ឥណ្ឌាបន្តជួយកម្ពុជាបោសសម្អាតមីនលើផ្ទៃដីជាង ១៦ម៉ឺនម៉ែត្រ ការ៉េ នៅពោធិ៍សាត់ ផ្តល់ប្រយោជន៍ជូនពលរដ្ឋ ១ ៤០០នាក់

កម្ពុជា និងឥណ្ឌា បានចុះហត្ថលេខាលើអនុស្សរណៈនៃការយោគយល់គ្នា (MoU) អនុវត្តគម្រោងផ្តល់ផលរហ័ស (Quick Impact Project-QIP) ដើម្បីគាំទ្រការបោសសម្អាតមីនមនុស្សធម៌នៅភូមិម៉ល ឃុំរកាត ស្រុកភ្នំក្រវាញ ខេត្តពោធិ៍សាត់ ដែលនឹងបោសសម្អាតដីមានហានិភ័យប្រមាណ ១៦៣,២០៧ ម៉ែត្រការ៉េ និងផ្តល់ផលប្រយោជន៍ដល់ប្រជាពលរដ្ឋ ១,៤០៣នាក់ ស្មើនឹង ៣៦៩គ្រួសារ។

អនុស្សរណៈនេះ ត្រូវបានចុះហត្ថលេខានៅថ្ងៃទី២៧ ខែកក្កដា ឆ្នាំ២០២៦ រវាងលោក លី ធុជ ទេសរដ្ឋមន្ត្រី និងជាអនុប្រធានទី១ នៃអាជ្ញាធរមីន (CMAA) និងលោក Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា។

សេចក្តី​ប្រកាសរួមបញ្ជាក់ថា គម្រោងនេះ នឹងជួយសម្អាតផ្ទៃដីពីការគំរាមកំហែងដោយសារគ្រាប់មីន និងសំណល់ជាតិផ្ទុះពីសង្គ្រាម ដើម្បីឱ្យប្រជាពលរដ្ឋអាចប្រើប្រាស់សម្រាប់ការបង្កបង្កើនផលកសិកម្ម សាងសង់លំនៅឋាន និងអភិវឌ្ឍសហគមន៍បានដោយសុវត្ថិភាព។ គម្រោងក៏រួមបញ្ចូលសកម្មភាពអប់រំផ្សព្វផ្សាយអំពីហានិភ័យនៃគ្រាប់យុទ្ធភណ្ឌមិនទាន់ផ្ទុះ ដើម្បីបង្កើនការយល់ដឹងដល់ប្រជាពលរដ្ឋផងដែរ។

នៅក្នុងពិធីចុះហត្ថលេខានោះ លោកឯកអគ្គរដ្ឋទូត Vanlalvawna Bawitlung បានគូសបញ្ជាក់អំពីកិច្ចសហប្រតិបត្តិការដ៏រឹងមាំ និងបន្តបន្ទាប់រវាងឥណ្ឌា និងកម្ពុជា លើវិស័យបោសសម្អាតមីន។ លោកបានកត់សម្គាល់ថា សកម្មភាពបោសសម្អាតមីនមនុស្សធម៌ មិនមែនត្រឹមតែជាការដកហូតនូវគ្រោះថ្នាក់ដែលបង្កប់នៅក្នុងដីប៉ុណ្ណោះទេ ប៉ុន្តែថែមទាំងជាការបើកឱកាសសម្រាប់ការអភិវឌ្ឍប្រកបដោយចីរភាព ការលើកកម្ពស់ជីវភាពរស់នៅ និងការធានានូវអនាគតមួយដែលកាន់តែមានសុវត្ថិភាព និងវិបុលភាពសម្រាប់សហគមន៍មូលដ្ឋាន។

លោក លី ធុជ បានសម្តែងនូវការដឹងគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនឥណ្ឌា សម្រាប់ដៃគូសហប្រតិបត្តិការដ៏យូរអង្វែងក្នុងវិស័យសកម្មភាពមីននៅកម្ពុជា។ លោកបានកត់សម្គាល់ថា ចំណងមិត្តភាពរវាងកម្ពុជា និងឥណ្ឌា ដែលមានឫសគល់យ៉ាងជ្រៅជ្រះក្នុងប្រវត្តិសាស្ត្រ និងអារ្យធម៌រួមគ្នារាប់សតវត្សមកហើយនោះ នៅតែបន្តរីកចម្រើនយ៉ាងរស់រវើកតាមរយៈកិច្ចសហប្រតិបត្តិការជាក់ស្តែង ដែលបានចូលរួមលើកកម្ពស់ជីវភាពរស់នៅរបស់ប្រជាជនកម្ពុជា។

លោក ទេសរដ្ឋមន្ត្រី លី ធុជ ក៏បានកោតសរសើរចំពោះជំនួយមនុស្សធម៌ដ៏មានតម្លៃរបស់ឥណ្ឌា ជូនដល់ជនរងគ្រោះដោយសារគ្រាប់មីន តាមរយៈគំនិតផ្តួចផ្តើម “India for Humanity” ដែលបានជួយដល់ជនពិការដោយសារគ្រាប់មីននៅកម្ពុជារាប់រយនាក់ ឱ្យទទួលបានមកវិញនូវសមត្ថភាពក្នុងការផ្លាស់ទី វិបុលភាព និងឱកាសក្នុងការកសាងជីវភាពរស់នៅប្រកបដោយផ្លែផ្កា។

ប្រទេសឥណ្ឌា គឺជាដៃគូដ៏យូរអង្វែងក្នុងកិច្ចខិតខំប្រឹងប្រែងបោសសម្អាតមីនមនុស្សធម៌នៅកម្ពុជា។ ក្រោមក្របខ័ណ្ឌគម្រោងផ្តល់ផលរហ័សនៃកិច្ចសហប្រតិបត្តិការមេគង្គ-គង្គា ប្រទេសឥណ្ឌា និងអាជ្ញាធរមីន បានអនុវត្តដោយជោគជ័យនូវគម្រោងបោសសម្អាតមីនចំនួន ៤ រួចមកហើយ។ គម្រោងទីមួយបានជួយបោសសម្អាតភូមិចំនួន ៤ ក្នុងខេត្តកោះកុង ដែលផ្តល់ប្រយោជន៍ដល់ប្រជាពលរដ្ឋជាង ៧,០០០ នាក់។

គម្រោងទីពីរនៅក្នុងភូមិកោះប៉ោ ខេត្តកោះកុង បានបោសសម្អាតដីរងការគំរាមកំហែងប្រមាណ ១៩៧,៨១០ ម៉ែត្រការ៉េ ដោយផ្តល់ប្រយោជន៍ដល់ប្រជាពលរដ្ឋជាង ៣,៣០០ គ្រួសារ។ ដោយឡែក គម្រោងផ្តល់ផលរហ័សមួយទៀតដែលកំពុងដំណើរការនៅក្នុងភូមិព្រះអណ្តូង ខេត្តពោធិ៍សាត់ កំពុងមានវឌ្ឍនភាពល្អ និងនឹងបោសសម្អាតដីប្រមាណ ២០០,០០០ ម៉ែត្រការ៉េ ដែលផ្តល់ប្រយោជន៍ដោយផ្ទាល់ដល់ប្រជាពលរដ្ឋប្រមាណ ១,០០០ នាក់៕