រដ្ឋបាលក្រុងសំរោង ត្រៀមរៀបចំសង្ក្រាន្ត នៅជំរំភៀសសឹក នៅដើមខែមេសា

រដ្ឋបាលក្រុងសំរោង បានត្រៀមរៀបចំសង្ក្រាន្ត នៅទីតាំងជំរំបាត់ថ្កៅ ស្ថិតនៅស្រុកចុងកាល់ ខេត្តឧត្តរមានជ័យ នៅថ្ងៃទី ០១ ខែមេសា ២០២៦ ដើម្បីបង្កើតបរិយាកាសសប្បាយរីករាយ និងការរក្សានូវប្រពៃណីជាតិ ក្នុងឱកាសបុណ្យចូលឆ្នាំថ្មី។

សកម្មភាពរៀបចំ «សង្ក្រាន្តជំរំបាត់ថ្កៅ» នៅថ្ងៃនេះ រួមមានការតុបតែងសោភ័ណភាព រៀបចំដាក់ទង់ជាតិ ទង់ជ្វាលា ចងផ្ទាំងបដា «សង្ក្រាន្តជំរំបាត់ថ្កៅ សូមស្វាគមន៍» និងបំពាក់ភ្លើងលម្អតាមដើមឈើឱ្យមានភាពស្រស់ស្អាត និងមានពន្លឺចម្រុះពណ៌ ដើម្បីឱ្យការប្រារព្ធពិធីមានភាពអធិកអធម។

ការរៀបចំទីតាំងកម្សាន្ត កំណត់ទីតាំងសម្រាប់លេងល្បែងប្រជាប្រិយខ្មែរ រៀបចំវេទិកាប្រគំតន្ត្រី និងតំបន់សប្បាយភាពនានា ដើម្បីត្រៀមទទួលស្វាគមន៍ប្រជាពលរដ្ឋ ឱ្យមកចូលរួមបានច្រើនកុះករ។

​រដ្ឋបាលក្រុងសំរោង ក្រោមការដឹកនាំរបស់លោក ផុន ចាន់និល អភិបាលក្រុង នឹងខិតខំប្រឹងប្រែងឱ្យអស់ពីសមត្ថភាព ដើម្បីធ្វើឱ្យព្រឹត្តិការណ៍នេះក្លាយជាការចងចាំដ៏សប្បាយរីករាយ និងមានអត្ថន័យជ្រាលជ្រៅ ស្របតាមគោលការណ៍ដឹកនាំរបស់ថ្នាក់ដឹកនាំខេត្ត និងរាជរដ្ឋាភិបាលកម្ពុជា ក្នុងការបង្កបរិយាកាសប្រពៃណីជូនដល់ប្រជាពលរដ្ឋភៀសសឹក៕