ព័ត៌មានជាតិ

ឯកអគ្គរដ្ឋទូតរុស្ស៊ី៖ កម្ពុជាមានកន្លែងពិសេសមួយក្នុងចំណោមមិត្តភ័ក្ដិនិងដៃគូប្រកបដោយទំនុកចិត្តរបស់យើង

បានផុស

១ ម៉ោង មុន

នៅ

ថ្ងៃសុក្រ ១២ មិថុនា ២០២៦

ដោយ

ឯកអគ្គរដ្ឋទូតរុស្ស៊ីប្រចាំកម្ពុជាលោក អាណាតូលី បូរ៉ូវីក បានលើកឡើងថាប្រទេសកម្ពុជាមានចំណុចពិសេសមួយក្នុងចំណោមមិត្តភ័ក្ដិរបស់រុស្ស៊ីគឺចំណងមិត្តភាពដ៏រឹងមាំ ការតភ្ជាប់ភាពជិតស្និទ្ធនៃប្រជាជនប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីជប់លៀងទិវានៃប្រទេសរុស្ស៊ីកាលពីយប់ថ្ងៃទី១១ ខែមិថុនា ឆ្នាំ២០២៦ នៅសណ្ឋាគារសូហ្វីតែលភ្នំពេញ លោក អាណាតូលី មានប្រសាសន៍ថា ៧០ឆ្នាំនៃទំនាក់ទំនងការទូតរវាងកម្ពុជានិងរុស្ស៊ីបានផ្សារភ្ជាប់ទំនាក់ទំនងមិត្តភាព ការគោរព និងការជឿទុកចិត្តគ្នាដ៏រឹងមាំរវាងប្រទេសទាំងពីរ ទោះបីជាមានការសាកល្បងដោយពេលវេលា និងការប្រែប្រួលស្ថានភាពអន្តរជាតិក្ដី។ លោកបន្ថែមថាប្រជាជនរុស្ស៊ី និងកម្ពុជាបានភ្ជាប់ទំនាក់ទំនងដ៏ជិតស្និទ្ធតាមរយៈប្រវត្តិសាស្ត្រ ការបណ្ដុះបណ្ដាលធនធានមនុស្ស និងការអភិវឌ្ឍន៍សេដ្ឋកិច្ចសំខាន់ៗ។

លោកថា៖ «យើងវាយតម្លៃខ្ពស់នូវអាកប្បកិរិយាប្រកបដោយការថែទាំរបស់ប្រជាជនកម្ពុជាចំពោះជំពូកនៃប្រវត្តិសាស្ត្ររួមរបស់យើង»។

ថ្លែងជាមួយមោទនភាពលោក អាណាតូលី ថារហូតមកដល់ពេលនេះមាននិស្សិតកម្ពុជាជាង ៨ ០០០នាក់បានទៅសិក្សានៅរុស្ស៊ី និងសូវៀត ហើយសព្វថ្ងៃនេះពួកគេបានកាន់តំណែងជាន់ខ្ពស់ក្នុងជួររដ្ឋាភិបាល ពាណិជ្ជកម្ម និងវិទ្យាសាស្ត្រនៅក្នុងប្រទេសកម្ពុជាទៀតផង។ លោកថារុស្ស៊ីនឹងបន្តពង្រឹងលទ្ធភាពអប់រំសម្រាប់យុវជនកម្ពុជាបន្ថែមទៀត។

អនុប្រធានទី១អាជ្ញាធរមីន ទេសរដ្ឋមន្ត្រី លី ធុជ មានប្រសាសន៍ក្នុងពិធីជប់លៀងនោះផងដែរថា ៧ទសវត្សរ៍មកនេះរុស្ស៊ី និងកម្ពុជា បានរក្សាជំនឿចិត្តជាមួយគ្នាដោយក្ដីគោរព និងទុកចិត្ត។ លោកថាជំនួយពីរុស្ស៊ីផ្ដល់ឱ្យកម្ពុជា នូវការអភិវឌ្ឍន៍ធនធានមនុស្សដ៏ច្រើនដែលជាកម្លាំងដ៏សំខាន់ក្នុងការរក្សាស្ថិរភាព និងការអភិវឌ្ឍន៍របស់ប្រទេសដូចបច្ចុប្បន្ន។

លោកថា៖ «គឺចិត្តសប្បុរសដែលធ្វើឱ្យប្រទេសមួយជឿជាក់លើប្រទេសមួយទៀត និងធ្វើការជាមួយគ្នា។ មិត្តភាពនេះនឹងបន្តរីកចម្រើនថែមទៀត»។

ប្រទេសរុស្ស៊ីដែលពីមុនជាសហភាពសូវៀតគឺជាអ្នកផ្ដល់ជំនួយដ៏សំខាន់មួយដល់កម្ពុជាក្រោយការដួលរលំទៅនៃរបបកម្ពុជាប្រជាធិបតេយ្យ។ សហភាពសូវៀតបានផ្ដល់ជំនួយដល់ការបណ្ដុះបណ្ដាលធនធានមនុស្ស និងការអភិវឌ្ឍន៍វិស័យសេដ្ឋកិច្ចរបស់កម្ពុជាឡើងវិញនៅពេលនោះ។

គិតមកដល់ពេលនេះទំនាក់ទំនងកម្ពុជា និងរុស្ស៊ី មានអាយុកាល៧០ឆ្នាំហើយបន្ទាប់ពីបានបង្កើតចំណងទំនាក់ទំនងការទូតកាលពីថ្ងៃទី១៣ ខែឧសភា ឆ្នាំ១៩៥៦៕

សម្ដេចព្រះ នរោត្តម សីហនុ និងលោក Nikita Khrushchev ប្រធានទីស្តីការគណៈរដ្ឋមន្ត្រីសហភាពសូវៀត អញ្ជើញចូលរួមទទួលបដិសណ្ឋារកិច្ចនៅស្ថានទូតកម្ពុជាប្រចាំសហភាពសូវៀត ក្នុងដំណើរទស្សនៈកិច្ចនៃពិព័រណ៍ឧទ្ទិសដល់សមិទ្ធិផលវប្បធម៌ និងសេដ្ឋកិច្ចរបស់កម្ពុជានៅ ទីក្រុងម៉ូស្គូ ថ្ងៃទី២៩ ខែវិច្ឆិកា ឆ្នាំ១៩៦០។ រូបភាព៖ នាយកដ្ឋានប្រវត្តិសាស្ត្រ និងឯកសារនៃក្រសួងការបរទេសរុស្ស៊ី

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៧ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា