គ្រាន់តែស្រុកបន្ទាយអំពិលនៅឧត្ដរមានជ័យ សង្គ្រាមថៃឈ្លានពាន បន្សល់គ្រាប់មិនទាន់ផ្ទុះយ៉ាងហោច៧ពាន់គ្រាប់

អភិបាលរងស្រុកបន្ទាយអំពិល លោក ខេន ដឿម  ឱ្យដឹងថា  សង្គ្រាមដែលថៃឈ្លានពានកម្ពុជាកាលពីឆ្នាំ២០២៥ កន្លងទៅនេះ  បានបន្សល់នូវគ្រាប់មិនទាន់ផ្ទុះ យ៉ាងហោច៧ពាន់គ្រាប់ ក្នុងនោះមានទាំងគ្រប់បែកចង្កោម គ្រាប់កាំភ្លើងធំរាយប៉ាយលើទឹកដីស្រុកបន្ទាយអំពិល ខេត្តឧត្ដរមានជ័យ គំរាមកំណែងសុវត្ថិភាពដល់ប្រជាពលរដ្ឋ ជាពិសេសប៉ះពាល់ដល់ការធ្វើកសិកម្ម ស្របពេលពលរដ្ឋប្រមាណ៩០ភាគរយប្រកបមុខរបរធ្វើស្រែចម្ការ។

ថ្លែងប្រាប់ក្រុមអ្នកសារព័ត៌មាន អភិបាលរងស្រុកបន្ទាយអំពិល គូសបញ្ចាក់ពីចំនួនគ្រាប់ដែលថៃទម្លាក់ដូច្នេះ៖«ជាងពាន់៧ពាន់គ្រាប់ ដែលធ្លាក់ចូលមកក្នុងស្រុកបន្ទាយអំពិល មានទាំងគ្រាប់បែកចង្កោម គ្រាប់ផ្សេងៗទៀតដែលធ្វើឱ្យមានផលប៉ះពាល់ទៅលើផ្ទះសម្បែង ក៏ដូចជាដីធ្លីបងប្អូនប្រជាពលរដ្ឋ »។

លោកថ្លែងថា សម្រាប់តែស្រុកបន្ទាយអំពិល ការឈ្លានពានមកលើទឹកដីកម្ពុជាពីសំណាក់យោធាថៃទាំងពីរលើក បានបំផ្លាញផ្ទះសម្បែងប្រជាពលរដ្ឋ ស៊ីវិល ចំនួន៨២៣ខ្នង និងហេដ្ឋារចនាសម្ព័ន្ធច្រើននៅក្នុងស្រុកបន្ទាយអំពិល ក្នុងនោះមានវត្តអារាមចំនួន៣កន្លែង ដូចជាវត្តតាមាន់សែនជ័យ វត្តគិរីរង្សីថ្មដូន និងវត្តជប់គគីរកើត, សាលារៀនចំនួន៦ខ្នង, មណ្ឌលសុខភាពចំនួន៣កន្លែង ដោយមិនទាន់រាប់បញ្ចូលនូវការខូចខាតនៅទូទាំងខេត្តឧត្តរមានជ័យ។

បើនិយាយពីការខូចខាតនៅទូទាំងខេត្តឧត្ដរមានជ័យ របាយការណ៍ផ្លូវការបង្ហាញថា ក្នុងអំឡុងពេលបើកការប្រហារឈ្លានពានទឹកដីកម្ពុជា លើកទី២ បានធ្វើឱ្យទ្រព្យសម្បត្តិសាធារណៈសំខាន់ៗជាច្រើន ត្រូវបានបំផ្លាញ ក្នុងនោះប្រាសាទបុរាណចំនួន២ គឺប្រាសាទតាក្របី និងប្រាសាទចន្ទ, ស្ពានចំនួន២ទីតាំង, វត្តអារាមចំនួន៩, មណ្ឌលសុខភាពចំនួន៣, សាលារៀនចំនួន១៥ទីតាំង, ប៉ុស្តិ៍រដ្ឋបាល, ច្រកទ្វារព្រំដែន ជាដើម។ ដោយឡែកទ្រព្យសម្បត្តិឯកជនវិញមានដូចជា អគារសណ្ឋាគារ៤, ស្ថានីយប្រេងឥន្ធនៈចំនួន ៣កន្លែង, ព្រមទាំងមធ្យោបាយធ្វើដំណើរ មានរថយន្ត ទោចក្រយានយន្ត គោយន្ត និងសម្ភារផ្សេងៗទៀត។

អំឡុងពេលបើកការប្រហារឈ្លានពានទឹកដីកម្ពុជា កាលពីឆ្នាំ២០២៥ យោធាថៃបានប្រើប្រាស់សព្វាវុធគ្រប់ធុន និងគ្រប់ប្រភេទ ក្នុងនោះក៏មានការប្រើប្រាស់យន្តហោះចម្បាំងទម្លាក់គ្រាប់ប្រភេទMK82, MK84, គ្រាប់ផ្លោង និងគ្រាប់ទម្លាក់ពីដ្រូន ព្រមទាំងគ្រាប់បែកចង្កោម ដែលត្រូវអន្តរជាតិហាមប្រាម ដែលនេះសបញ្ជាក់ថា យោធាថៃមានបំណងឈ្លានពានទឹកដីកម្ពុជា យ៉ាងច្បាស់ក្រឡែត។

ក្នុងសង្គ្រាមថៃឈ្លានពានកម្ពុជាកាលពីឆ្នាំ២០២៥ ​ តាមការប៉ាន់ស្មាន ទាហានថៃអាចបាញ់គ្រាប់បែកចង្កោមប្រភេទគ្រាប់១៥៥មម ចំនួនប្រមាណ១២០.០០០ទៅ១៣០.០០០គ្រាប់​ និងមានកូនគ្រាប់បែកចង្កោមប្រភេទM42,M46 និងM85 ប្រមាណ៦លានទៅ៧លានគ្រាប់ មកលើខេត្តរបស់កម្ពុជាជាប់ព្រំដែនជាមួយថៃ​។ នេះបើតាមការផ្សព្វផ្សាយរបស់លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា៕