អ្នកកាសែតត្រូវប្រើAI កុំឱ្យAI ប្រើអ្នកកាសែត

ហាណូយ ៖ លោក ដុង ម៉ាញ់ ហ៊ុង នាយកការីនិពន្ធនៃវិទ្យុសម្លេងវៀតណាម (VOV)  បានថ្លែងថាវិទ្យុរបស់លោកបានប្រើប្រាស់បញ្ញាសប្បនិម្មិត  (AI) ក្នុងការផ្សព្វផ្សាយព័ត៌មាន តែមានការប្រយ័ត្នប្រយែង ពោលគឺ “អ្នកកាសែតត្រូវប្រើAI កុំឱ្យAI ប្រើអ្នកកាសែត”។

លោកថ្លែងបែបនេះ ដោយឆ្លើយតបសំណួររបស់លោក ពុយ គា ប្រធានក្លិបអ្នកកាសែតកម្ពុជា ក្នុងឱកាសជំនួបផ្លូវការនៅទីស្នាក់ការ  VOV  នាទីក្រុងហាណូយ អំពីស្ថានភាពសារព័ត៌មាន និងការប្រើប្រាស់ AI  ។

លោក  ហ៊ុង  បានបន្តថា  VOV ទើបបានសម្រេចចេញសេចក្តីណែនាំទូទៅស្តីពីការប្រើប្រាស់  AI  ក្នុងការផ្សព្វផ្សាយព័ត៌មានដោយត្រូវគោរពតាមក្រមសីលធម៌វិជ្ជាជីវ:សារព័ត៌មានឱ្យបានត្រឹមត្រូវដើម្បីធានាឱ្យបាននូវសេចក្តីទុកចិត្តរបស់សាធារណជនមកលើវិទ្យុនេះព្រមទាំងធានានូវផលប្រយោជន៍ជាតិវៀតណាមក្នុងបច្ចុប្បន្នកាល និងសម្រាប់ទៅអនាគត។

វិទ្យុសម្លេងវៀតណាមមានបុគ្គលិកជិតពីរពាន់នាក់  ផ្សាយចេញជា១៣ភាសាបរទេស  ដែលរួមមានទាំងភាសារខ្មែរផង។

លោក  ហ៊ុង  បន្ថែមទៀតថា VOV ជាស្ថាប័នផ្សព្វផ្សាយព័ត៌មានស្ថិតក្រោមការគ្របគ្រងនឹងដឹកនាំរបស់គណៈកម្មាធិការមជ្ឈិមបក្សកុម្មុយនីស្តវៀតណាមមុនដំបូងគេដែលបានធ្វើសេចក្តីណែនាំទូទៅស្តីពីការប្រើប្រាស់ AI  នេះ។

វិទ្យុសម្លេងវៀតណាមត្រូវបានបង្កើតឡើងដោយលោក ហូ ជីមិញ នៅថ្ងៃទី៧ ខែកញ្ញា ឆ្នាំ១៩៤៥ ហើយបានផ្តាំផ្ញើទុកឱ្យមេដឹកនាំ និងអ្នកធ្វើការនៅវិទ្យុនេះថា “យើងត្រូវរក្សាឱ្យខានតែបាននូវសម្លេងរបស់បក្សរដ្ឋាភិបាល និងប្រជាជនវៀតណាមនៅគ្រប់កាលៈទេសៈ” ៕