អង្គការ AHF បើកយុទ្ធនាការផ្សព្វផ្សាយពីសេវាកម្មថែទាំសុខភាពអ្នកជំងឺអេដស៍ និងកាមរោគដោយឥតគិតថ្លៃ

អង្គការមូលនិធិថែទាំសុខភាពអ្នកជំងឺអេដស៍កម្ពុជា( AHF-Cambodia) នៅព្រឹកថ្ងៃទី១៩ ខែកក្កដាឆ្នាំ២០២៦ បានបើកយុទ្ធនាការផ្សព្វផ្សាយពីសេវាកម្មថែទាំសុខភាពអ្នកជំងឺអេដស៍ និងកាមរោគដោយឥតគិតថ្លៃនៅមណ្ឌលថែរក្សាសុខភាពដែលមានទីតាំងស្ថិតនៅផ្ទះលេខ០៦ ផ្លូវលេខ៦០៤ សង្កាត់បឹងកក់២ ខណ្ឌទួលគោក រាជធានីភ្នំពេញ។

ថ្លែងក្នុងយុទ្ធនាការលោកវេជ្ជបណ្ឌិត ចន ផាន់ណា ប្រធានកម្មវិធីប្រចាំប្រទេសអង្គការមូលនិធិថែទាំសុខភាពអ្នកជំងឺអេដស៍ប្រចាំនៅប្រទេសកម្ពុជា បានឱ្យដឹងថា នេះជាលើកទី២ហើយដែលអង្គការបានរៀបចំយុទ្ធនាការផ្សព្វផ្សាយពីសេវាកម្មថែទាំសុខភាពអ្នកជំងឺអេដស៍ និងកាមរោគដោយឥតគិតថ្លៃនៅមណ្ឌលថែរក្សាសុខភាពដែលលើកទី១ធ្វើកាលពីឆ្នាំ២០២៥ និងគ្រោងរៀបចំធ្វើម្តងទៀតនៅចុងឆ្នាំ២០២៦នេះដើម្បីផ្សព្វផ្សាយដល់បងប្អូនប្រជាពលរដ្ឋបានយល់ដឹងនិងមកទទួលសេវាឱ្យបានច្រើនបន្ថែមទៀតព្រោះថានៅក្នុងមណ្ឌលមានសេវាកម្មមួយចំនួនរួមមាន ការគ្រប់គ្រងជំងឺកាមរោគ ការពិនិត្យ និងការព្យាបាលសម្រាប់ជំងឺកាមរោគទូទៅ, ការបង្ការ និងការអប់រំនិងផ្តល់ ស្រោមអនាម័យឥតគិតថ្លៃ ការប្រឹក្សាផ្លូវភេទដែលមានសុវត្ថិភាព ។ក្រៅពីនេះអង្គការក៏មានផ្តល់សេវាបង្ការការចម្លងមេរោគអេដស៍តាមរយៈការផ្តល់ថ្នាំលេបនិងថ្នាំចាក់សម្រាប់បង្ការមុនពេលរួមភេទកុំឱ្យឆ្លងមេរោគអេដស៍និងថ្នាំលេបក្រោយរួមភេទកុំឱ្យឆ្លងមេរោគអេដស៍ផងដែរ។

លោកវេជ្ជបណ្ឌិតបានបន្តទៀតថានៅក្នុងយុទ្ធនាការនេះអង្គការប្រើប្រាស់ម៉ូតូកង់បីចំនួន ៤ គ្រឿង និងម៉ូតូចំនួន ១០ គ្រឿង ដែលមានបដា និងការផ្សព្វផ្សាយមិត្តភក្ដិចំនួន ១៥ គ្រឿងនៅតាមទីតាំងមួយចំនួនពិសេសនៅមាត់ទន្លេនិង Walk Streetផងដែរ។

លោកវេជ្ជបណ្ឌិត លើកទឹកចិត្តដល់ក្រុមយុវជនប្រឈមដែលរួមមានស្ត្រីបម្រើសេវាកម្សាន្ត អ្នកស្រលាញ់ភេទដូចគ្នា និងក្រុមបំលែងភេទមកទទួលសេវាពិនិត្យនិងព្យាបាលជំងឺកាមរោគដោយឥតគិតថ្លៃ ខណៈបច្ចុប្បន្ន ជំងឺនេះកំពុងមានការកើនឡើងខ្ពស់ ពិសេសទៅលើយុវជនខណៈបច្ចុប្បន្នយុវជនប្រឈមមុខនឹងការឆ្លងជំងឺកាមរោគ និងមេរោគអេដស៍ កំពុងមានការកើនឡើងដែលជាក្តីកង្វល់ដ៏ធំមួយរបស់អង្គការមូលនិធិថែទាំសុខភាពអ្នកជំងឺអេដស៍។ដូចនេះការបង្កើតមណ្ឌលថែរក្សាសុខភាពនេះគឺដើម្បីចូលរួមទប់ស្កាត់ការរីករាលដាល និងកើនឡើងនៃជំងឺកាមរោគនិងជំងឺអេដស៍ដែលប៉ះពាល់ដល់សុខភាពឯកជន និងសារធារណៈ។

គួរបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាននិងកំពុងផ្តល់សេវាថែទាំព្យាបាលដោយមិនគិតពីលទ្ធភាពនៃការបង់ប្រាក់ ដល់អតិថិជនជាង ៣លាននាក់ក្នុង៥០ប្រទេស ជុំវិញពិភពលោក នៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប និងជាពិសេសនៅកម្ពុជាអង្គការសហការជាមួយរាជរដ្ឋាភិបាលបាននិងកំពុង អនុវត្តិការងារនៅតាមកន្លែង សេវាមេរោគអេដស៍ចំនួន ៤២កន្លែង នៃ ៧១កន្លែងផ្តល់ឱសថប្រឆាំងមេរោគអេដស៍ ក្នុងខេត្តក្រុងចំនួន១៩ ទូទាំងប្រទេសកម្ពុជា៕

អត្ថបទ៖ សំអឿន