អាជ្ញាធរខេត្តស្វាយរៀង ពង្រឹងសន្តិសុខ សុវត្ថិភាពតាមទីតាំងប្រមូលផ្តុំ និងបង្ក្រាប Online Scams នៅក្រុងបាវិត

នៅថ្ងៃទី១២ ខែមិថុនា ឆ្នាំ២០២៦ រដ្ឋបាលខេត្តស្វាយរៀង បានប្រជុំ និងចុះធ្វើរដ្ឋបាលចំហ ក្រោមអធិបតីភាព លោក សេង សីលា និង លោក ម៉ែន អេង អភិបាលរងខេត្ត តំណាងលោកអភិបាលខេត្តស្វាយរៀង។ កិច្ចប្រជុំនេះ ផ្តោតសំខាន់លើប្រធានបទ “ការគ្រប់គ្រងសន្តិសុខ សុវត្ថិភាពតាមទីតាំងរស់នៅប្រមូលផ្តុំ និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams)” នៅក្រុងបាវិត។

កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំ និងមន្ត្រីពាក់ព័ន្ធជាច្រើនរូប រួមមាន លោក ម៉ែន ចាន់រ៉ា អភិបាលក្រុងបាវិត, លោកស្នងការរងនគរបាលខេត្ត, លោកអភិបាលរងក្រុង, លោកប្រធានមន្ទីរព័ត៌មានខេត្ត, លោកនាយក នាយករងរដ្ឋបាលក្រុង, លោកអធិការនគរបាលក្រុង, លោកមេបញ្ជាការកងរាជអាវុធហត្ថក្រុង, លោកប្រធានការិយាល័យនីតិកម្មក្រុង, លោក លោកស្រីចៅសង្កាត់ និងប៉ុស្តិ៍នគរបាលរដ្ឋបាលសង្កាត់ទាំងប្រាំ ក្នុងក្រុងបាវិត។

គោលបំណងនៃកិច្ចប្រជុំ និងការចុះពិនិត្យ ១. ពង្រឹងសន្តិសុខ សុវត្ថិភាព៖ ពិភាក្សា និងដាក់ចេញវិធានការ ដើម្បីពង្រឹងសន្តិសុខ សុវត្ថិភាព និងសណ្តាប់ធ្នាប់សាធារណៈ នៅតាមទីតាំងរស់នៅប្រមូលផ្តុំ ដូចជាកន្លែងស្នាក់នៅ បន្ទប់ជួល ផ្ទះល្វែង ផ្ទះវីឡា។ ២. ប្រយុទ្ធប្រឆាំងការឆបោកតាមអនឡាញ៖ ពិភាក្សា និងដាក់ចេញយុទ្ធសាស្ត្រ ដើម្បីបង្ក្រាប និងទប់ស្កាត់រាល់សកម្មភាពឆបោកតាមប្រព័ន្ធបច្ចេកវិទ្យា (Online Scams) ដែលកំពុងកើនឡើង និងបង្កផលប៉ះពាល់ដល់ប្រជាពលរដ្ឋ។ ៣. ចុះពិនិត្យជាក់ស្តែង (រដ្ឋបាលចំហ)៖  បន្ទាប់ពីកិច្ចប្រជុំ ថ្នាក់ដឹកនាំ និងមន្ត្រីជំនាញ បានចុះពិនិត្យជាក់ស្តែង នៅតាមទីតាំងសំខាន់ៗមួយចំនួន ដើម្បីវាយតម្លៃស្ថានភាព និងផ្តល់ការណែនាំចាំបាច់។

សកម្មភាពនេះ បង្ហាញពីការយកចិត្តទុកដាក់ខ្ពស់របស់រដ្ឋបាលខេត្តស្វាយរៀង ក្នុងការថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ ព្រមទាំងការប្តេជ្ញាចិត្ត ក្នុងការប្រយុទ្ធប្រឆាំង និងបង្ក្រាបរាល់សកម្មភាពល្មើសច្បាប់ ជាពិសេសការឆបោកតាមប្រព័ន្ធបច្ចេកវិទ្យា៕
ដោយ: ភក្ដី