានេះថា ២នាក់ប្តីប្រពន្ធដែលជាអាជីវករផ្សារដើមគរបានលួចរត់ចេញពីរាជធានីភ្នំពេញមកស្រុកកំណើតនៅភូមិព្រែកដំបូកក្រោម ឃុំព្រែកដំបូក ស្រុកស្រីសន្ធរ ខេត្តកំពង់ចាមបានចម្លងជំងឺកូវីដ១៩ទៅកូនស្រីអាយុ៤ឆ្នាំម្នាក់ទៀត។

 លោកបានបន្តថា«យប់មិញនេះខ្ញុំទទួលដំណឹងមកថាក្មេងស្រីឈ្មោះកញ្ញាអាយុ៤ឆ្នាំដែលត្រូវជាកូនបង្កើតរបស់២នាក់ប្តីប្រពន្ធជាលក់ដូរនៅផ្សារដើមគរលួចចេញពីភ្នំពេញមានលទ្ធផលតេស្តមឋមវិជ្ជមាន១៩តាមរយៈការធ្វើតេស្តតាមឧបករណ៍តេស្តរហ័ស»។

លោកបានបន្តទៀតថា ចំណែកសាច់ញាត៨នាក់ទៀតដែលត្រូវជាយាយឳពុកម្តាយមីងនិងក្មួយចំនួន៨នាក់ទៀតមានតេស្តអវិជ្ជមានលើកទី១ដោយរង់ចាំយកសំណាកជាលើកទី២ជាបន្តទៀត។

គួរបញ្ជាក់ថា ប្តីប្រពន្ធពីរនាក់ដែលមានឆ្លងកូវីដ១៩នោះប្តីមានឈ្មោះ ង៉ុយ អាន់ភេទប្រុសអាយុ២៣ឆ្នាំនិងប្រពន្ធមានឈ្មោះណយស្រីកែវអាយុ២០ឆ្នាំដែលពួកគាត់ជាអាជីវករលក់ដូរនៅផ្សារដើមគរបានរត់គេចចេញពីភ្នំពេញកាលពីថ្ងៃទី២៣ខែមេសាឆ្នាំ២០២១ ហើយដោយមានអាការៈមិនសូវស្រួលខ្លួនបានចូលទៅព្យាបាលនៅពេទ្យព្រែកតាម៉ាក់ហើយបានបន្តដំណើរមកដល់ភូមិព្រែកដំបូកក្រោមនៅវេលាម៉ោង១១ព្រឹកថ្ងៃទី២៤ខែមេសាឆ្នាំ២០២១ត្រូវបានរថយន្តសាម៉ុយស្រុកប្រតិបត្តិស្រុកស្រីសន្ធបញ្ជួនទៅធ្វើចត្តាឡីស័កនៅខេត្តកំពង់ចាមនៅព្រឹកថ្ងៃទី២៥មេសា។

២នាក់ប្តីប្រពន្ធនោះមានអ្នកប៉ះពាល់ផ្ទាល់ជាសាច់ញាតចំនួន៩នាក់ត្រូវបានបញ្ជួនទៅធ្វើចត្តាឡិស័កនៅខេត្តកំពង់ចាមនិងអ្នកប៉ះពាល់ប្រយោលចំនួន១២ផ្សេងទៀតកំពុងធ្វើចត្តាឡីស័កនៅតាមផ្ទះរៀងៗខ្លួនដើម្បីតាមដានសុខភាពបន្តនិងអនុវត្តទៅតាមវិធានរបស់ក្រសួងសុខាភិបាល៕

អត្ថបទ៖ សំអឿន